Bɛn ni fɔkabɛn poroze sariya kolabɛnkulu ɲɛmɔgɔ Usumani Isufi Mayiga y’u ka baara taacogo dantigɛli kɛ gɔfɛrɛnaman na, walasa ka se k’u hakililaw sɔrɔ yɛlɛma ɲuman donni kama a cogoya la. O hakilila falen in, n’a kɛra minisiriɲɛmɔgɔso la, a ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo.
O siratigɛ la, bɛn ni fɔkabɛn poroze sariya kolabɛnkulu ɲɛmɔgɔ y’a jira ko a nakun ye ka dantigɛli kɛ baara taacogo kan gɔfɛrɛnaman na. A ko u filɛ nin ye kokura gɔfɛrɛnaman ɲɛkɔrɔ baara taacogo kan ; sabula a ka kan ka dagu zuwɛnkalo nata in tile 30 san 2025, ka kɛɲɛ ni dekere 2025-0230-PT-RM min tara awirilikalo tile 4 san 2025, o kɔnɔko ye furancɛlafanga jamanakuntigi fɛ, o min y’a ka dannaya lakuraya u kan, k’a ɲinin u fɛ segin ka kɛ baara kɛlen in kan k’a fɛsɛfɛsɛ koɲuman ka kɛɲɛ n’ale kuntilennaw ye.
Minisiriɲɛmɔgɔ kɔrɔ
seginna tɛmɛnsira dakunw kan k’u kofɔ ; kɛrɛnkɛrɛnnenya la Malidenw yɛrɛ
dama cɛ fɔkabɛn, bɛn ni fɔkabɛn ɲɛbila poroze sariya kolabɛnjɛkulu ani jɛkulu
min ɲɛsinnen b’o sariyasɛbɛn in labɛnni ma. A ka fɔ la, o dakun fɛn o fɛn na,
jamanakuntigi Zenerali darimɛ Asimi Goyita ye hakililajigin kɛ u ka ci labanni
kun kan. O de kosɔn, Usumani Isufi Mayiga ko u b’a kan a ka surun san kelen na
sa. A ko lajɛ tɛmɛnnen in, minisiriɲɛmɔgɔso la kolabɛnjɛkulu ni gɔfɛrɛnaman cɛ,
o kumakanw b’u hakili la.
O kɛra tarata feburuyekalo tile 25 tɛmɛnnen in. Wa k’o tun ye ɲɛbila poroze
labɛnni baaraw kɔmaseginni ye. K’a daminɛ o don in na, u bɛ taa ka segin na
fangabulonw, jamana jama fangamaw ani ko dɔnbaa ŋanaw cɛ hakilila kuraw sɔrɔli
kama bɛn ni fɔkabɛn poroze sariya labɛncogo ɲuman na. A ko se kɛra
kɔkanmalidenw fana ma, lasigidenw ni kɔnsulaw ka dɛmɛn kɔnɔ. Kolabɛnjɛkulu
ɲɛmɔgɔ bolo, o ye yeelen kura ye baara in na. Sariya kura in b’a la ka kolo
girinya n’o hakilila kuraw ye.
Usumani Isufi Mayiga ko a b’a to u ka se ka sɛbɛn nafama dajira jamanakuntigi la, Mali fasojama ka se ka bɛn ni fɔkabɛn sariya kura ɲuman sɔrɔ ale fɛ, hadamadenya donɲɔgɔnna ani ku-ɲɔgɔn-kan na. Ka da a kan ale bolo, sariya in bɛna hakili ɲuman di mɔgɔw ma, ka ladamuni kɛ jamanako nasira la ani ka dilanni kura kɛ hadamadenya la bɛn kɔnɔ. Nin sariya ye, Usumani Isufi Mayiga ka fɔ la, bilasiralan ye dɔ farali la bɛn, basigi, hadamadenya donɲɔgɔnna, ku-ɲɔgɔn-kan ani kelenya fanga kan.
Poroze in bakuruba
dantigɛli kɛlen kɔ, minisiriɲɛmɔgɔ ye foli ni tanuni kɛ kolabɛnkulu mɔgɔw la u
ka baara ɲuman dajiralen in kosɔn.
A k’u bɔra ka sɛbɛn in dantigɛcogo ɲuman lamɛn kolabɛnjɛkulu fɛ, ka laban ka
hakilila falenw k’a kan, yɛlɛma ɲuman donni na a cogoya la sanni k’a don
furancɛlafanga jamanakuntigi bolo. A ye nin kɔlɔsili kelen in kɛ jama
sendoncogo la baara kɛtaw la, bɛn tun kɛra o min kan nin kolabɛnkulu in fɛ.
Minisiriɲɛmɔgɔ k’a sɔnna
ko nin poroze sariya in bɛna se ka kɛ sɛbɛn nafamaba ye k’an ka jamana lase bɛn
ni fɔkabɛn ma. A ye hakililajigin kɛ, ko bɛn ni fɔkabɛn poroze sariya sababu
bɔra furancɛlafanga jamanakuntigi la, ka bɛn ni fɔkabɛn kɛ an ka jamana
basigili baju ye.
O siratigɛ la, minisiriɲɛmɔgɔ ye foli lase jamanakuntigi ma a ka hakili
ɲumantigiya an’a ka yecogo ɲuman na k’an danbew, n’o ye ku-ɲɔgɔn-kan, faso kanu
ani faso cɛnw lakananni, k’olu jɔyɔrɔ lakodɔn. A ko fana, nin poroze
sariya in ɲɛsinnen bɛ ka kow mabɛncogo ɲuman ma, ka bɛn, basigi an’an danbew
don ba la. A ye layidu ta, ko ni nin sariya in yaleyali yamaruya dira,
gɔfɛrɛnaman bɛna dabali bɛɛ sigi senkan a waleyali kama.
Dɔkala Yusufu JARA et
Namory KOUYATE
Fasa in bɛ wele tubabukan na «kɔnfederali». Dɔnkili ni poyi don, ka Burukina Faso, Mali ani Nizɛri fasojama foroba ni, u sigili danbew ani foroba ŋaniyaw mankutu. Dɔnkili dakun saba ani laminɛko fila don. Sinsinnan don bugunnatigɛli la ani wulikajɔlan bi ani sini bɔnsɔnw ye.
-.
Kojugubakɛlaw ye dan karili min kɛ zandarama kalanyɔrɔ la Falajɛ Bamakɔ tarata tɛmɛnnen, ani pankurunjiginkɛnɛ kan, mɔgɔw b’a la k’u hakiliw di u kan. Politikitɔnw, jɛkuluw ani jɛɲɔgɔnw, u y’u kɔn ani ka Mali senkɔrɔmadon.
