Segu Ofisiri : suman tɔni 155.582 sɔrɔla ɲinan

Malokaama tɔni hakε min sɔrɔla, o kεra tɔni 84.429,22 ye, jigi tun dalen bε tɔni 115.721 de sɔrɔli kan. O ye 72,96% sɔrɔlen y’o la. Nin jate ninnu lasera bεnkan 10nan Gɔfεrεnaman/ODRS/Sεnεkεlaw cε kɔlɔsili ni kiimεnikulu ka san 3nan lajε senfε ; n’o ye san 2021-2023 ye. Lajε in kεra alamisa feburuyekalo tile 29 san 2024 Ofisiri yεrε ka lajεkεso kɔnɔ. Kɔlɔsili ni kiimεnikulu ɲεmɔgɔba Bureyima Gindo, Ofisiri ɲεmɔgɔba kura Amede Kamate, ka fara ɲεmɔgɔ caman wεrεw kan, nin bεε tun bε kεnε kan.

Nin kiimεni in ɲεsinna san 2024 sεnεkεsan ma ; o min daminεna waati ɲuman na nafoloko ni hadamadenya kɔnɔ. Sabula a y’a sɔrɔ suman caman sɔrɔla k’a sababu kε sanji nacogo ye ka ba fa. O kεra sababu ye ji sera ka ladon maloforow kɔnɔ ni wasa ye san 2022 sεnεkεsan kɔnɔ. Sεnεkεsan 2023 sanjiko kεra wasa ye ka da ba fali kan.

Nka jiba ye foro dɔw tiɲε. Sanjiba b’o la , ani ji min yεrε walangatara ka don forow kɔnɔ. A sɔrɔla ji donbaliya fana fε foro dɔw kɔnɔ, ani ji balali ka taa ka bɔ forow kɔnɔ.

Walasa ka se k’o tiɲεniw kɔlɔlɔ dɔgɔya, ORS n’a jεɲɔgɔnw ye baara dɔw kε ka kεɲε ni bεnkan kɔnɔko ye.

Forow labεnni bɔra a dafε ka da yɔrɔw nafaw kan, jibolisiraw fana ladonni kεra o cogo la, ka sεnεkεyɔrɔw lasɔrɔli nɔgɔya, ka yεlεma ɲuman don baaraw kεcogo la ni baarakεminεn nafamaw ye. Sinsin kεra sεnε kuntaala jan nafama fana waleyali kan, ka dɔ fara sekow kan baara fεεrεko ani labεnw cogoya la ka ɲεsin sεnεkεlaw ni bilasiralikεlaw ma, ka nafasɔrɔbaaraw yiriwa ani ka yεlεma ɲuman don mara kεcogo la ORS kɔnɔ.

Dεmεn min ɲεsinna sεnε ma, o dɔ kεra angεrε tɔni 2.147,54 dili ye tɔni 7.451 ɲininnen na, malosi tɔni 40 dili tiɲεni tun donna sεnεkεla minnu kun olu ma bolomadεmεn ye ORS fε, malosi tɔni 130 dili ani kabasi tɔni 1 dili dunkafa sabatili baarabolodalen Afiriki tilebinyanfan fε (PRSA), o hukumu kɔnɔ. Wari min donna baaraw dafε o bεnna sefawari miliyɔn 488.009.400 ma ; kasɔrɔ jigi tun bε miliyari 1,085 kan. Min sɔrɔla o bεnna 44,98% ma laɲinin na.

ORS yεrε sera ka sefawari miliyɔn 543.009.400 sɔrɔ. Miliyɔn 496.197.200 taara musaka dafε o la. Jigi tun bε wari sɔrɔta minnu kan (jisɔngɔ ni wari sɔrɔta wεrεw) o tun ye miliyɔn 672.037 600 ye san 2021-2023 bεnkan sira fε. O wari ninnu taara jobolisiraw labεnni, sow jɔli, baarakεla talenw kasosaraw, baara kεtaw musakali ani tiɲεni donna sεnεkεla minnu kun, olu dafε, Bureyima Gindo ka fɔ la.

Wariko ni nafoloko minisiri tɔgɔ la, Gindo ye foli lase ORS ɲεmɔgɔba kɔrɔ Salifu Sanɔgɔ ma. O bolo bɔra baara la k’a sababu kε si kɔrɔbayali ye. A ye foli fana lase ɲεmɔgɔba kura Amede Kamate fana ma. O ɲεmɔgɔba kura in y’a jira, ko disidako minnu bε yen sisan, o ye dɔ farali ye bilasiralikεlaw fanga kan ani forow labεnni. O siratigε la, a ye poroze kura dɔ kofɔ ORS ni jεɲɔgɔnw cε, i n’a fɔ Afiriki tilebinyanfan banki ka ɲεsin yiriwali ma (BOAD), Silamεdiinε banki ka ɲεsin yiriwali ma (BID) ani Afiriki banki ka ɲεsin yiriwali ma (BAD). Laɲinin ye ka se ka foro taari caman labεn ba fila furancε la. O b’a to caman ka se ka fara ORS ka sɔrɔ kan.

Aminata Dindi SISƆKƆ

Dɔkala Yusufu JARA