Bamakɔ sigili kiiritigεso : Siganamɔgɔ 271 ka kiiri bεna tigε o sigili in senfε

Kuru dasizi ka san 2024 sigili fɔlɔ daminεna kunun, Bamakɔ weleli kiiritigεsoba la ; n’o ye kiiri minnu tigεra ka tεmεn, segin bε k’u kan kiiritigεso min na, o de ye weleli kiiritigεso ye. A baaraw daminεni ɲεmɔgɔya tun bε weleli kiiritigεso in ɲεmɔgɔ porokirεri zenerali Faraji Baba bolo ; kuru dasizi porokirεri zenerali Hamaduni tun b’a kεnε kan. Ale bε wele Balɔbɔ Gindo. Nin sigili fɔlɔ in kuntaala ye kalo 2 ni tila ye. A bε boli waleya 162 kan siganamɔgɔ 271 kunkan. Olu la, mɔgɔ 225 minεnen don ka lamara bolo kɔrɔ. Baara daminεna ni kiiritigεlaw kaleniw ye, k’a jira k’u bε baara kε tiɲε kan ka sariya labato.

Kuru dapεli porokirεri zenerali y’a jira ko nin sigili fɔlɔ in bεnna ni kiiritigεlaw ka wulikajɔba waati ye kojugubakεlaw, faso nafolo burujabaaw, dansagonwale kεbaaw jamanaw cε ani εntεrinεtifε kojugubakεlaw nɔfε. O waleyaw bεnnen bε dugumɔgɔw ma bi kosεbε. Nin sigili bεna kε sababu ye mazisitaraw ka kiiriw tigε a ɲεkan, ka  ɲangiliw kε, u tεna mɔgɔ ɲε lajε, wale jugu mana gεn ka jɔ minnu na u bε ɲangi ka kεɲε n’o waleya jugu kεlen ye. Ni min nɔ ma ye kow la fana, o bε labila.
Hamaduni Balɔbɔ Gindo ka fɔ la, sigili kiiri, n’o ye kuru dasizi ko ye, kalan don ka ɲεsin mɔgɔw ma, sabula dɔnniya jirali ɲɔgɔn kunbεn kεnε don. Kiiritigεla ŋanaw bεna u dɔnko jira ɲɔgɔn na, kalandenw b’u ka tɔmɔta tɔmɔ a senfε, dugumɔgɔw fana bε kiiri jɔyɔrɔ dɔn. A ko kiirisεbεn kelen o kelen, mɔgɔlawoloma tεna k’a la, o bεna fεsεfεsε ji ɲεmajɔlen na. A labanna ka wele bila kiiritigεlaw ma, u ka mɔgɔ nɔminεnenw ka hakεw labato lamarali kuntaala koɲεw na ko bεε la ani yɔrɔ bεε la.

Porokirεri y’a jira ko sigiko fɔlɔ in bε boli waleya 162 kan, siganamɔgɔ 271 kunkan. Olu la, mɔgɔ 225 minεnen don ka lamara bolo kɔrɔ ; muso 6 ani kodɔnbalinin 6 b’o la. U ka koɲεw bεna fεsεfεsε ka kεɲε n’u cogoyaw ye u kiiribaaw an’u ka seerew ɲεna. Kiirisεbεnw cogoyaw la, 60 bε boli danbetiɲεwalew kan ; i n’a fɔ binni musow kan kafoɲɔgɔnya siratigε la, kafoɲɔgɔnya tali ka musomannin kodɔnbalininw sεgεrε. 56 bε boli nibɔ kan ; i n’a fɔ mɔgɔ ka sa i bolo, fagali, denfaga, k’a lawuli a kama ka mɔgɔ bugɔ k’a jogin ani k’a bugɔ fo k’a faga. Ka fara ɲɔgɔn kan ka kε jεkulu ye ka sonyani kε, k’i tugu ka tasuma don, o waleya 45 b’a la ani dɔrɔgufeere. Nin kiiri ninnu mana tigε, o kɔfε sigili kεrεnkεrεnnenw bε daminε faso nafolo burujali ani kojugubakε kan.

Soronadonnaw ka jεkuluba ka ciden Mεtiri Abudaramani Kanute, ye ɲεfɔli kε. A ko kiiri nafa mɔgɔw kan, o y’a tigεcogo ɲuman ye tilennenya kɔnɔ. Min ye waleya jugu kε, o ka ɲangi a ka wale sara ye, bin kεra min kan, o fana ka bila a ka hakε kɔnɔ. A ko jamana sariyasunba kura min tara san 2023 zuluyekalo tile 22, o bε kiiri tigεcogo ɲuman kofɔ hadamaden ka hakεw labatoli nasira la. Kiiri lasɔrɔli bε sira don mɔgɔw kɔrɔ u k’u jigi da kiiritigεso kan u ka kow la, min b’a to u b’u ka hakεw sɔrɔ, n’u tɔɲɔna k’o nɔ ladilan.

Kuru dapεli ɲεmɔgɔ fɔlɔ y’a jira ko saya kεli mɔgɔ bolo, fagali ani bugɔ ka fagali, o de ka ca sigikun kɔnɔ kosεbε. A y’a jira fana, ko waleya juguw n’u ta bεε, sεbεnw ka kan ka fεsεfεsε koɲuman hadamadenya hakεw labatoli kɔnɔ ; sabula siga kεlen don u la, nka a ma jɔ u la k’u jalaki don fɔlɔ. O siratigε la, mɔgɔ nɔminεnen bεε ni soronadonna ka kan, kiiritigεlaw ka kiiri tigε u fεrε ma, u kana da mɔgɔ kɔkan. Porokirεri zenerali Faraji Baba y’a ɲinin kiiritigεlaw fε, u ka to u kalikanw kɔ.

Yaya JAKITE

Dɔkala Yusufu JARA