Lajɛ in tun ɲɛsinnen bɛ kunnafonidi ma ka ɲɛsin jamana wɛrɛ lasigidenw ma minnu b’an fɛ yan Mali kɔnɔ. Diɲɛ tɔnba minnu b’an fɛ yan, olu ka cidenw fana tun welelen don a kɛnɛ kan, ka fara Mali gɔfɛrɛnaman minisiri damadɔ kan : mara ni desantaralizasɔn minisiri, Kolonɛli Abudulayi Mayiga, Kɛlɛbolow ni sɔrɔdasi kɔrɔw ka minisiri Kolonɛli Sajo Kamara ani kunnafoniko minisiri, Alihamudu Agi IlIYƐNI.
Lajba in kuntilennaw tun ye hakilifalenfalenw ye ka ɲɛsin MINUSIMA taaliko ma ka bɔ Mali kɔnɔ, i n’a diɲɛ Tɔnba ONI/ONU tun ye boloda cogo min, ka kɛɲɛ n’a ka sariya N° 2690 ye. Kidali bilama fana ye lajɛ in dakunba dɔ ye.
MINUSIMA ka Mali bilaliko bɛ loosolaasa la, kasɔrɔ furuncɛlafanga ɲɛmɔgɔw sigilen b’a kan ko san 2023 desanburukalo 31 man kan ka majɛ abada.Wa MINUSIMA dagayɔrɔ kɔrɔw, olu ka kan ka latɛmɛ Mali sɔrɔdasiw ma u taalen kɔ.
Bɛn kɛra min kan, o ye k’a fɔ ko MINUSIMA taali ka kan ka ɲɛmajɔ, k’a lakana ani k’a kow bolo don ɲɔgɔn bolo koɲuman, bɛnbaliya fosi kana bɔ a la.
Minisiri JƆPU y’a da diɲɛ Mɔgɔba welelen ninnu tulo kan, u ka kɛ seere ye, k’a dɔn ko kow bolodara cogo min wa u tɛ ka ɲɛnabɔ o cogoya la dɛ, wa Mali dun b’a fɛ a ka dugukolo fan tan ni naani ka kɛ a ta ye sanni kalataw ka daminɛ. MINUSIMA dagayɔrɔw fana ka latɛmɛ Mali finitigiw ma.
Kɛlɛbolo minnu bɛ ka Mali kɛlɛ ani terorisiw n’olu ye kojugibakɛlaw ye, olu wulilen bɛ ko fo u ka u niyɔrɔ sɔrɔ nin ko ninnu na. O de y’u ka wulikajɔw bonya tile fila in na ka ɲɛsin Mali sɔrɔdasiw ma ani ka ɲɛsin Mali jamanaden gansanw ma. U m’o jɔjugu ɲɔgɔn fila fili ji la fɔlɔ, Minisiri JƆPU ka fɔ la.
Jɛkulu kɛrɛnkɛrɛnnen min sigira senkan MINUSIMA ka taali labɛnni kama, tiɲɛ na, o y’a baara kɛ, o de y’a to ni baara kun fɔlɔw ɲɛna. Nk’a a ko selen Kidali dakun na, baaraw kɛra birisaɲaami ye. Mali sɔrɔdasiw dagayɔrɔ minɛnen don banbaganciw fɛ. MINUSIMA ka kan k’a dagayɔrɔ min labila ni Mali sɔrɔdasiw ka kan k’o yɔrɔ minɛ, banbaganciw ɲɛ b’o la. O baara in dun tɛ baara nɔgɔn ye. Mali sɔrɔdasiw ka kan ka MINUSIMA sɔrɔdsiw ka bɔli kɔlɔsi. U ka maramafɛn juguw labɔcogo k’o kɔlɔsi, minnu tɛ makoɲɛ, olu ka kan ka latiɲɛ kɛnɛ kan bɛɛ ɲɛna. Kɛlɛkɛmɔbiliw n’u ɲɔgɔnnaw, olu labɔli n’u taayɔrɔ, o bɛɛ ka kan ka kɔlɔsi Mali sɔrɔdasiw fɛ, ONI/ONU ka sariya 2690 in ka fɔ la. Nin si ma sirasɔrɔ fɔlɔ.
Mali sɔrɔdasiw kundalen bɛ Kidali kan nka u ma don fɔlɔ. Kow ɲagaminen bɛ cogo min, mɔgɔ t’a dɔn a bɛna ɲɛnabɔ cogo min wa jɔn bɛn’a ɲɛnabɔ fana ? Abudulayi JƆPU ye nin bɛɛ ɲɛfɔ diɲɛ mɔgɔba welelenw ye lajɛba in kɛnɛ kan.
Kidaliko in bɛ cogo min na bi, Ala ka ji suma bɔn a kan. N’o tɛ, n’a ma ɲɛ min kɔ, a n’a kɛ o ye. Ala k’a kisi o ma.
Namori Kuyatɛ, Mahamadu Kɔnta
Dɔkala Yusufu Jara
Femme de Siby.
Coupe UEFOA U17.
Coupe UEFOA.
Coupe de la confédération.
Pénurie de carburant au Mali.
Conseil des ministres.
