Basεnεgali donni ba la jεkuluba « OMVS » : Lajinε seginna tɔn kɔnɔ

Lajinε kεlen k’a jira k’a bε a senbɔ Basεnεgali donni ba la jεkuluba ka baara bεε la fɔlɔ o jamanakuntigiw n’a minisiriɲεmɔgɔw ka lajε 19nan kɔfε zuluyekalo tile 17 san 2023, jukulu in ye lajεba balalen kε kunun alamisa wido fε, ka se ka Lajinε seginni labεnw kε u cεma.

Mali furancεlafanga jamanakuntigi Kolonεli Asimi Goyita, Moritani jamanakuntigi Mohamεdi Uludu Sεki Ɛli Gazuwani, n’o ye « OMVS » ɲεmɔgɔ ye, Sεnεgali jamanakuntigi Maki Sali ani Lajinε minisiriɲεmɔgɔ Bεrinari Gumu, olu ye hakilila falen kuntaala jan kε. Mali yeelenko ni jiko minisiri Madamu Bintu Kamara, n’o ye OMVS minisirijεkulu ɲεmɔgɔ ye, ka fara OMVS cidenba Mohamεdi Abudεli Nfeta kan, olu sen tun bε kumaɲɔgɔnya in na.

O kumaɲɔgɔnya kuncεlen, yeelenko ni jiko minisiri y’a jira, ko lajεba balalen in bolila Lajinε seginni kan OVMS kɔnɔ. Ala barikala la, o sera ka ɲεnabɔ. O kεra ko ɲuman ye. Madamu Bintu Kamara ka fɔ la, u bεnna a kan Lajinε ka segin k’a sendon OMVS ka baara kεta bεε manankun bɔli la. Barazi dɔw jɔli Lajinε ani Mali kɔnɔ, o fana musakaw ɲininni ɲεsigira. Ko bolodalen kura min tun bε yen, o ye ka OMVS cidenba dankanya di Lajinε ma ; o fana kεra. O bεnna fan bεε mɔgɔw ma.

Hakililajigin na, OMVS jamanakuntigiw n’a minisiriɲεmɔgɔw ka lajε 19nan senfε, Lajinε tun y’a ŋaniya, k’a senbɔ OMVS jɔsen bεε baara kεtaw la fɔlɔ, ka da a kan, ko a donkun an’a nafaw a ko la, olu talen tε ba la. I n’a fɔ Labe mara la Tuge perefεkitiri kɔnɔ, Kurutanba barazi musakako, an’a niyɔrɔ dɔgɔya OMVS bεnkanw tali jɔsenw kɔnɔ.

O de kosɔn jamanakuntigiw ni minisiriɲεmɔgɔw ka lajεba balalen min kεra kunun, o y’a ɲinin ka Lajinε ka laɲininw sabati. OMVS cidenba ye laseli min kε, o b’a jira ko fεεrε ni dabali bεε ka tigε joona, min b’a to Lajinε bε se ka bila a ka hakεw kɔnɔ OMVS ka baara kεta bεε la. O waleya in ye donɲɔgɔnna, ɲɔgɔndεmεn ani bεrεmakεɲε hakililaw ye. O dun ye OMVS danbe ye.

OMVS jamanakuntigiw n’a minisiriɲεmɔgɔw nisɔndiyara ni mɔgɔ bεε ka hakililadi ye widolajε in na. O bε ɲεtaa kofɔ jε kɔnɔ, jamanadenw ka wasa kama. Mohamεdi Uludu Sεki Ɛli Gazuwani ka fɔ la, jεkulu minnu ye ɲɔgɔntε ye mara kεcogo la ka ɲεsin jiko ma, OMVS  b’o la. Ka da a kan, u bε ɲɔgɔn hakilila ɲinin kow taabolo la fɔlɔ, ka sɔrɔ ka bεnkanw ta. A labanna ka foli lase lajε in labεnko ɲuman na.

Moritani jamanakuntigi seginna k’a jira, ko jamanakuntigiw ni minisiriɲεmɔgɔw ka lajε hami ye ko kuraw waleyali ye sanga ni waati bεε la fura ɲumanw sɔrɔli la gεlεya kɔlɔsilenw na. Wa ko Lajinε seginni k’a sendon baara kεtaw la a ɲεma, o fana bε jεkulu in ɲεtaa kofɔ.

Ko gεlεman ye min ye, o ye bεε k’a seko kε baara bolodalenw musakaw sɔrɔcogo la. O baara bolodalen dɔ ye jikantaamako, baraziw jɔliko, kuranko, jisaniman sɔrɔliko, dunkafa koɲεw yiriwaliko ani waatiyεlεma kɔlɔlɔw kunbεnniko.

Ka kεɲε n’o waleyaw ye, Moritani jamanakuntigi y’a jira, ko jigisigiw bε yen k’a sababu k’u ni Siniwajamana ɲεmɔgɔw ka kumaɲɔgɔnyaw ye. O siratigε la, a ko a dalen bε OMVS ɲεtaa la k’a sababu kε a tɔndenw ka wulikajɔw ye poroze bolodalenw musakako la.  

Umaru JAKITE

Dɔkala Yusufu JARA