ka cidenw ɲɛna. Nin ko kɛrɛnkɛrɛnnen in kama, jama dalajɛra Bamakɔ lajɛkɛsoba Seyisebe
(CICB) la. Dakun nata ye jamana bɛn ni fɔkabɛn sariya poroze in latɛmɛnni ye
furancɛlafanba bulonba ma o k’a fɛla di a kan, furancɛlafanga jamanakuntigi ka
sɔrɔ k’a waleyali yamaruya di
Gintanba kɛra masalakunw kan bɛn ni ɲɛnamaya kɛli ɲɔgɔn kan o laɲinin kɔnɔ Bala
Faseke Kuyate tɔgɔla soba kalandenw fɛ Mali ɲɛnajɛkulu ka dɔnkili dumanaw kɔrɔ.
CICB sigiyɔrɔ 1000 fara tewu jama na kunun tarata. O y’a sɔrɔ tile saba kɛra
masalakunw kɔmaseginni na, lɛrɛ damadɔ nisɔndiyajira kɔfɛ a ko kelen kan,
jɛkulu kɛrɛnkɛrɛnnen min ye jamana bɛn ni fɔkabɛn sariya poroze labɛn, o y’a
ɲinin ka kow kuncɛ cogoya wasalen na, fasojama ye hakilijakabɔbaw kɛ min kan, Mali
bɛɛ wulila ka jɔ min kama kalo caman kɔnɔ.
Kɔmaseginni donw sigili zuluyekalo tile 20, 21 ani 22, o sera k’a to ciden
minnu bɔra fan caman fɛ ka se kɛnɛ in kan, u ka sɛbɛn in kɔnɔko faamuya, k’u
yɛrɛ ye a kɔnɔ ani k’a k’u yɛrɛ ta ye, hakilila wɛrɛ minnu b’u la k’o fara a
kan walasa k’a kɛ sariyasɛbɛn ɲuman ye. Baaraw kuncɛra ni jamana bɛn ni fɔkabɛn
sariya poroze dili ye furancɛlafanga jamanakuntigi ma jɛkulu kɛrɛnkɛrɛnnen
ɲɛmɔgɔ Usumani Isufi Layiga fɛ.
Sariya poroze in sinsinnen bɛ an danbew ani baara kɛtaw kan. I n’a fɔ
denmisɛn hakilimaw lawulili ɲɛtaa, minnu sɛbɛ donnen don, dɔnkotigiw, fasoden
ɲumanw, kɛtakɛlaw, faso kanunaw ani minnu kun b’u dakan kɔrɔ, jamana fanga
seginni a ma, dannaya kurayali marabaaw ni maradenw cɛ, jɛlenya kɛli an ci ye, mɔgɔ
sɛbɛya ani kɛtakɛ forobakow tɔpɔtɔli la.
Tilennenyakow, ko jugu ɲangibaliya kɛlɛli, yuruguyurugu kɛlɛli ani forobafɛn ni
faso nafolo burujali kɛlɛ, olu fana b’a kɔnɔ. A bɛ dɛmɛn don kunnafoni
kannabila sinsinni na ani ka dɔ fara kunnafonisow jɔyɔrɔ fanga kan kunnafoniw
dicogo la kɛlɛ kɔnɔ. Sɛbɛn in latɛmɛnni bulonba ma ani a waleyali yamaruya dili
Zenerali darimɛ Asimi Goyita fɛ, olu de bɛ ka makɔnɔ sa. A labɛnna ka ɲɛ, ka
sɔn a ma cidenw fɛ.
Jamana bɛn ni fɔkabɛn sariya poroze in labɛnni jɛkulu kɛrɛnkɛrɛnnen ɲɛmɔgɔ
Usumani Isufi Mayiga ye kuma ta, k’a jira ko fo ka taa min kɛ sa, Mali kunko bɛ
ɲɛnabɔ Malidenw yɛrɛ fɛ, kɔkanmɔgɔ dunan da jugu tɛ don a la. Usumani Isufi Mayiga
ka fɔ la, nin sɛbɛn min ditɔ filɛ, o ye dakunba ye, wa siga t’a la, a tɛna kɛ
faso ka sɔnni laban ye bɛn ni fɔkabɛn tɛmɛnsira la. Minisiriɲɛmɔgɔ kɔrɔ in y’a
jira ko, bɛɛ sendonni baara in na o sera k’a to an tariku ani an seko ni dɔnko
nafaw ka ta ba la, ani kɛrɛnɛrɛnnenya la u nɔrɔli kɛlɛkɛlɛ u faso la an’u
buruju la.
A ko jamana bɛn ni fɔkabɛn poroze sariya in labɛnni tɛmɛnsira kɔnɔ, bɛɛ y’a ka
tigɛnkan jira, k’u hakili kɛ kelen ye yecogo la, taabolow la, haminankow ani
siniɲɛsigi baara kɛtaw faamuyali la. Fɛn min ye sariyasɛbɛn in ye, a y’a jira
ko jama ka layidu seere don, mara bɛnkan don Mali kurako la. Usumani Isufi
Mayiga bolo, a laɲininw ye tigitigi, bɛn seginni, dɔ farali basigi fanga kan, hadamadenya
donɲɔgɔnna lakurayali ani ɲɛnamaya kɛli ɲɔgɔn kan o sinsinni, ni fɔkabɛn ye
jamana kɔnɔ. Usumani Isufi Mayiga ye foli di jamanakuntigi ma dannaya dali la
ale kan ani ko dɔnbaa ŋanaw kan jɛkulu kɛrɛnkɛrɛnnen in kɔnɔ jamana bɛn ni
fɔkabɛn sariya poroze in labɛnni kama.
FASO BƐNNEN- Kɔrɔfɔ kuncɛkuma kɔnɔ, furancɛlafanga jamanakuntigi Zenerali darimɛ Asimi Goyita y’a jira ko sɛbɛn dili ale ma, o ye wasa ye, a bɛ foroba haminanw kofɔ, a bɛ jigisigi kuntaala kofɔ bɛn na ani hadamadenya donɲɔgɔnna na. Bakurubafɔ la, fɔkabɛn an ka fasoba in kɔnɔ. Zenerali darimɛ Asimi Goyita ka fɔ la, dakun jɔnjɔn don an ka foroba laɲinin na siniɲɛsigi ɲumanko la. Nin sariya in bɛ bɛɛ sendonni kofɔ fɔkabɛn na, n’o nafa kɛra ka sinsin an danbew kan. A labanna k’a jira ko a bɛ Mali ka yɛrɛya sɔrɔlen kura kofɔ. Gɛlɛyaw n’u ta bɛɛ, sigasigaw n’u ta bɛɛ ani miiriliw kɔfɛkow la, walima gɛlɛyaw ni fɔɲɔgɔnkɔw la, waati sera, ka mankanw lamɛn, minnu tun mɛɛnna k’a sɔrɔ u ma bɔ ani ka miiri sini na cogoya ɲuman na.
Minisiriɲɛmɔgɔ kɔrɔ Usumani Isufi
Mayiga filɛ ka jamana bɛn ni fɔkabɛn sariya poroze di jamanakuntigi ma
Jamanakuntigi Goyita dalen b’a la, ko Maliden cɛman ni musoman ye cɛsiri
min kɛ nin bɛn in nɔfɛ, o ye ko ɲumanba ye ka sinsin an ŋaniya kan jamana
bɛnnen sɔrɔli la, ka ɲɛsin siɲɛ kelen yiriwali ma. A ka fɔ la, nin dakun
nafama in na an ka tariku kɔnɔ, an ka kan halibi k’an fangaw fara ɲɔgɔn kan
walasa Mali ka se ka tɛmɛn n’a yɛrɛ yiriwali ye ani ka mɛɛn si la. Zewopolitiki
gɛlɛyaw ye dadigi an ka jamana na, k’a fanga dɔgɔya, ka jamana kelenya yɛrɛ
ɲɛmanɔgɔsi jamana faralaw ŋaniya juguw fɛ ni kojugubakɛ musakali ye kɔkan
setigiba jamana dɔw fɛ. Nka, a kɛra kunnadiya ye a ka fɔ la, Mali fasojama ka
kɔlɔsili, kologɛlɛya ani hakilitigiyaw sera k’a to an ka se ka kɔrɔbɔlikow
kunbɛn ani ka ko nafamaw tagan.
Jamanakuntigi bolo, Mali fasojama b’a fɛ ka o gɛlɛyaw ni fɔɲɔgɔnkɔw dalasa
ni an yɛrɛw ka dabaliw ye. Jamana lakananbaaw ka wulikajɔw b’a la ka se ka
basigi sabatili ani ka hakilisigi kɛ jamana fan caman fɛ. Zenerali darimɛ Asimi
Goyita ka fɔ la, jamana bɛn ni fɔkabɛn sariya poroze bɛ jamana danbe jira, ka Mali
ka yɛrɛya lasegin a hakililaw kan gɛlɛyaw ni fɔɲɔgɔnkɔw dalasali la. Danfaraba
b’a ni kɔkanmɔgɔw ye fɔkabɛncogo min tintin an kun ka da u yɛrɛw ka nafaw
makaranni kan. Jamanakuntigi ko dɔwɛrɛ tɛ Mali fasojama ma, ka sɔn nin
sariyasɛbɛn nafama in na, bɛn jɔcogo ɲuman kuntaala jan kama an ka jamana kɔnɔ, walimɔgɔ si da jugu tɛ min
na.
Bɛɛ sendonni baara in na, o min ɲininna fɔkabɛn tɛmɛnsira dakun bɛɛ la, o
sera k’a to baara kɛbaaw haminankow ka ta ba la, ani ka se ka da don masalakunw
na, minnu nafa bɛ jama kan, gɔfɛrɛnaman ani jamana ka ɲɛnamaya kama.
Jamanakuntigi y’a jira ko an ka kan, yɛrɛminɛ kana k’a la, balan kana bila a la,
ka dɛmɛn don nin jigisigi kura in na, min b’a ɲinin k’an dusukunw an’an hakiliw
nɔɔrɔ ani ka fanga don Mali hadamadenya kɛcogo la ka taa a fɛ, o min sinsinnen
don mɔgɔya, ɲɔgɔndɛmɛn ani bɛn kan.
Jamanakuntigi Goyita bolo, an sera ka kɔrɔbɔliko minnu kɔsagon ɲɔgɔn fɛ,
olu ka kan ka kɛ siman ye ka dɛmɛn don an ka kelenya sɔrɔlen kalali la ka taa a
fɛ. Wa, ko sariya in ka kan fana, ka dɛmɛn don jigisigi la an ka hadamadenya ni
yiriwali politikiw makɛɲɛni na. O siratigɛ la, a ɲininnen don a ka se ka kɛ
foroba sinsinnan ye foroba politikiw ani bɛn ni fɔkabɛn fɛɛrɛw la ani foroba ko
kɛtaw la an ka siniɲɛsigi kama. Sariya in bɛna sira don an ka fangabulonw kɔrɔ,
an ka laadatigiw kɔrɔ, jɛkulu minnu tɛ politikitɔnw ye olu kɔrɔ ani fasoden
kelenna kɔrɔ Mali basilen sɔrɔliko la kelenya bɛ min kɔnɔ, Zenerali darimɛ Asimi
Goyita ka kumakuncɛ la.
Dɔkala
Yusufu JARA
Namori
KUYATE
Namory KOUYATE
Bɛn ni fɔkabɛn poroze sariya kɔmaseginni baaraw daminɛna kunun Bamakɔ lajɛkɛsoba Seyisebe la. A ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo, minisiriw tun b’a kɛnɛ kan, kɛrɛnkɛrɛnnenya la bɛn, fɔkabɛn minisiri Zenerali de kɔri darimɛ Isimay.
Gɔfɛrɛnaman ni sariya kura in kolabɛjɛkulu ye baaraɲɔgɔnya kɛ kunun minisiriɲɛmɔgɔso la walasa ka se ka yɛlɛma ɲuman don sɛbɛn in kɔnɔko la sanni a ka don furancɛlafanga jamanakuntigi bolo.
Fasa in bɛ wele tubabukan na «kɔnfederali». Dɔnkili ni poyi don, ka Burukina Faso, Mali ani Nizɛri fasojama foroba ni, u sigili danbew ani foroba ŋaniyaw mankutu. Dɔnkili dakun saba ani laminɛko fila don. Sinsinnan don bugunnatigɛli la ani wulikajɔlan bi ani sini bɔnsɔnw ye.
-.
Kojugubakɛlaw ye dan karili min kɛ zandarama kalanyɔrɔ la Falajɛ Bamakɔ tarata tɛmɛnnen, ani pankurunjiginkɛnɛ kan, mɔgɔw b’a la k’u hakiliw di u kan. Politikitɔnw, jɛkuluw ani jɛɲɔgɔnw, u y’u kɔn ani ka Mali senkɔrɔmadon.
