Basikεti kupudimali : Sitadimaliyεn ye sebaaya fila sɔrɔ

San fooricogo ɲεna Sitadimaliyεn bolo. Sibiridon ɔkutɔburukalo tile 28 san 2023 Salamatu Mayiga tɔgɔla farikoloɲεnajεkεnε na, Sitadimaliyεn cεmanninw an’a musomanninw ye basikεti kupudimali ta, ŋanaya sɔrɔlen kɔfε. A musomanninw ye Joliba taw gosi 74 ni 60. Jεnεba Sangare kelen ye kuru 17 don, ka kε kupu in kurudonna ŋana ye. Sitadimaliyεn cεmanninw fana y’u wasa don Ereyali taw la 78 ni 65.

Kasɔrɔ Joliba tun b’a la k’a firifiri kosεbε kow daminε na. O tako fɔlɔ kuncεra Joliba ka sebaaya la 13 ni 11. Nka Sitadimaliyεn labanna ka sira tunun u la o kɔfε, k’a sababu kε Jεnεba Sangare, Elizabεti Kamite Dabo ani Fatumata Tarawele ka wulikajɔw fanga bonya ye, ka yεlεma don kow la. Sitadimaliyεn ye kuru 22 sɔrɔ ka Joliba to kuru 13 la. Sεgεnnafiɲεbɔ y’a sɔrɔ Sitadimaliyεn ka 33 Joliba ka 26.

O kɔfε Jεnεba Sangare y’a ka kuru hakε dafa 17 la, Elizabεti Kamite dabo y’a ta dafa 14 na. Joliba dɔnko bεε banna. Tulon da tora u la 74 ni60.  Sitadimaliyεn degelikaramɔgɔ Sori Jakite y’a ka nisɔndiya jira kεnε kan. A k’u ka san laɲinin sabatira : n’o ye ŋanaya ani kupudimali sɔrɔli ye. A ye foli ni tanuni lase a ka musomanninw ma.

Joliba degelikaramɔgɔ Musa Jibi Dawu jɔra a gosili kɔrɔ, ka foli di Sitadimaliyεn mɔgɔw ma u ka sebaaya la. A labanna k’a ka mosomanninw fo u ka cεsiri la ; ko don bεε ŋana si man ca. A k’u wulicogo tun ɲεna, nka kow labancogo de ma ɲε u bolo.

Musomanniw tilalen ɲɔgɔn na, a da sera cεmanninw ma. Sitadimaliyεn cεmannin ŋanaw ni Ereyali cεmanninw ye ɲɔgɔn sɔrɔ. O kow daminεna fana na, Ereyali tun bε ɲεfε 17 ni 15 ani 35 ni 33 ; nka sεgεnnafiɲεbɔ kɔfε, Sitadimaliyεn yεlεmana u kan : 52 ni 42 ani 78 ni 65. Tulon kuncεra o kan Sitadimaliyεn ka sebaaya la.

Kaba Kantε min ye Sitadimaliyεn degelikaramɔɔ ye, a ye foli ni tanuni lase a ka cεdenw ma kupu fila sɔrɔli la san kelen kɔnɔ. Ereyali kεra jɔyɔrɔ 4nan ye ŋanaɲinin na. A labanna k’a fasa fili ka se kupudimali finali ma. O b’a jira k’u ka degelikaramɔgɔ Zumana Kulubali ka kan ka fo. Mɔgɔ dan de y’i garijεgε ye.

Sitadimaliyεn musomanninw an’a cεmanninw ka tɔn kelenna jansanna ni sefawari miliyɔn fila ye, ka Joliba ni Ereyali taw jansan ni miliyɔn kelen-kelen ye. Finali fila in ɲεmɔgɔya tun bε denmisεnya ni farikoloɲεmɔgɔ minisiri Abudulu Kasimu Ibarahimu Fɔnba ka ɲεsin fasoden ɲuman dilanni fasodenya kalan ma, ale bolo. Mali basikεtiko tɔnba (FMBB) ɲεmɔgɔba Mεtiri Zankulodi Sidibe tun b’a kεnε kan.

San 2022-2023 janjo kuncεra ni Sitadimaliyεn ka tɔn fila ka sebaaya ye. N’o ye Mali ŋanaya an’a kupudimali sɔrɔli ye. Labεnw de bεna kε sa, ka san 2023-2024 janjow makɔnɔ. 

Bubakari CƐRƆ

Dɔkala Yusufu JARA