O siratigɛ la, kalo tɛmɛnnen in kɔnɔ, basigi sabatili hukumu kɔnɔ, Mali sɔrɔdasiw ye bɔko 22 kɛ koɲɛɲininw na kojugubakɛlaw kan, kojugubakɛlaw ye binko duuru kɛ u fana kan, ka binko wolonwula kɛ sigidalamɔgɔ gansan siwiliw kan. U ye mugu jugu donko 16 kɛ dugu jukɔrɔ siraw kan ani ka pɔn kelen tiɲɛ. Nka Mali sɔrɔdasiw ka galabu kɛnɛya sera k’a to u ka se ka kojugubakɛla tan sigiyɔrɔ caman sɔrɔ k’u daji, ka dɔw ɲɛnama minɛ ani ka kɛlɛminɛn, bolifɛnw ani kunnafonidiminɛn caman fana sɔrɔ u kɔ.
Sanfɛsɔrɔdasiw ni dugumataw fangaw farali ɲɔgɔn kan, o sera k’a to nin jaabi ɲuman ninnu ka sɔrɔ ; o misali dɔ ye kojugubakɛ ɲɛmɔgɔ caman fagali ye Tinizawatɛni, Kidali mara la desanburukalo tile 1lɔ san 2024 tɛmɛnnen in sɔgɔma joona fɛ. N’o ye Sogibu Agi Atahari, Alibaraka Agi Alifaki, Musa Agi Bayi Dikinani, Basara Agi Ahamɛdi, Fahadi Agi Alimahamudu, Mohamɛdi Agi Aserifu n’a bɛ wele Mafiki, Sidi Agi Bayi. Ninnu bɛɛ ye kojugubakɛwalew kɛ. U ye siwiliw faga ka yɔrɔw tiɲɛ jamana fan caman fɛ. Misali la u ye ngaran da Mali sɔrɔdasiw la Bɛri san 2023 utikalo kɔnɔ, ka bin baton « Tumutu » kan san 2023 sɛtanburukalo tile 7, ka bin Lere sɔrɔdasikan kan sɛtanburukalo tile 17 san 2023.
Nin kunnafoni ninnu lasera tarata tɛmɛnnen in, Mali sɔrɔdasiw ɲɛmɔgɔso ka kunnafoniko cakɛda « Dirpa » ɲɛmɔgɔ Kolonɛli-mazɔri Suleyimani Danbɛlɛ fɛ kalo laadalakunnafonidi senfɛ. A ka fɔ la, caman bɔra kojugubakɛlaw ka binkanni hakɛ la ka ɲɛsin Mali sɔrɔdasiw ma, nka dɔ fara mugu jugu donni fanga kan ka tɛmɛn kalo tɛmɛnnen in kan ; sabula u bɛ k’u jigi kɛ mugu juguko sa, u ka dɛsɛ kɔnɔnan na.
Kolonɛli-mazɔri Suleyimani Danbɛlɛ ka laseli la, kojugubakɛlaw ka nin fugariyako ninnu tɛna fosi bɔ jamana lakananbaaw ka wulikajɔ fanga la sigidalamɔgɔw n’u bolofɛnw lakananni na jamana dugukolo fan bɛɛ fɛ. A sɔrɔla k’a ɲinin Mali sɔrɔdasiw fɛ, halibi u ka to ɲɛmadali la balanakow kunbɛnni kama.
Fɛn min ye kojugubakɛla ɲɛmɔgɔw fagali ye Mali ni Alizeri dancɛ la, « Dirpa » ɲɛmɔgɔ ye foli ni tanuni kɛ sɔrɔdasiw ka kunnafoniko tigilamɔgɔw la baara ɲɛni kosɔn. A sera k’a to u ka bɔ kojugubakɛ ɲɛmɔgɔw ka lajɛ in kalama k’u daji o kɛnɛ kan, k’u ka baaraw mabɛnni gili tigɛ. O ni bi cɛ caman bɔlen bɛ u ka dansagonwalew la.
Kojugubakɛla minnu ɲɛmana minɛna, Kolonɛli-mazɔri ye hakililajigin kɛ, ko nowanburukalo tile 17 ni 18 san 2024, Mali sɔrɔdasiw ye siganamɔgɔ wɔɔrɔ minɛ, minnu ye kɛnɛ furan ka bila kojugubakɛlaw ɲɛ u ye binni min kɛ Bamakɔ kan sɛtanburukalo tile 17 san 2024. O de y’u donni nɔgɔya Bamakɔ k’u daga yɔrɔ dɔw la ka jetminɛw kɛ u ka kan ka dan kari yɔrɔ kɛrɛnkɛrɛnnen minnu na. Dɛmɛnbaa ninnu ye bolifɛnw bila u ka bolo kan fana. U nana u daga an cɛla k’u yɛrɛ k’an dɔ ye ka sɔrɔ ka dan kari an na u sagolawaati la. O de la, a ɲuman ye ɲɛmadali ka kɛ kosɛbɛ.
Dɔkala Yusufu JARA
Abubakari TARAWELE
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
