Maliden musoman an’a cɛman,
N fasodenɲɔgɔnw,
Ne wasalen bɛ n sara aw la kɛrɛnkɛrɛnnenya la, an ka jamana ka yɛrɛmahɔrɔnya sɔrɔli laɲɛnamayali hukumu kɔnɔ.
Sɛtanburukalo tile 22 ye don ye, min tɛ bɔ an hakili la ; a kɛra don ye, Mali fasojama y’a ŋaniya, ka dan sigi an marabaa ka fanga la ni Mali kura kannabilalen sɔrɔli ye.
Nin waati kɛrɛnkɛrɛnnen in na,
n bɛ taasibila kɛ ka ɲɛsin yɛrɛmahɔrɔnya ɲininbaaw ma, n’u ɲɛmɔgɔ tun ye jamanakuntigi Modibo Keyita ye.
Jɔyɔrɔba kɛrɛnkɛrɛnnen tun b’o cɛ in na waati la, waati min, ni Mali bɛ wuli k’a jɔ a ka yɛrɛmahɔrɔnya nɔfɛ.
An ka kan k’o sira talen minɛ wajibi la, a san 64 ye nin ye.
N bɛ taasibila kɛ fana ka ɲɛsin mɔgɔw ma, minnu ni tora fasoko la, ka waleɲumandɔn k’u ye.
Maliden musoman an’a cɛman,
N fasodenɲɔgɔnw,
An ka yɛrɛmahɔrɔnya laɲɛnamayali ye cogoya ɲuman ye, ka hakililajigin kɛ an ka fasojama ka cɛsiri kɛlenw na, min b’a to jamana fangamaba bɛ se ka jɔ, ani k’a kɛ faso yiriwalen ye.
Ne ka yamaruyaw kɔnɔ, fɛn min tun tora gɔfɛrɛnaman ye, o ye ka tɛmɛn ni baara kɛtaw waleyali ye an ka jamanadenw mako gɛlɛnw ɲɛnabɔli kama, ko suguya caman na.
Maliden musoman an’a cɛman,
N fasodenɲɔgɔnw,
Basigiko kɛlen bɛ Mali fasojama haminankoba ye.
Ɲinan, an ka yɛrɛmahɔrɔnya seli kɛra waati gɛlɛn kɔnɔ, yɔrɔ minɛnenw laseginni kɛlɛw la jamana lakananbaaw fɛ, k’a ɲinin ka jamana kelenya lasegin a nɔ na, ani ka kojugubakɛ jɔrɛ bɛɛ ban an na pewu.
Jamana lakananbaaw ye kɛlɛw kɛ basigi sabatili ani jɔli hukumu kɔnɔ marayɔrɔ bɔɔsilenw na, k’a to gɔfɛrɛnaman tɔgɔla cakɛdaw ka se ka segin ka na sigi dɔɔnin-dɔɔnin ; lakɔliw ni cakɛda kɛrɛnkɛrɛnnenw b’o la.
O sebaaya sɔrɔlenw sababu bɔra sɔrɔdasiw ka kɛlɛ kɛtaw mabɛnni ma, ani sɔrɔdasiw sigili Bɛri, Tesaliti, Anefisi, Kidali ani Agelihɔku.
Kojugubakɛlaw ye binkanni min kɛ tarata sɛtanburukalo tile 17 tɛmɛnnen, o b’an hakili jigin a la ka taa a fɛ, ko an ka kan k’an sɛbɛkɔrɔ ɲɛmada ani k’an labɛnnen to kɛlɛ fari kan, sanga ni waati bɛɛ la.
N bɛ taasibila kɛ ka ɲɛsin a mɔgɔw ma, minnu bɔnɛna u ni na binkanni jugu in na, ka nɔgɔyada kɛ joginnenw ye, ani ka lakananbaa tɔw yɛrɛ fo u ka baara ɲɛdɔn na nin ko suguyaw la.
Maliden musoman an’a cɛman,
N fasodenɲɔgɔnw,
Cɛsiriw bɛ to sen na minɛnɲinin na lakananbaaw ye ani ka tɛmɛn ni yɛlɛma ɲuman donni ye u ka ɲɛnamaya an’u ka baara kɛcogo la, min b’a to dɔ bɛ se ka fara u ka dɔnniyaw kan cogo min na, kɛlɛko la.
Ani fana, dɔnniyaw farali ɲɔgɔn kan kɛlɛ senkɔrɔmadonni na Sahelikungo kɔnfederasɔn kɔnɔ, tɛmɛn bɛ kɛ n’o ye.
Maliden musoman an’a cɛman,
N fasodenɲɔgɔnw,
Dɔ farali dannaya kan fasojama ni fangabulonw cɛ, kɛrɛnkɛrɛnnen ya la kiiritigɛsow, an ka kiiri tigɛcogo bɛnnen bɛ n’a laɲininw ye ; n’o ye kojugukɛlaw ɲangibaliya kɛlɛli, ani kiiriso kuraw sigili senkan.
Yɛlɛma kuraw waleyali, i n’a fɔ segin kɛli kiiriko sariya ani ɲangili sariyasɛbɛn kan k’u filiw latilen, ka fara ɔridonansi dɔ tali kan minisirilajɛ la, ka bɛn poroze ŋaniya sirilen dɔ kan taabolo kɛrɛnkɛrɛnni kunkan ka ɲɛsin mazisitaraw ma, min b’a to kiiri ka se ka tigɛ ni tilennenya ye, kiiriso lasɔrɔli ka nɔgɔya ani ka jamanadenw ka hakɛw labato.
Maliden musoman an’a cɛman,
N fasodenɲɔgɔnw,
Ne bɛ Mali fasojama fo a ka muɲun na ; u kɛra kantigi ye nafoloko gɛlɛyaw n’u ta bɛɛ.
Furancɛlafanga ɲɛmɔgɔw bɛ babugubaara la walasa ka se ka yɛlɛma ɲuman don an fasodenɲɔgɔn bɛɛ ka ɲɛnamaya kɛcogo la.
O la, a ka ɲi ka hakililajigin kɛ, ko basigiko gɛlɛyaw kɔlɔlɔba b’an ka sɔrɔko kan, musaka minnu bɛ taa sɔrɔdasikow dafɛ, ka na n’olu cayali ye ka tɛmɛn cakɛda tɔ bɛɛ taw kan.
O disidakow n’u ta bɛɛ, an ka jamana selen bɛ ka foroba nafolo tɔpɔtɔ koɲuman, ka sɔngɔyɛlɛn bila hakɛ ɲuman na, bɛrɛ min ye 3% ye, a b’o jukɔrɔ.
Ka se zuluyekalo tile 31 ma san 2024, nafoloɲinincakɛdaw ka wari hakɛ sɔrɔlen sera sefawari miliyari 1 291 ma.
O waati kelen na, faso wagandenba sera, an ka marayɔrɔ la Afiriki kɔnɔ, ka sefawari miliyari 479 dalajɛ, ka gɔfɛrɛnaman ka baarakɛnafolodɛsɛ kɔsagon, baaraw musakaw caya ani mankan misɛnninw n’u ta bɛɛ, warijɛ sɔrɔli la « UEMOA » kɔnɔ.
Nin bɛɛ bɛ baarabakɛlaw ka dannaya yeereya Mali kan.
Wari minnu latɛmɛnna sigidaw ma, o hakɛ sera sefawari miliyari 440 ma san 2024 kɔnɔ ; kasɔrɔ san 2023 ta kɛra miliyari 412 ye, tɛmɛn kɛra o kan ni 6,82% ye.
Ani fana, walasa ka se ka makoɲɛfɛn kɛrɛnkɛrɛnnenw lase jamana ma a ɲɛma sɔngɔ duman na, san 2023 sɛtanburukalo tile 1lɔ ni san 2024 zuluyekalo tile 31 furancɛw la,
gɔfɛrɛnaman jɛnna wusuru sarataw hakɛ min kɔ duwaɲɛsow la, o cayara ni sefawari miliyari 274 ye, o kɛra 34,62% waleyalen y’o la o waati kɔnɔ.
Ne bɛ baara kɛbaa bɛɛ fo, minnu ye cɛsiriw kɛ nafoloko yiriwali siratigɛ la ; kɛrɛnkɛrɛnnenya la wula kɔnɔ baaraw, iziniw, jago, gɔfɛrɛnaman cakɛdaw ani bolobaaraw kɛbaaw.
Maliden musoman an’a cɛman,
N fasodenɲɔgɔnw,
San 2024, sɛnɛkɛlaw bugunnatigɛli daminɛna, ka sira di sɛnɛko kunnafoniw donni ma ɛntɛrinɛti kɔnɔ.
Tɛmɛn bɛ ka kɛ ni baraziw jɔli ye sɛnɛ kama, walasa ka se ka Bajoliba ni Sɛnɛgali Ba fila nafa bɔ.
Gɔfɛrɛnaman ye dɔ fara a ka fɛn dita hakɛ kan sɛnɛ kɛfɛnko la, ka dɔ fara kɔɔrikoloma kg1 sɔngɔ kan, ani ka ɲininni sankɔrɔta sɛnɛko la sumansi nafamaw sɔrɔli kama.
O disidakow n’u ta bɛɛ, dabaliw tigɛlen don, gɛlɛya kunbɛnni dabaliw ɲɛtaa sabatili, sariya dɔ tali sɛnɛko baarakɛlaw tɔgɔ la, ani ka sɛnɛ ni iziniko baarakɛjɛkulu sigi senkan.
O baara kɛta ninnu b’an ka yɛrɛdi seereya, ka ɲɛsin Mali ma, o min ye sɛnɛkɛjamana, muɲunnen ani yiriwalen ye.
Maliden musoman an’a cɛman,
N fasodenɲɔgɔnw,
Kɛnɛyako ni hadamadenya yiriwali nasira la, cɛsiriw kɛra walasa ka se ka kɛnɛyafɛnw lasɔrɔli nɔgɔya mɔgɔw ma, ni kɛnɛyaso kuraw jɔli ni kɔrɔlenw lakurayali ye, ka fara baarakɛminɛn caman sɔrɔli kan ka bila o yɔrɔw la.
Ani fana, baara minnu kɛra ɲɔgɔndɛmɛn ani dɛnkɛrɛfɛ kɛlɛli nasira la, olu ɲɛsinna mɔgɔw ma, degun ye minnu sɔrɔ, walima kasaara ye minnu sɔrɔ cogoya wɛrɛw la.
K’a dɔn, ko denmisɛnya jɔyɔrɔ ka bon kosɛbɛ faso dilanni na, furancɛlafanga ɲɛmɔgɔw b’u seko damajira la, min b’a to a ka kɛnɛya ka se ka sabati, k’a kalan koɲuman, ka faso kanu don a la, ani fɛn o fɛn ye yiriwali baaraw ye, a ka se k’olu kɛ, ka fara faso lafasali kan.
Kalanko nasira la, gɔfɛrɛnaman ye cɛsiri nafamabaw kɛ ni kalanso kuraw jɔli, walima kɔrɔlenw lakurayali ye kalan kun fɔlɔ n’a kun filanan na ; o la, n bɛ foli bɛ san laban kiimɛniw labɛnko ɲuman na.
Sannayɛlɛnkalanko la, hakiliɲumantigiya kalansoba dɔ jɔra « orobotiki » kama ; wa tɛmɛn bɛ kɛ n’o waleya in ye.
Sikaso sannayɛlɛnkalanso y’a ka kalanden fɔlɔw bisimila.
Baaraw bɛ sen na Gawo, Tumutu, Kayi ani Bajangara sannayɛlɛnkalansow jɔli la.
Maliden musoman an’a cɛman,
N fasodenɲɔgɔnw,
Dɔ farali hukumu kɔnɔ an ka foroba cakɛdaw fanga kan, ani ka yɛlɛma ɲuman don baara kɛtaw lasɔrɔli la mɔgɔw fɛ, san 2023 kɔnɔ, mɔgɔ 1.417 tara foroba baara la.
Ani ka ka baarakɛla kura 776 wɛrɛ ta san 2024 baarakɛnafolo sababu la.
Baaradegekalan ani baaradaw dayɛlɛli, olu fana ye furancɛlafanga haminankoba ye.
O siratigɛ la, cakɛdako fɛɛrɛ kɔnɔ Mali la, jɛn jɛra n’o min san duuru baarabolodalen ye, ka bɔ san 2025 la ka se 2029 ma. Hakilito kɛra wula kɔnɔ denmisɛnw bolo donni na baaraw la, k’a sababu kɛ poroze « FIER II » ye.
Gɔfɛrɛnaman bɛ ka baara kɛ suguya fɛɛrɛ ɲuman tigɛlen dɔ waleyali kama, min b’a to Mali musow bɛ se k’u jɔyɔrɔ fa a ɲɛma jamana hadamadenya an’a sɔrɔ yiriwali la.
Maliden musoman an’a cɛman,
N fasodenɲɔgɔnw,
Mali dipulomasi bɛ baara la kudayi, jamana nafaw lafasali kama.
Dɔ farali an n’an jɛɲɔgɔn kɛrɛnkɛrɛnnenw cɛ fanga kan, an ka sugandiliw bonya kɔnɔ, o ye sɔrɔ sira kura dayɛlɛ an ye, ani k’a to an ka se ka ye ka lasa kosɛbɛ diɲɛ fadenkɛnɛw kan.
Bi, Burukina Faso, Mali ani Nizɛri sinsinnen bɛ Afiriki kura bangeli kan, min b’a yɛrɛ kannabila, k’a kelenya dilan a yiriwali baju kuraw kan.
Sahelikungo jamanaw ka kɔnfederasɔn min sigira senkan zuluyekalo tile 06 san 2024, siga t’a la, o kɛra koba ye zewopolotiki nasira la, fo ka tɛmɛn o kan.
I n’a fɔ aw b’a dɔn cogo min na, bonya de dara ne kan n tɔɲɔgɔn jamanakuntigiw fɛ, Burukina faso jamanakuntigi Kapitɛni Ibarahimu Tarawele ani Nizɛri jamanakuntigi Zenerali Abudarahamani Tiyani, ka kɔnfederasɔn ɲɛmɔgɔya kɛ.
O bonya in bɛ kanu jira, k’an bila ka dɔ fara an ka cɛsiri kan an hakililaw sabatiliko la Afiriki ani kɔnfederasɔnko la.
Maliden musoman an’a cɛman,
N fasodenɲɔgɔnw,
Malidenw, dɔgɔkun damadɔ in na, sanjibaw kasaaraw sera dɔw ma jamana fan caman fɛ, dɔw ni tora u la ani ka bolofɛn caman tiɲɛ.
Ka da o sanjibakow kan, furancɛlafanga ɲɛmɔgɔw ye sariya ta, kasaaraw kɔlɔlɔ juguw kunbɛnni kama jamana kɔnɔ, fo ka cakɛda wuli ka jɔ kasaaraw ni gɛlɛyaw tɔpɔtɔli kama.
Dabali dɔw tigɛra walasa ka yɛlɛma ɲuman don o gɛlɛya minnu kɔlɔlɔw tɔpɔtɔcogo la, min b’a to dɔ bɛ se ka bɔ mɔgɔ degunnenw ka tɔɔrɔ la.
O siratigɛ la, ne bɛ foli kɛ ɲɔgɔndɛmɛn na jamana kɔnɔ ; o yera kosɛbɛ a yɔrɔw la.
An ka jamanadenw haminanko wɛrɛ ye kuranko ye. Walasa ka se ka fura sɔrɔ kuranko gɛlɛya la, poroze caman sennminɛna ; i n’a fɔ tile kurandisow jɔli ka dɔ fara baraziw taw fanga kan, o baaraw daminɛna, min b’a to yɛlɛma ɲuman bɛ se ka don kuran sɔrɔcogo la.
Maliden musoman an’a cɛman,
N fasodenɲɔgɔnw,
Furancɛlafanga ɲɛmɔgɔw bolo, yɛrɛmahɔrɔnyako ni jamana kelenyako, olu tɛ se ka fara ka bɔ ɲɔgɔn na. Sigikafɔba Malidenw yɛrɛ dama cɛ, o ye fasojama ŋaniya jira gɛlɛyaw furakɛli la an yɛrɛ fɛ.
Jamana ye bɛnkan min ta bɛn ni fɔkabɛnko la, o bɛna dɔ fara an ka ku-ɲɔggɔn-kan baju kan ka taa a fɛ hakililatigɛ kɔnɔ.
Ani fana, seko ni dɔnko san fila ɲɛnajɛ min sigira kenkan, o b’a la kɛ denmisɛnw ka donɲɔgɔnna an’u ka kelenya sababu ɲuman ye.
Ka tɛmɛn o kan, a jatelen bɛ k’a kɛ marayɔrɔ yiriwali poroze ɲuman ye.
Maliden musoman an’a cɛman,
N fasodenɲɔgɔnw,
Maliden musoman n’a cɛman ka faraɲɔgɔnkan de kɔnɔ, an bɛ se k’an ka laɲininw sɔrɔ yiriwaliko la.
An bɛɛ lajɛlen ka kan k’an jilaja, kalata nataw ka se ka kɛ ka ɲɛ, min b’a to an ka jamana bɛ se ka tɛmɛn ni yɛlɛma kuraw ye sɛbɛ ani yɛrɛmahɔrɔnya kɔnɔ.
Kɔrɔfɔkuncɛ la, n bɛ dugawu kɛ, Ala ka yɛrɛmahɔrɔnya sɔrɔli sanyɛlɛma 64nan seli diya Maliden musoman an’a cɛman bɛɛ la, bɛn ani ɲɔgɔndɛmɛn kɔnɔ.
Ala ka hɛrɛ kɛ Mali ye, Ala ka Malidenw lakanan !
N ka foli b’aw ye !
Dɔkala Yusufu JARA
Esɔri sɛbɛnnijɛkulu
Rédaction Lessor
Bɛnkansɛbɛn bolonɔbilalen kɔ jamana fila in cɛ Musuku, Wiladimiri Putini ni Asimi Goyita taara Kazan, « Tatarstan » lajɛ walasa ka taamasiyɛnba di Mali ŋaniya la nafoloko jɛkabaara yiriwali kama ni irisila n’a tɔndenjamanaw ye.
Bɛnkansɛbɛn bolonɔbilalen kɔ jamana fila in cɛ Musuku, Wiladimiri Putini ni Asimi Goyita taara Kazan, « Tatarstan » lajɛ walasa ka taamasiyɛnba di Mali ŋaniya la nafoloko jɛkabaara yiriwali kama ni irisila n’a tɔndenjamanaw ye.
Waatiba foroba taama in kɔnɔ Irisila : Ɲɔgɔnye Asimi Goyita ni a tɔɲɔgɔn Irisila jamanakuntigi Wiladimiri Putini cɛ. U jamanakuntigi fila ka tɛgɛdiɲɔgɔnma jɛlen kɛra Kɛrɛmulɛn bisimilaso kɔnɔ nɛgɛ kanɲɛ 16 Musuku lɛrɛ la..
Jigisigi la, dɔ farali siraw kan Mali ni Irisi cɛ, nin taama in bɛ o hukumu kɔnɔ ani jɛɲɔgɔnya bolofara cayali.
K’a daminɛ nowanburukalo nata in tile 3 la ka se a tile 27 ma, cɛ ntolantanna minnu si hakɛ tɛ san 17 bɔ (U-17), olu tɔgɔla kupudimɔni bɛna kɛ Katari. Mali bɛ ye o kɛnɛ kan. A delila ka se fo o finali ma san 2015..
Bɛn ni fɔkabɛn bɛnkansɛbɛn ɲɛbila-poroze kolabɛnkulu ɲɛmɔgɔ, minisiriɲɛmɔgɔ kɔrɔ Usumani Isufi Mayiga n’a ka cakɛda mɔgɔw, u ye gɔfɛrɛnaman minisiriw kumaɲɔgɔnya alamisa tɛmɛnnen in minisiriɲɛmɔgɔso la, wulayanfan fɛ..
