Politikitɔn min bɛ wele
tubabukan daɲɛ surun na (Codem), o ye
kojugubakɛlaw ka sɛtanburukalo tile 17 waleya jugu in kɔn. O siratigɛ la, a
b’a ka senkɔrɔmadonni jira jamana lakananbaaw la u ka wulikajɔ kɔnɔ basigi sabatili kama.
« Codem » b’a ka dɛmɛn kofɔ mɔgɔ bɔnɛnen bɛɛ ye ko in na. A ye dugawudon kɛ ka ɲɛsin
fatulenw ma, ani ka nɔgɔyada kɛ
joginnenw ye. Jamana mumɛ
lakananni an’a basigili siratigɛ la, hadamadenw
n’u bolofɛnw ka se k’u ka
taakasegin kɛ u fɛrɛ ma. A
b’a ɲinin fasojama fɛ, an k’an ɲɛmada
ani ka lakananbaaw senkɔrɔmadon. « Codem » ɲɛmɔgɔba Huseyini Amiyɔn Gindo ye foli ni tanuni lase lakananbaaw ma u ka cɛsiri la.
O cogoya kelen na, minisiriɲɛmɔgɔ kɔrɔ Musa
Mara, ni tɔn in ɲɛmɔgɔya bonya dalen don ale kan, a k’a nisɔngoyalen ye kojugubakɛlaw binni mɛn an ka
jamana yɔrɔ ɲɛnamaw
kan taratadon. A ye waleya jugu in sɛbɛkɔrɔ kɔn, ani
k’a ɲinin Maliden bɛɛ fɛ, an ja kana wuli, wa an
kana bisigi fana kɛ ka ɲɛsin mɔgɔw ma a ko la, an ka to ɲɔgɔn bolo ;
politikitɔn « Yelema » a ko
jamana in mako b’a den cɛman ni
musoman bɛɛ la, wa ko an jɛlen ka to basigi ani sesɔrɔli
baara la. Musa Mara ye foli di lakananbaaw ma u ka kɔnkoma na. O min y’an tagan kojugubakɛla ninnu masiba ma.
BƐƐ KA KANDILI - Politikitɔn min
fana tubabukan daɲɛ surun ye « Adema/PASJ)
ye, kojugubakɛlaw binni zandarama
kalanyɔrɔ kan
Falajɛ, o yɛrɛ y’o sɛbɛkɔrɔ kɔn. A ko
nin kɛra waleya ye, jɛn tɛ se ka
kɛ ni min ye ; sabula a bɛ dan kari an ka jamana basigili ani bɛn na. A ko a ka dɛmɛn bɛ ka taa lakananbaaw ma u ka wulikajɔ la jamana lakananni na, k’a tagan a juguw mantɔɔrɔ ma.
Fɔndasɔn Mohamɛdi « Sisi » bɛn ni hinɛ kama
Mali kɔnɔ, o y’a
jira ko lakananbaaw bɛ wulikajɔ la su ni tile, lakanan ani basigi bɛ se ka don an ka jamana kɔnɔ cogo
min na. A fana y’a ka senkɔrɔmadonni kofɔ lakananbaaw
ani furancɛlafanga ɲɛmɔgɔw la kojugubakɛ kɛlɛli
hukumu kɔnɔ. A b’a ɲinin mɔgɔw fɛ, u k’u hakili sigi ani ka dɔ fara u ni lakananbaaw cɛ jɛkabaara
fanga kan, min b’a to bɛn ni basigi bɛ se ka sabati.
Politikitɔn min fana tɔgɔ tubabukan daɲɛ surun ye « Nema », n’a ɲɛmɔgɔ ye Sɛki Umaru Konatɛ ye, o ye kojugubakɛlaw ka dansagonwale in sɛbɛkɔrɔ kɔn ; wa ko nin tɛna fosi bɔ jamana lakananbaaw ka wulikajɔ fanga la u kɛlɛli la, ka hadamadenw n’u bolofɛnw taakasegin nɔgɔya. «Nema bɛ lakananbaaw ka yɛrɛdi, baara kɛcogo ɲuman ani kɔnkoma foli kɛ. O mankutu ɲuman minnu kosɔn, lakananbaaw sera ka kojugubakɛla caman sɔrɔ k’o daji.
Politikitɔn « ADEPM »
n’a ɲɛmɔgɔ ye Musa Tarawele « Bill » ye, o ye
binkanni in sɛbɛkɔrɔ kɔn, ani
k’a ɲinin jamanadenw fɛ, an k’an fanga fara ɲɔgɔn kan
kojugubakɛ in kɛlɛli la. Ka
da nin waleya jugu in kan, politikitɔn in
b’a ɲinin jamana ɲɛmɔgɔw fɛ, u ka kogoninfanga sigi senkan jamana fan bɛɛ fɛ ; n’a bɛ fɔ o ma tubabukan na
« eta duruzansi ». A b’a
ɲinin fana sariyasunba sarisen 24nan ka waleya ;
n’o ye jamanaden bɛɛ ka wulikajɔ ye faso lafasali la. ADEPM ɲɛmɔgɔ-dankan Aminata Sangare fana b’a ɲinin jamana ɲɛmɔgɔw fɛ, mɔgɔ minnu y’u sigiyɔrɔw bila
ka na Bamakɔ n’u dagalen bɛ Falajɛ, u ka
yɔrɔ wɛrɛ dantigɛ k’u sigi yen, ani ka kɔlɔsilikɛkameraw sigi yɔrɔ kɛrɛnkɛrɛnnen bɛɛ la.
Nansarajɛkulu Mali kɔnɔ, o ka cidenkulu ye binkanni in kɔn, ani k’u ka dɛmɛn jira
Mali fasojama na. A ye dugawudon kɛ mɔgɔ
fatulenw ye ani ka nɔgɔyada kɛ
joginnenw ye.
Turukiye lasigiden Mali
kɔnɔ n’o ye
Efe Ceyilan ye, o y’a jira ko a ka jamana bɛ nin dansagonwale in kɔn, min kɛra
Bamakɔ sɛtanburukalo
tile 17 ; wa, k’u bɛ tɛmɛn ni
Mali gɔfɛrɛnaman an’a fasojama dɛmɛnni ye
kojugubakɛ kɛlɛli la.
Dɔkala Yusufu JARA
Namory KOUYATE
Gɔfɛrɛnaman ni sariya kura in kolabɛjɛkulu ye baaraɲɔgɔnya kɛ kunun minisiriɲɛmɔgɔso la walasa ka se ka yɛlɛma ɲuman don sɛbɛn in kɔnɔko la sanni a ka don furancɛlafanga jamanakuntigi bolo.
Fasa in bɛ wele tubabukan na «kɔnfederali». Dɔnkili ni poyi don, ka Burukina Faso, Mali ani Nizɛri fasojama foroba ni, u sigili danbew ani foroba ŋaniyaw mankutu. Dɔnkili dakun saba ani laminɛko fila don. Sinsinnan don bugunnatigɛli la ani wulikajɔlan bi ani sini bɔnsɔnw ye.
-.
