Sibiri marisikalo tile 08. Nɛgɛ kanɲɛ 9 tun sera minisiriɲɛmɔgɔ Zenerali de diwisɔn Abudulayi Mayiga n’a nɔfɛjama bɛ se Kucala donda la tuma min na. Kabini dugu donda la, cɛ, muso, denmisɛn ni maakɔrɔ, jama de tun bɔra ka dugu bɔlɔnw minɛ, ka dugu fa i ko dakɔnɔ ɲin u nisɔndiyabaatɔ ka kunbɛnni kɛ. Daaladalafɔliw n’u dɔnkili kɔrɔ dumanw tun bɛ Kucalakaw ka sewa jira nin ko in na. Minisiriɲɛmɔgɔ n’a nɔfɛjama tora jama cɛ la ka taa, bandiriw ni Mali darapow b’u bolo k’o yanga, foliw bɛ sen na. Tɛgɛrɛ mankan ni kulekan nisɔndiya bolo, dan ma k’o la. Nin waleyaw bɛ an danbe kofɔ ɲɔgɔndɛmɛn ni cɛ ni muso damakɛɲɛni kɔnɔ, ani fanga lakodɔnni hakililaw ɲɛtaa kɔnɔ. Jamadalajɛ kɛra farikoloɲɛnajɛkɛyɔrɔ la Hamudalayi ɲɛnajɛ kɔnɔ. Kucala mara ɲɛmɔgɔw tun bɛ yen ka minisiriɲɛmɔgɔ n’a nɔfɛjama bisimila, kɛrɛnkɛrɛnnenya la muso ni den ni denba ɲɛtaa minisiri Madamu Jara Jɛnɛba Sanɔgɔ, wulikajɔw koɲɛw b’o minisirisiriso min bolo. Muso ni den ni denbaya minisiriso ɲɛsinnen bɛ musow ka hakɛw lafasali ma ani cɛ ni muso damakɛɲɛni waleyaw. K’a faranfasiya, ko musow tɔgɔladon diɲɛ kɔnɔ, o ɲinannama masalakun ye : «ka musow ni musomanninw ka senyɛrɛkɔrɔ sennateliya, o ye yiriwali kuntaala jan sabatilan ye. Lajɛ in daminɛ na, Kucala Mɛri wasalenba ye foli ni tanuni kɛ donba in laɲɛnamayali la u bara, ani ɲɛtaa minnu sɔrɔlen bɛ musow ka hakɛw labatoli la Kucala mara kɔnɔ, a ye hakililajigin k’olu la. Diɲɛ tɔnba ONU ka baaraw mabɛnbaa ka ciden Yakuba Dunbiya ye gɔfɛrɛnaman ni dɛmɛnbaaw ka hakilila ɲuman talenw nafa jira musow ni musomanninw ka hɛrɛko la an ka jamana kɔnɔ. Mali musow ka tɔnba « Kafo » ɲɛmɔgɔba Madamu Kuyate Gindo Sisɔkɔ ye hakililajigin kɛ a ka kɔrɔfɔ kɔnɔ, ka yɛlɛma kura dɔw kofɔ, minnu ye sinsinnanw ye musow ni musomanninw ka senyɛrɛkɔrɔ sennateliyali la. I n’a fɔ san 2023 zuluyekalo tile 22 sariyasunba, o min bɛ hadamadenw ka hakɛw kofɔ ani damakɛɲɛni. Kalata sariya kura fana y’a yɛlɛma kura dɔ ye. Ale bɛ musow sendonni fanga bonya jɔyɔrɔw ɲininni na bɛnkantakuluw kɔnɔ. A y’a ka nisɔndiya jira kiiri sariya an’a tɛmɛnsira sariya kura talen na. A bɛɛ bɛ musow ni musomanninw ka hakɛw lafasali kofɔ. Madamu Kuyate Gindo Sisɔkɔ k’o yɛlɛma kuraw bɛnna musow ma kosɛbɛ. A k’u bɛ jamana ɲɛmɔgɔw ka kandili jira musow ka hakɛw ɲɛtaa la. JIGISIGI NI KANDILI CIKAN- Kɔrɔfɔ min ye jama tɔnsi wuli ka jɔ kosɛbɛ kɛnɛ in kan, o kɛra muso ni den ni denbaya ɲɛtaa minisiri ta ye. Madamu Jara Jɛnɛba Sanɔgɔ da sera disidakow ma, minnu ka kan ka kɛlɛ ka bɔ cɛ ni muso damakɛɲɛni ɲɛ, min b’a to politiki minnu sigira senkan gɔfɛrɛnaman fɛ, olu nafa ka ye. A ko gɔfɛrɛnaman bɛna tɛmɛn ni musow ka hɛrɛ sɔrɔli wulikajɔw ye. A ye jɛkabaara ɲuman fana kofɔ baara kɛbaaw ni ɲɔgɔn cɛ gɔfɛrɛnaman kunda ani jɛkulu minnu tɛ politikitɔnw ye. Minisiriɲɛmɔgɔ ye jigisigi kuma fɔ a ka kɔrɔfɔ kɔnɔ. Zenerali de diwisɔn Abudulayi Mayiga ye hakililajigin kɛ donba in nafa kan. A ko ɲɛnajɛ don don, wa ko hakilijakabɔ don fana don sira taamata tɔ kunkan, min b’a to musow ka hakɛko bɛ se ka kɛ tiɲɛ ye an ka jamana fan bɛɛ fɛ. Musow ka hakɛ don kɛrɛnkɛrɛnnen diɲɛ kɔnɔ, Mali y’a ta yɛlɛma marayɔrɔ wɛrɛ la min tɛ Bamakɔ ye. Ɲinanta kɛra Kucala, minisiriɲɛmɔgɔ y’o waleya in foli kɛ. A k’o bɛ jamanakuntigi Goyita ka kandi kofɔ wula kɔnɔ musow fanfɛ, an baw, an furumusow an’an balimamuso farinw, k’u ka wale ɲumanw lakodɔn u ye jamana yiriwaliko la. Minisiriɲɛmɔgɔ bolo, Kucala bɛ muɲun ni sabali ani kandili kofɔ an ka jamana kɔnɔ musow ka hakɛw ɲɛtaa la. A ka fɔ la, furancɛlafanga ɲɛmɔgɔw dalen b’a la, ko fosi tɛ se ka kologɛlɛya ka mɛɛn si la musow kɔ dilanni na. O de kosɔn u b’an danbe laseginni, ku-ɲɔgɔn-kan an’an ka yɛrɛmahɔrɔnya sɔrɔlen sira daminɛ, a cɛmanɛ an’a laban na. O la, kabini furancɛlafanga daminɛna, musow yera a lajɛ bɛɛ kɛnɛ kan k’u hakililaw jira. A kɛra sigikafɔbaw ye o, a kɛra malidenw yɛrɛ dama cɛ fɔkabɛnw ye o, kalanko ni kɛnɛko ani seko ni dɔnko sigikafɔw ye o, walima bɛn ni fɔkabɛn sariyasɛbɛn ɲɛbila poroze dilanni. Ɲinan, Mali ye masalakun min sugandi musow ka hakɛw don kɛrɛnkɛrɛnnen laɲɛnamayali hukumu kɔnɔ, o kɛra : « ka ko kɛ musow kunkan : k’o kɛli sennateliya». O masalakun in bɛ bɛn an ka jamana ɲɛmɔgɔw haminankobaw ma musow ka hakɛw ɲɛtaako la ani cɛ ni muso cɛ politiki dabalilenw. Masalakun min sugandira Mali fɛ, o b’an ka kandili kofɔ ka dɔ fara an hakililaw fanga kan ka ɲɛsin musow ni musomanninw ma yiriwaliko la bɛɛ sen bɛ min na. A b’an wele ka taa jɛkabaara ma, walasa ka jigisigi kɛ senyɛrɛkɔrɔ ma nafoloko la ; kɛrɛnkɛrɛnnenya la, ni baarabolodalenw musakaw, sɔrɔkɛfɛnw ani suguw lasɔrɔli ye. Ka jigisigi kɛ ni yɛlɛma kuraw ani lafaamuyali baara kɛtaw ye, walasa ka se ka bɔɲɔgɔnnawale suguya bɛɛ dabila ka ɲɛsin suguya ma. O t’a bɛɛ ye, a ɲuman ye fana ka kɛnɛyakow, hadamadenya lakananni ani kalan lasɔrɔli musomanninw fɛ, o bɛɛ ka lasɔrɔ bɛrɛmakɛɲɛ kɔnɔ. Minisiriɲɛmɔgɔ sɔrɔla ka saniyaminɛnw ni sɛnɛkɛminɛnw di musow ma Kucala, sanji karaasaw yɛlɛnna minnu na. Dɔkala Yusufu JARA Mariyamu A. TARAWELE
Dɔkala Yusufu Jara
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
Selen Marɔku sibiri su k’a dugu jɛ kari la, degelikaramɔgɔ Tɔmu Sɛnfiye n’a ka cɛdenw y’u ka farifoni balontanko fɔlɔ kɛ ntɛnɛn marisikalo tile 17 san 2025. Cidenkulu mɔgɔ tɔw ka kan ka se Ujuda bi tarata ni Ala sɔnna. Ujuda ye dugu ye, min bɛ Marɔku ni Alizeri dancɛ la.
Kameruni sennantolantan tɔnba (Fecafoot) ɲɛmɔgɔ Samuyɛli Eto’o kɛra Afiriki sennantolantan tɔnba « CAF » ɲɛmɔgɔkulu mɔgɔ ye..
An ye Afiriki jamanaw ntolantantɔnw ka kupu U17 bolodacogo dɔn. A bɛ daminɛ marisikalo tile 30 k’a kuncɛ awirilikalo tile 19 san 2025 Marɔku jamana na..
A ɲininnen don sigidalamɔgɔw fɛ, u ka fara Bamakɔ faaba Meriba tɔpɔtɔ jɛkulu kɛrɛnkɛrɛnnen ka taabolo kura kɔ, min b’a to Bamakɔ bɛ se ka segin ka kɛ dugu saniman ye k’a sigili diya an bolo.
