An bε don min na, furusa sεbεkɔrɔ cayalen don. Kεlε misεnninw, bεnbaliyaw, gosiliw ni joginniw, kumakan juguw, a ka ca a la, ninnu ye furu caman sakun ye bi. Aminata si hakε bε san 32 la. A ka fɔ la, « n bε n furu sa. Nin tε ne furu fɔlɔ ye, nin t’a filanan ye ». Ale bolo, musoganaya ka fisa ni cε jugu fε sigili ye. Wa k’a to furusa kεnε kan komini 6nan kiiritigεso la, n’a furucε y’a wele wido la a ka telefɔni kan a b’o ja jira muso tɔw la kεnε kan k’a yεlε bɔ cε in na. O muso ninnu bεε fana bε yen furusa dakun na. Fo o muso dɔw b’a fɔ ko n’i ye nin cε suguya ye, a kana k’i ɲεna ko nimisa b’a la dε. A ni finnen don juguya fε. Komayεlεmana nkalontigεla don. Ɲεda fila bε nin cε in kun. Furu daminε waati la, i b’a fɔ ko n kana sa ni n ma n den kelen di a ma ; nka furu donnen kɔ sa, a kεra sitaanε ye. A bε ne kεlε cogo o cogo la, a b’o kε. A daminε na, ne tun y’a ɲinin k’a lɔminε, sabula ne bε n furu sabanan de la a kun. Don dɔ yεrε la, a tun bε ɲinin ka n faga. Ni n ma n furu sa ka bɔ a kun, don dɔ la a bε n bila suw bilayɔrɔ la. Nin bεε ye Aminata kan ye a cε kan. Ko gεlεya ye min ye, a cε b’a fε halibi. O y’o jira kiiritigεla la kεnε kan. Nka Aminata de t’a fε ka to a kun bilen abada. Muso 30 ni kɔ b’a kεrεfε ban kan kiiritigεso dogodogo la wo kɔnɔ. U bε ka hakilila falenw kε u ka furuw cogoyaw kan ; wa u bεε hami ye furusa ye. Maladɔn si hakε bε san 19 na ; Kiiritigεla ka sekeretεri y’a ka furusasεbεn don a bolo. Nisɔndiya bε ɲinin k’a faga o la, i n’a fɔ mɔgɔ min ye Baki sɔrɔ. A ko ale bεna se ka don furu kura la sa. Ko cε fila b’a nɔfε fɔlɔ. Nin tun ye Maladɔn san fila ye a ka furu in na. Mata si hakε kε san 28 na, o y’a jira k’ale bεna ɲεnajεba labεn a furu salen diyako jugu a ye. A ko a ka furu sako min filε, a bεna gato dɔ kεrεnkεrεn o kama, a bε sεbεn min kan : « Furusa ɲεnajε duman ». A y’a kanto a cε ma, ko ale y’o faamuya ; nka ko ni mɔgɔ dusu kasira ka se hakε dɔ ma, i mako tε k’a la bilen. A k’ale de tununna, a sɔn diyara, a maalo tara. An ka fara ɲɔgɔn na a banna. Mata n’a cε ka furu salen don a kalo 9 ye nin ye, den 2 b’u cε. A k’a cε taara denw di a somɔgɔw ma Wasolon, Bugunin mara kɔnɔ. Ko ale yεrε t’u kunnafoni dɔn bilen. Kiiritigεla dɔ y’a jira, k’an bε don min na, denmisεn fanba ma labεn furu kama. U kun tε furu kɔrɔ, wa sigida kow de b’u bila o la. A ko a ka ca a la, musow de bε furusa ɲinin, u mansaw fana b’u dεmεn o kan. O b’a jira ko mansaw y’u bolo jigin u denw ka ko la. Kiiritigεla in ka fɔ la, Mali kɔnɔ, furusa caman sababu ye basigibaliya, dantεmεnkow, juguyako jugu, kumakan juguw, ɲangicogo jugu, dɔlɔbamin ani ɲεnamininfεnw taliba. Kiiritigεla dɔ fana y’a jira ko furusa caman sababu ye faantanya ye. Kiiritigεla in ko seba tε cε bεε ye ka denbaya ka wariko mako bεε dalakεɲε. Musow tε dɔwεrε fɔ, ko cε dεsεlen don ale balo, a ka fεεrεbɔ an’a furakεli kɔrɔ. Furusa sababu filanan min bε fɔ u fε, o ye ɲangata min bε ta k’u sεgεrε furuso kɔnɔ. Muso caman bε furusa ɲinin k’u minεcogo man ɲi, ko kumakan jugu b’u kan kosεbε. A sababu dɔ ye cε ka kulusijalagosi ye. Kiiritigεla ka fɔ la, muso hakε min bεna olu ma furusako la, o 80% n’a furucε tε ɲɔgɔn kan bilen o bε waati jan bɔ. Wa a b’u ɲεna ko furusa ye tile kelenko ye. N’a ka di i ye i b’a la, n’a goyara k’i bε bɔ a la. A ka fɔ la, dɔgɔkun kɔnɔ olu bε se ka furu 40 sa, u ka furusa laɲininsεbεn sɔrɔlenw na. Bamakɔ komini 4nan kiiritigεso ɲεmɔgɔ Kasimu Kɔnε y’a jira ko mɔgɔw bε jigi kiiritigεlaw la k’u bε furusa kε kojugu ; kasɔrɔ a tε ten. Yanni cε n’a muso ka se kiiritigεla ma furusako la, o b’a sɔrɔ u tεmεnna fɔlɔ u mansaw, u teriw, u sigiɲɔgɔnw, jeliw ani alimamiw fε. U jigila misεnyanen de bε se olu ma. O b’a sɔrɔ ku-ɲɔgɔn-kan jigiya fosi t’u cε bilen. Fɔkabεn suguya bεε dɔ kεra u cε ka dεsε. O la, ko dɔwεrε fana tε kiiritigεlaw ma ni furu in Sali tε. Mɔgɔ tε se ka cε, walima muso wajibiya ka to furu la a tε min fε bilen. Furu selen n t’i fε dakun ma, ni kiiritigεla ma o furu sa, a bε bange min na kiiritigεla seko t’o la. Mɔgɔw mana se kiiritigεso la furusako la, kiiritigεla b’u fila bεε lamεn, ka kalo saba kuntaala di u ma hakilijakabɔ ye. N’o dafara, fɔkabεnw bε ɲεɲinin u fila cε. Ni bεn ma se ka kε cogo si la, furu bε sa ka bɔ u cε ; wa sefawari dɔrɔmε ba duuru (d5 000) de bε sara furusasεbεn dilanni kunkɔrɔ Kasimu Kɔnε ka fɔ la. Kiiritigεla y’a jira, ko muso minnu bε suute ka furuso bila ka taa n’u yεrε ye k’a sɔrɔ taali yamaruya ma di u ma, sariya b’o jate furusobila ye. O kɔnnen don Mali ɲangilisariya fε. Ni cε sera kiiritigεlaw ma o la, o muso suguya bε ɲangi tile 11 fo kalo saba kaso la, ani alimani sefawari dɔrɔmε ba naani fo ba mugan sarali la. Furusa minnu bε kε bεnkan kan, olu de kεcogo ka nɔgɔn kosεbε, u sali fana ka telin. Sabula n’o don, kiiritigεla tε ɲininkali wεrε kε furu sakun na. A bε dɔn ko muso ma wajibiya ka don furusa dafε. U fila bεε ka laɲinin don. Jeli Burama Sumano ka fɔ la, duw fanga de dεsεra an bε don min na. Duw de tun bε furu don u ni ɲɔgɔn cε fɔlɔ ; nka bi, cε walima muso de b’a fɔ ko ne b’a fε ka furu nin ma. U b’u ta ɲɔgɔn yecogo ɲumannin fε, k’u ɲε tugu ka tugu ɲɔgɔn kɔ ten. An ye ɲɔgɔn nikanu ye, o ka ɲi furuko la ; nka o t’a bannen ye. Furu ye i si ani n si ko ye. O de kosɔn bi mɔgɔw ka furusa sababuw ka ca. A furusa sababu dɔw ye kumakan juguw ye ; kasɔrɔ furu dɔw kɔnɔ, furuɲɔgɔnw bε ɲɔgɔn bɔrɔtɔ cogo bεε la, furu tε sa u cε. Umu Jara ORTM na, o ye laadilikεla ɲuman ye. Ale y’a jira ko furusa dɔw sababu ye ladamubaliya ye. Mɔgɔ o mɔgɔ tε mɔgɔ bonya, a tε maloya mɔgɔ ma, a man telin ka ko to mɔgɔ ta la. Bi musomanninw tε dɔwεrε fε fini ɲumanw, masiriw ani wari kɔ. U ka furu don, mɔgɔw b’u fo k’u tanu jogo ɲumanw, tobili, finiw koli ani minεnnɔgɔw koli la. Kasɔrɔ u ka kan ka kuma u mɔggɔ ɲɔgɔn fε cogo min na, u tε fosi dɔn o la. Cεmannin ni musomannin caman b’o cogo la. O de la u t’u mansa bonya, kuma tε mɔgɔ wεrε mansa ma, kuma tε u furuɲɔgɔn ma. Ni cε banna ka jɔ a cεya jɔyɔrɔ kɔrɔ du kɔnɔ, yɔrɔ bε kε yɔrɔ lankolon ye. a bε fɔ o du suguya ma, ko du tigintan, walima du mɔgɔntan. Umu Jara bε jεmukan min sigi juma o juma ladamu kan, muso caman bε se a ma k’a ka gεlεyaw ɲεfɔ a ye ; u da bε se kuma dɔw ma, fo i dabali bε ban. Tuma caman na, a b’a yεrε dεmεn ni diinεɲεmɔgɔw ye, ka laadilikan jɔnjɔnw di musow ma cε ani muso ka hakεw kan furu kɔnɔ. Furucε ka kan ka kε a muso fε, k’a balo, k’a lakanan, k’a furakε, k’a fεεrεbɔ, ka siyɔrɔ di a ma. Furumuso ka kan k’a cε bonya, ka majigin a ye, k’a ladon, k’a bolofεnw minε ka ɲε. Silamεya bε fεn min kɔn kosεbε, o ye furusa ye. Silamεdiinε na, muso man kan ka se kiiritiso la, ka furusa laɲinin kε ; nka, a bε se ka se diinεɲεmɔgɔ dɔ ma, ka furu wulili laɲinin kε ka bɔ a kunna. Ko Ala bε furusa daga furu sakun jɔnjɔn na. Furuso degun dɔw fura ye furusa ye. Sataanε fana nisɔndiyako ye furusa ye ; sabula furusa de bε sira dayεlε ko jugu caman ye : kakalaya, kanu banni dusukun na, juguya… Kerecεndiinε fana na furusa ka gεlεn kosεbε. Furu de kosɔn, cε ni muso bε se ka jεn u mansaw kɔ ka tugu ɲɔgɔn kɔ, ka kε denbaya ye. Kerecεndiinε na, cε o cε mana a muso furu sa, ka dɔwεrε furu, o bε jate kakalaya ye. Cε o cε fana mana muso furu salen furu, o bε jate kakalaya ye. Mayimuna SƆ Dɔkala Yusufu JARA
Dɔkala Yusufu Jara
Ciden minnu bε Malidenw yεrε dama cε sigikafɔba kεnε kan, u y’a ŋaniya kumaɲɔgɔnya sigikafɔ in da ka yεlε kojugubakεlaw ye, ka silamεdiinε dungew don an n’u cε kɔrɔfɔw la. U y’a ɲinin fana, ko ka kuranko gεlεya furakε joona walasa hakilisigi ka na mɔgɔw la.
Faso tɔgɔla sigikafɔba min daminεnen filε, o bεna kε sababu ye Malidenw ka kumaɲɔgɔnyaw kε u ni ɲɔgɔn cε ka furaw dajira gεlεya kofɔlenw na. A ka kan ka se ka hadamadenya juru caanin an cε, ka dɔ fara ku-ɲɔgɔn-kan fanga kan ani ka na ni bεn kutaala jan ye..
Furancεlafanga jamanakuntigi Kolonεli Asimi Goyita ye laseli kε tarata awirilikalo tile 30 san 2024, ko gɔfεrεnaman bε sεnε kεfεn minnu di, tεmεn bε kε n’o ye. O siratigε la, angεrε (ire) kg50 bɔrε ye sefawari dɔrɔmε ba fila ani kεmε seegin (d2 800) ye, farafinnɔgɔ kg50 .
San o san mεkalo tile 1lɔ ye baarakεlaw tɔgɔladon ye diɲε kɔnɔ. O hukumu kɔnɔ, Mali baarakεlaw lafasatɔn minnu bε UNTM jεkuluba kɔnɔ, olu ye yεrεjirataama kε jamana ka yεrεmahɔrɔnya kεnεba kan. A kεra kεnε ye, min kɔrɔfɔw bolila hadamadenya basigili ni ɲεtaa laɲini.
Mali sɔrɔdasiw ye kojugubakεla Hugo faga Indelimani kεlεdaga la Gawo mara la. Kabini Mali y’a ŋaniya k’a mεru don Irisijamana na sɔrɔdasiko nasira la, an ka lakananbaaw b’a la ka sebaayaw sɔrɔ dɔrɔn kojugubakεlaw kan..
UNTM biro kura mɔgɔ ye 53 ye. U ye lahidu ta, ko furakεcogo ani laɲinin minu kεra a ka sigikafɔw senfε, olu bεna kε sisinnan ye sarati kura in kɔnɔ.
