Taamakow ni siradilan minisiri Madamu Danbεlε
Madina Sisɔkɔ
tun ye mɔgɔ
welelen ye « Mali kura taasira 2 » jεmukan kεnε kan ORTM na. O kumaɲɔgɔnya
kɔnɔ,
a ye baara kεlenw ani minnu bε sen na, u dantigε, ka sɔrɔ
ka siniɲεsigiko bolodalenw
kofɔ, ani ka dɔ fɔ a
ka minisiriso in gεlεyaw fana na.
Minisiri ka fɔ
la, taamakow ni siradilan minisiriso ye baara minnu waleya, o dɔ
ye tεrεnko cakεda wulili Bamakɔ
ni Kayi cε zuluyekalo tile 23 tεmεnnen in. Malidenw tun sigilen bε k’o waleya
in makɔnɔ
kosεbε, min b’a to tεrεnsira bε tεmεn marayɔrɔ
minnu fε, u nafoloko ka sira ɲuman
ta.
Madamu Danbεlε Madina Sisɔkɔ
y’a jira ko baara gonin dɔw tun bolodalen bε taamakow ni siradilan minisiriso
bolo ; i n’a fɔ tεrεngarεw lakurayali Bamakɔ ni Kayi cε,
Mahina, Galugu ani Tukɔtɔ pɔnw
lakurayali. Tεrεnkunkolo fila, taamadenw bε don wagɔn
minnu kɔnɔ,
ani kuranbara, olu labεnna. Tεrεnsira in yεrε de kɔrɔla ;
Mali tεrεnko cakεda sigira senkan kabini tubabu tile la.
Taamadenw bε ta tεrεn min na, o ye sira bila
nowanburukalo tεmεnnen in tile 24 ka surunya Mahina na ni km9 ɲɔgɔnna
ye, k’a sababu kε arayinεgε dɔ
karili ye. Tεrεnsira yɔrɔ
jugubaw tun labεnna a ɲεfε ;
nka a bεε ma lakuraya a ɲεma.
Nafaba dun bε tεrεn na Mali bilali la kɔgɔjida
la Sεnεgali fε. Bamakɔ
ni Kayi cε dɔrɔn
de tun lakurayara. Walasa ka se fo Sεnεgali, a ɲuman
ye ka Kayi ni Sεnεgali fana cε lakuraya.
Kumaɲɔgɔyaw
kεra ni Irisijamana ye tεrεnko la, min b’a to tεrεnsira kura ka dilan ani ka
tεrεnkunkolo kuraw sɔrɔ. Tεrεnko
wulili ma se ka taa ɲε
i n’a fɔ a ŋaniyara
cogo min na ; ka da a kan, tεrεnkunkolo min tun bε yen, o tiɲεna,
tεrεnsira fana dilanni bε sen na.
Madamu Danbεlε Madina Sisɔkɔ ko
dabali bε ka tigε taamako kunnafoni bεε donni na εntεrinεti kɔnɔ.
San 2024 in kɔnɔ, poroze
nafama kura caman bolodalen don taama nɔgɔyaliko
la. Pεrimi biyometiriki, εntεrinεko donni taamako kɔnɔ
walasa ka se ka caman bɔ
sonyani ni namara la. Fεn min ye jikantaama ye, o bε kε samiyε ni samiyε Kulukɔrɔ
ni Gawo cε Bajoliba kan. Kojugubakεlaw ye dan karili min kε baton
« Tumutu » la ka mɔgɔ
caman bɔnε a ni na
sεtanburukalo tile 7 san 2023, o ye jikantaama lajɔ
fɔlɔ.
Fεn min ye dugubaw kɔnɔ
taamako ye, bεnkan kεra ni Irisijamana ye dugu kɔnɔ
tεrεnsira fila dilanniko la. Sira fɔlɔ
ye ka bɔ Sanankɔrɔba
ka se Kati ; filanan ye ka bɔ
Wεzεndugu ka se Moribabugu. Fεn min ye pankurunko ye, faso tɔgɔla
pankurunko cakεda bεna sigi senkan. Sabula pankurunjiginkεnε ka ca Mali kɔnɔ.
Pankurunw bεna mununmununsaalow kε Mali kɔnɔ
ani Mali ni kɔkanjamanaw
cε Afiriki kɔnɔ. Nka
sinsin kεra marayɔrɔw
cε pankurunko kan kosεbε nafako la ; Afiriki marayɔrɔ tɔw
taw bε da o kan. O siratigε la, a bε ɲinin
mɔgɔw
fε, minnu sigilen bε pankurunjiginkεnε koorilamini kɔnɔ,
u ka yɔrɔ
bila a tuma na sanni kεnε mɔɔnɔbɔli
baaraw ka daminε.
Sirako nasira la, minisiri y’a jira, ko sigidaw sɔgɔli
ka bila ɲɔgɔn
na, o ye taamakow ni siradilan minisiriso haminankoba ye. « Turudafiriki »
ni Yirimajɔ cε dilanni ka
tugu Misabugu pɔn
na, n’o ye Bamakɔ pɔn
3nan ye, o kεra o hukumu kɔnɔ, Sikaso
dugu kɔnɔ
sira dilanni ani Katile-Kajolo-Zeguwa sira fana dilanna o hukumu kelen kɔnɔ. Ka
fara gitɔrɔn
dali kan kin dɔw
kɔnɔ,
minnu farala Bamakɔ faaba kan.
Siraba caman fana lakurayali baaraw bε sen na.
Dɔ
farali jibolisira dɔw
bonya kan ani ka dɔw
geren k’u bɔ yɔrɔ
wεrεw fε, o baaraw bolodalen don. Kɔlɔsili
la, yεlεma caman donna sirako cogoya la san damadɔ
in na ; wa taa bε k’o cogo la, min b’a to siraw bε se ka boli san mumε kɔnɔ
lafiya la.
Siniɲεsigikow
nasira la, Sewarε-Moti sira dilanni b’o la, ka taa a bila fo pankurunjiginkεnε
na, ka laban ka siraba km5 labεn Sewarε kɔnɔ.
San 2023 kɔnɔ,
Banankɔrɔ-Joron
sira dilanni daminεna. O furancε in ye km45 ye, Kayi-Jεma furancε dilanni ani
Kati-Jijεnin furancε, o dilanni bε sen na. Segu mara kɔnɔ, baaraw
bε sen na mɔgɔw
ka se k’u to Segu ka Moti lasɔrɔ nɔgɔya
la. Sɔrɔbaw
bε kε dugu minnu na, dabaliw bε sen na ka sira ɲumanw
dilan olu lasɔrɔli
la.
Minisiri Madamu Danbεlε Madina Sisɔkɔ
ka fɔ la, gεlεya
min bε poroze ninnu waleyali la, o 82% bε mɔgɔ
kunda. A bε ɲinin
siraw bolibaaw fε, u ka siraba sariya labato. Minnu fana sigilen siraw kan ani
ka gεrε siradaw la kojugu, u k’u mabɔ baaraw
ka se ka waleya a ɲεma joona.
Gεlεya fanba ye wari sɔrɔli
ye ka poroze ninnu waleya ; ka da a kan u musaka ka ca kosεbε, (Malitel,
Orange Mali, Somagep, Somapep...) o cakεda ninnu ye gεlεya dɔ
ye ; sabula olu ka telefɔnisiraw
ni worobinεtiyow bε yɔrɔ
caman na. Siradilan baaraw tε se ka ɲε
sɔrɔ ni
se ma k’olu ma.
Fatumata Mori SIDIBE
Dɔkala Yusufu JARA
Dɔkala Yusufu Jara
Ciden minnu bε Malidenw yεrε dama cε sigikafɔba kεnε kan, u y’a ŋaniya kumaɲɔgɔnya sigikafɔ in da ka yεlε kojugubakεlaw ye, ka silamεdiinε dungew don an n’u cε kɔrɔfɔw la. U y’a ɲinin fana, ko ka kuranko gεlεya furakε joona walasa hakilisigi ka na mɔgɔw la.
Faso tɔgɔla sigikafɔba min daminεnen filε, o bεna kε sababu ye Malidenw ka kumaɲɔgɔnyaw kε u ni ɲɔgɔn cε ka furaw dajira gεlεya kofɔlenw na. A ka kan ka se ka hadamadenya juru caanin an cε, ka dɔ fara ku-ɲɔgɔn-kan fanga kan ani ka na ni bεn kutaala jan ye..
Furancεlafanga jamanakuntigi Kolonεli Asimi Goyita ye laseli kε tarata awirilikalo tile 30 san 2024, ko gɔfεrεnaman bε sεnε kεfεn minnu di, tεmεn bε kε n’o ye. O siratigε la, angεrε (ire) kg50 bɔrε ye sefawari dɔrɔmε ba fila ani kεmε seegin (d2 800) ye, farafinnɔgɔ kg50 .
San o san mεkalo tile 1lɔ ye baarakεlaw tɔgɔladon ye diɲε kɔnɔ. O hukumu kɔnɔ, Mali baarakεlaw lafasatɔn minnu bε UNTM jεkuluba kɔnɔ, olu ye yεrεjirataama kε jamana ka yεrεmahɔrɔnya kεnεba kan. A kεra kεnε ye, min kɔrɔfɔw bolila hadamadenya basigili ni ɲεtaa laɲini.
Mali sɔrɔdasiw ye kojugubakεla Hugo faga Indelimani kεlεdaga la Gawo mara la. Kabini Mali y’a ŋaniya k’a mεru don Irisijamana na sɔrɔdasiko nasira la, an ka lakananbaaw b’a la ka sebaayaw sɔrɔ dɔrɔn kojugubakεlaw kan..
UNTM biro kura mɔgɔ ye 53 ye. U ye lahidu ta, ko furakεcogo ani laɲinin minu kεra a ka sigikafɔw senfε, olu bεna kε sisinnan ye sarati kura in kɔnɔ.