Kɔnfederasɔn ɲɛmɔgɔ Zenerali darimɛ Asimi Goyita ye AES seko ni dɔnko minisiriw bisimila kunun Kuluba. O cidenkulu ɲɛmɔgɔya tun ye Mali seko ni dɔnko, bololabaara, lotoliko ni ɲɛ daamu da ni dɔnko minisiri Mamu Dafe ye. Burukina Faso lasigiden Mali kɔnɔ Madamu Danbɛlɛ Sanu Zuliyɛni ani Nizɛri lasigiden Mali kɔnɔ Abudu Adamu, olu tun b’a kɛnɛ kan. U tun nanen bɛ AES kɔnfederasɔn fasa jira furancɛlafanga jamanakuntigi la, sɔn tun kɛra o min ma lajɛ dɔ senfɛ an ka jamana faaba la.
U ka lajɛ kuncɛlen,
Kolonɛli mazɔri Abudurahamani Amadu, Nizɛri taamako minisiri, min tun bɛ k’u ka
jamana seko ni dɔnko minisiri jɔyɔrɔ fa, o y’a jira ko AES logo (ja), an’a
darapo sɔrɔlen kɔfɛ, a fasa fana sɔrɔla. Fasa in labɛnni hukumu kɔnɔ, jamana
saba ninnu kodɔnnaw ye ɲɔgɔn sɔrɔ Bamakɔ ka hakilijakabɔ kɛ.
A laban na, bɛn kɛra fasa kan, min bɛ bɛn AES saratiw ma. A k’u nanen bɛ
fasojama tɔgɔlafɛn jira AES kɔnfederasɔn ɲɛmɔgɔ la.
Ka da furancɛlafanga jamanakuntigi ka kuma kan, Nizɛri cidenkulu ɲɛmɔgɔ y’a ka
wasa jira. A tun ɲininna nin baara in ka kɛ waati kuntaala surun kɔnɔ. Kolonɛli
mazɔri Abudurahamani Amadu ye kodɔnnaw ka baara ɲuman lakodɔn u ye ;
sabula u sera ka bɔ ni fɛn ye min bɛ fasojama kofɔ. Wa a bɛnna kɔnfederasɔn
ɲɛmɔgɔ ma.
Kolonɛli mazɔri Abudurahamani Amadu y’a jira ko fasa in bɔra dusukun na ; ka da a kan kɔnfederasɔn ye sira kɔseginbali ta. Haminan min bɛ AES la, o de ye sebaaya sɔrɔli ye. Nin fasa in bɛna galabu kura don fasojama na ka taa a fɛ.
AES seko ni dɔnko minisiriw ani Nizɛri ni Burukina Faso lasigidenw filɛ u ka lajɛ kuncɛlen jamanakuntigiso la Kuluba kunun
AES fasa n’o ye « Kɔnfederali »
ye, dɔnkili ni
poyi don, ka Burukina Faso, Mali ani Nizɛri fasojama foroba ni, u sigili danbew
ani foroba ŋaniyaw mankutu. «Kɔnfederali» ye kelenya
dɔnkili, hakilijakabɔ ani jigisigi ye saheli kungo fasojama bolo, olu minnu
farala ɲɔgɔn kan ni yɛrɛmahɔrɔnya ni yiriwali ŋaniya kelen ye. Dɔnkili
dakun saba ani laminɛko fila don. Sinsinnan don bugunnatigɛli la ani
wulikajɔlan bi ani sini bɔnsɔnw ye.
Dakun fɔlɔ b’an foroba tariku kofɔ, k’an diliw da kɛnɛ kan ani ka hakililajigin
kɛ saheli kungo hadamadenya cɛnbaw la. Dakun filanan b’an ka sisan wulikajɔw
kofɔ : yɛrɛmahɔtrɔnya sɔrɔlen kokura, basigi sinsinnen, dɔ faralen kelenya
fanga kan. Dakun sabanan bɛ wele bila AES den kelenna ma, u k’u cɛsiri
siniɲɛsigi dilanni fɛ ka sinsin baara, danbe ani ɲɔgɔndɛmɛn kan. Laminɛni fana
b’o cogo kelen in na. Ale bɛ faraɲɔgɔnkan kofɔ ka kangali kɛ, a ka waso ani
foroba cɛsiri an ka kɔnfederasɔn ka ɲɛnamaya yiriwali la.
Sanni a ka labɛn, ɲɔgɔndanba dɔ de labɛnna AES jamana saba ninnu kɔnɔ ɲɔgɔn fɛ. Wolomaniw kɛlen, kodɔnna 15 kɛra jɛkulu ye ka dalajɛra (jamana o jamana mɔgɔ 5) ka dajiraliw fɛsɛfɛsɛ, a tilennenya, a yangan an’a seko ka kɛɲɛ ni kɔnfederasɔn hakililaw ye. Fasa labɛnni donna jamana saba ninnu seko kuluw bolo ; n’o ye : « lead vocal nigérien », « direction vocale et musicale burkinabè » ani « arrangement musical malien », n’a ɲɛmɔgɔya tun bɛ Bɔnkana Mayiga bolo.
Dɔkala Yusufu JARA
Namory KOUYATE
Gɔfɛrɛnaman ni sariya kura in kolabɛjɛkulu ye baaraɲɔgɔnya kɛ kunun minisiriɲɛmɔgɔso la walasa ka se ka yɛlɛma ɲuman don sɛbɛn in kɔnɔko la sanni a ka don furancɛlafanga jamanakuntigi bolo.
-.
Kojugubakɛlaw ye dan karili min kɛ zandarama kalanyɔrɔ la Falajɛ Bamakɔ tarata tɛmɛnnen, ani pankurunjiginkɛnɛ kan, mɔgɔw b’a la k’u hakiliw di u kan. Politikitɔnw, jɛkuluw ani jɛɲɔgɔnw, u y’u kɔn ani ka Mali senkɔrɔmadon.
