Angεrε sɔrɔli : Fεεrε jɔnjɔn bε ka ɲinin a ko tɔpɔtɔcogo la

Walasa ka se ka laɲininw waleya, sεnε minisiriso ye lajε dɔ labεn k’a daminε nowanburukalo tile 7 la ka se a tile 9 ma san 2023. A bεna kε kumaɲɔgɔnya tako 1^lɔ ye gɔfεrεnaman ka angεrεko tɔpɔtɔli kunkan. A baaraw daminεna kunun tarata Bamakɔ Lotoliba dɔ la. A ɲεmɔgɔya tun bε sεnε minisiri Lasinε Danbεlε bolo. Baganmara ani mɔnni minisiri Yuba Ba tun b’a kεnε kan, ka fara dunkafa sabatili komisεriba Ereduwani Agi Mohamεdi Ali kan.

Tile saba lajε in na, sεnε baara kεbaaw, julabaw ani mɔgɔ suguya wεrε minnu sen bε gɔfεrεnaman ka angεrεko tɔpɔtɔli la, u ye ɲɔgɔn sɔrɔ. A kun ye ka se ka fura jɔnjɔn kuntaala jan sɔrɔ. A ɲininnen don lajεkεla ninnu fε, gɔfεrεnaman ka angεrεko nafa ye fεn minnu ye sεnε sɔrɔ yiriwali la, ka hakilila falenw k’o kan. Ka bεnkanw sɔrɔ a tɔpɔtɔcogo ɲuman na, walasa yεlεma ɲuman bε se ka don baara in kεcogo la.

Sεnε minisiri y’a jira, ko dugukolo taari miliyɔn 43,7 ɲɔgɔnna bε Mali kɔnɔ, sεnε ni baganmara bε se ka kε min kan. O taari hakε fɔlen in na, ji bε se ka walangata ka don taari miliyɔn 2 kɔrɔ.

Mali sɔrɔ dɔ dulonnen don dugukolo nafa bɔli la ; wa jamanaden 70% de ye dugukolo nafabɔbaaraw kεbaaw ye. Mali bε fεn suguya minnu feere kɔkan, o 20% ye dugukolo nafabɔbaaraw sɔrɔfεnw ye ; jamanakɔnɔsɔrɔ fana 35,7% sɔrɔla u fε san 2021 kɔnɔ. O tenkansigili (pεrifɔrimansi) in, minisiri ka fɔ la, o senkɔrɔmadonnen don ni kɔɔrɔsεnε ani sumansεnε ye. A kɔlɔsilen don, ko san o san 10% bε fara suman ani kɔɔri sɔrɔ hakε kan, k’a sababu kε waleya damadɔw ye : dɔ farali kɔɔri kg1 sɔngɔ kan sεnεkεlaw bolo, dεmεn donni sεnεkεla cεman n’a musoman ma ni baarakεminεnw ani sεnε kεfεn tɔw dili ye u ma sɔngɔ duman na, forow labεnni, baraziw jɔli, bilasiraliw ani bolo donni sεnε porozew n’a baara bolodalenw kɔrɔ.

Sɔnni sεnε taabolo kura sariya (LOA) ma san 2006, an ka jamana y’a ŋaniya ka dεmεn don sεnε na, a ka se ka kε sɔrɔ yiriwali motεri ye. O siratigε la, walasa ka nɔgɔya don dunfεnw ani taji sɔngɔw yεlεnni na, gɔfεrεnaman ye dεmεnni daminε sεnε kεfεnw sɔrɔli la san 2008, walasa ka se ka dusu don sεnεkεlaw kɔnɔ ka taa a fε, suman caman ka se ka sɔrɔ.

Lasinε Danbεlε y’a jira, ko gɔfεrεnaman ka angεrεko tɔpɔtɔli fεεrε ye ko damadɔw ye ; i n’a fɔ fεεrεlaniyɔrɔ dili, dili kεli telefɔnisiraw fε ani sanni yamaruyasεbεnw.

Cεsiriw n’u ta bεε, walasa ka se ka yεlεma ɲuman don baara kεcogo la, wasaba ma se ka sɔrɔ, k’a sababu kε fεεrε bolodalenw musaka kεbaliya ye ka labɔli kε, sεnεkεlaw ka angεrεmako bεε sabatibaliya, o angεrε ni baarakεminεnw sɔrɔbaliya a tuma na, ani julabaw kεbaliya k’u ka minεn dilenw wari sɔrɔ joona gɔfεrεnaman bolo.

Ka da nin gεlεya kɔlɔsilenw kan, sεnε minisiriso kεlen kɔ ka kumaɲɔgɔnyaw kε marayɔrɔw la san 2023 sεtanburukalo kɔnɔ, a ye nin hakilila falen lajεba in de sigi senkan n’a jamakulu ye, gɔfεrεnaman ka angεrεko tɔpɔtɔli fεεrε jɔnjɔnw ɲininni na halibi. A bε dabɔ fura ɲεnama ka se ka sɔrɔ hakilila falenw kɔnɔ, gɔfεrεnaman ka angεrε dita ladoncogo ɲuman na.

Makan SISƆKƆ

Dɔkala Yusufu JARA