Lafasali : UNTM bε ka nɔnabila labεn

Kalan min kεra, a masalakun tun ye : «faso tɔgɔla denmisεn baarakεlaw ka komite bεna se ka biro ka baara kε ka ɲε i n’a fɔ UNTM b’a kε cogo min na wa ? Baara ɲεmɔgɔya tun bε UNTM ɲεmɔgɔba Yakuba Katile bolo. Faso tɔgɔla denmsiεn baarakεlaw ka komite ɲεmɔgɔ Mamadu B. Jakite tun b’a kεrεfε, ka fara tɔnden caman wεrεw kan. 

Yakuba Katile ye hakililajigin kε baara kεtaw kan kalan in sigili la senkan. Fεn min bε kɔlɔsi sisan fɔlɔ, o ye denmisεnw kεbaliya ye ka lafasali kεcogo kalanw sɔrɔ. Wa lafasali tε taa ko kεrεnkεrεnnen minnu kɔ, olu dɔnniya t’u la. O de ye gεlεya ye lafasalitɔn caman kɔnɔ. A labanna k’a jira, ko UNTM wajibiyara ka gεlεya caman furakε, minnu yεrε tun man kan ka kε a sendonko ye. O kɔfε UNTM sekeretεri zenerali y’a ka nisɔndiya jira lafasalitɔn denmisεnw kalanni na ; sabula k’o bε mɔgɔ kɔrɔw nɔnabilali nɔgɔya.

Yakuba Katile ka fɔ la, ni mɔgɔ sugandira ka kε lafasalikεla ye, doniba dara i kun. A b’i jεn fεn caman kɔ. A tε ɲε n'i m’a kalan kε, ka faamuyali kε, ka dusu ta ani ka baara kε kasɔrɔ i ma fεn bisigiya a kεli kunkɔrɔ. « CNJT » ɲεmɔgɔ ye foli lase UNTM sekeretεri zenerali ma a ka cεsiri la denmisεnw ka biro sigili la senkan. A y’a jira k’o sigikun tε dɔwεrε ye ka dɔ fara denmisεnw ka baara kεcogo ɲuman kan u ka lafasalitɔn kɔnɔ.

A bε dabɔ ka lafaamuyali kε lafasali kεcogo ɲuman kan, k’u labεn ka bila baarakεlaw lafasali kama ani ka denmisεnw kalan lafasali kεcogo ɲuman na u ka se k’u jɔyɔrɔ fa a ɲεma jamana yiriwali la, k’a sababu kε lafasalitɔn ye. O kεra dɔgɔkun tεmεnnen in kalan kun ye, ka « CNJT/UNTM » biro mɔgɔw ladɔnniya.

Mamadu B. Jakite y’a jira fana, ko kalan in musaka bɔbaa kεra u yεrε ka biro mɔgɔw ye. Kalanw bolila fεn minnu kan, o ye lafasali tɔndenya, « CNJ ni UNTM » sariyaw dɔnnakarili, diɲε baarako taabolobaw dɔnnakarili, sira minnu bε mɔgɔw cε baarako nasira la gɔfεrεnaman kunda ani kεnyεrεye kunda o sidɔnni. A kalansen dɔ fana kεra lajε kεcogo ɲuman tεmεnsiraw dɔnni, jεkabaara kεcogo dɔnni, hadamaden yiriwali ani jamaɲεmɔgɔya faamuyako ɲuman, ani kεrεnkεrεnnenya la, lafasalikεla ŋanaw ka dɔnniyaw falenni ɲɔgɔn cε.     

Cεjε DUNBIYA

Dɔkala Yusufu JARA