Basigi cogoya san 2024 in ɔkutɔburukalo kɔnɔ, a yera ko gɛrɛntɛba tun bɛ kojugubakɛlaw dala Mali sɔrɔdasiw fɛ. Wa u b’a la ka tɛmɛn ni kojugubakɛlaw wɔgɔbɛli an’u dajili ye u dogoyɔrɔw la. Ɔkutɔburukalo kɔnɔ bɔko 17 kɛra kojugubakɛlaw ɲininni na, k’u bon ni pankurunw ye siɲɛ 44, bin kɛra Mali sɔrɔdasiw kan siɲɛ 6 : fila kɛra o la ni mugu juguw filili y’u kan, pɛrɛnbaraninw donna siraw kan dugu jukɔrɔ siɲɛ 6 ani ka kojugubakɛla 4 ɲɛnama minɛ. Nin kunnafoni ninnu lasera Mali sɔrɔdasiw ɲɛmɔgɔso ka kunnafoniko cakɛda « Dirpa » ɲɛmɔgɔba Kolonɛli-mazɔri Suleyimani Danbɛlɛ fɛ kunun a ka kalo kunnafonidilajɛ senfɛ.
O gɛlɛyaw n’u ta bɛɛ Mali sɔrɔdasiw ka baara la, kow y’u ta ye. A y’a jira ko caman bɔra binkanniw na ka ɲɛsin lakananbaaw ma, wa dɔ bɔra pɛrɛnbaraninw donniba fana na sisan ka tɛmɛn kalo salen in kan. A bɛ waati jan bɔ kojugubakɛlaw bɛ ka sɛbɛkɔrɔ daji ani k’u wɔgɔbɛ fo u dogoyɔrɔw la. Kolonɛli-mazɔri Suleyimani Danbɛlɛ ka fɔ la, jamana cɛmancɛyanfan kɛlɛdaga la, karidon ɔkutɔburukalo tile 6 bin kɛra Mali sɔrɔdasiw kan Bɛri sirakun na.
Sɔrɔdasiw ka faamuyali ni galabu kɛnɛya sera k’a to u ka se ka kojugubakɛla caman sɔrɔ o la k’olu daji, k’u ka bolifɛnw tiɲɛ ka dɔrɔguw ni kɛlɛminɛn caman sɔrɔ u kɔ. O kojugubakɛw ɲɛmɔgɔ dɔ tun ye Julayibibu Al-Ansari ye ; n’a tɔgɔ sɛbɛ ye Al-Iza Uludu Yahiya. Ale n’a jɛɲɔgɔn jugu caman fagara o kɛlɛ senfɛ.
Ɔkutɔburukalo tile 8 san 2024, nɛgɛ kanɲɛ 11 waati la, kunnafoniw sera k’a to Mali sɔrɔdasiw ka porokoto jan dalen dɔ mantɔɔrɔ ma Tumutu ni kɔrɔn cɛ ni km17 ɲɔgɔnna ye Bɛri sira kan. U sera ka kojugubakɛla caman sɔrɔ ka faga o la. O dugu jɛ nɛgɛ kanɲɛ 11 waati la tuguni, Mali sɔrɔdasiw porokotora jan dalen dɔwɛrɛ mantɔɔrɔ ma Sayi woroduguyanfan fɛ ka digi tilebin kan Segu mara la. Kojugubakɛla caman fana fagara o kɛlɛ la, ka kɛlɛminɛnw, moto bi saba ni kɔ, furaw ani telefɔniw sɔrɔ u kɔ. O waati kelen na, Duna Mɔndoro komini kɔnɔ, AES kɛlɛbolo ye kojugubakɛlaw jurunin tonnen daji Mali, Burukina faso ani Nizɛri dancɛw la.
Ɔkutɔburukalo tile 19 san 2024 a sɛmɛntiyara ko Modibo Jalo n’a tun bɛ wele Modire Abasi ka bɔ Dindeji, Nanpala ni kɔrɔn cɛ ni km13 ye, Mali sɔrɔdasiw y’o daji. Ɔkutɔburukalo tile 21, Mali sɔrɔdasiw mɛɛna ka kojugubakɛlaw kɔlɔsi u ka lajɛ la ka sɔrɔ k’u bon k’u tatiɲɛ. O dugu jɛ, kojugubakɛla minnu binna Ti lakananbaaw kan u jɔyɔrɔ la sirakun na Sewarɛ fanfɛ ɔkutɔburukalo tile 19, olu nɔbɔra ka taa u bɛɛ sɔrɔ k’u daji. Ɔkutɔburukalo tile 22 kojugubakɛla minnu ye pɛrɛnbaranin don jugu jukɔrɔ Mali sɔrɔdasiw ɲɛ sira kan fo mɔgɔ caman ni tora o la, Mali sɔrɔdasiw sera k’olu sɔrɔ k’u daji Bewani ni worodugu cɛ ka digi kɔrɔn kan Segu mara la, u tun ye jaka minnu bɔɔsi duguw la, k’o caman fana sɔrɔ u kɔ.
KƐLƐMINƐN SUGUYA CAMAN SƆRƆLA- Jamana kɔrɔnyanfan kɛlɛdaga la, ɔkutɔburukalo tile 4, sɔrɔdasi ɲɛmɔgɔw y’a jira ko jamana dugukolo lakananni wulikajɔw kɔnɔ, u ye kojugubakɛlaw ka mɔbiliw jurunin tonnen ye Tine-Sako ni Tinzawatɛni furancɛ la ka bɔnɛ jigin u kan. Ɔkutɔburukalo tile 15 san 2024, Mali sɔrɔdasiw ye kojugubakɛlaw ye Agelihɔku ni kɛɲɛka cɛ ka digi tilebin kan Kidali mara kɔnɔ, u b’a la ka baasi biri mɔbili dɔ dala. Mali sɔrɔdasiw ye pankurun kɛ k’o mɔbili in bɔ baara la. Ɔkutɔburukalo tile 21 san 2024, Mali sɔrɔdasiw ye kɛlɛminɛn suguya caman sɔrɔ kojugubakɛlaw kɔ Amasine, Intebezasi ani Tasiki, Kidali mara woroduguyanfan fɛ. O don kelen na, mɔbilifataji min tun ɲɛsinnen bɛ kojugubakɛlaw ma, Mali sɔrɔdasiw y’o minɛ Indelimani.
Jamana woroduguyanfan kɛlɛdaga la, Kolonɛli-mazɔri Suleyimani Danbɛlɛ y’a jira ko ɔkutɔburukalo tile 9 nɛgɛ kanɲɛ 21 tɛmɛnnen ni sanga 45 ye Mali sɔrɔdasiw ka mugukanw mɛnna kojugubakɛkulu fila la, minnu tun bɛ dansagonwalew ta ka sigidalamɔgɔw sɛgɛrɛ ani ka pɛrɛnbaraninw don dugu jukɔrɔ siraw kan mɔgɔw ɲɛ. Olu yera kɔda dɔ la Giringole jiritu kɔnɔ Nara mara la. A ye hakililajigin kɛ, ko ɔkutɔburukalo tile 21, kojugubakɛla minnu tun bɛ pɛrɛnbaraninw don dugu jukɔrɔ siraw kan, Mali sɔrɔdasiw y’olu daji Dili Nara mara la, ka kɛlɛminɛn dogolen caman sɔrɔ u kɔ.
« Dirpa » ɲɛmɔgɔ in y’a jira ko kojugubakɛla min ye Suraka Agi Mohamɛdi ye, ɔkutɔburukalo tile 8 tɛgɛ dara o kan Nerinayime komini kɔnɔ Tumutu mara la ; kɛlɛminɛn caman tun b’a kun ; i n’a fɔ marifa 12,7 kelen ; kalasinikɔwu (PKM) kelen ; orokɛti fililan kelen ; marifa AK-47 saba, kisɛbara tan, arajo Motorola naani, Motorola kisɛbara fila, telefɔni wolonwula, andoroyidima ye duuru y’o la, moto tan ani mɔbili saba falen mugu jugu la. Mali sɔrɔdasiw y’o mɔbiliw bɔ baara la. Ɔkutɔburukalo tile 13, Alasani Dikɔ n’a si bɛ san 22 la, Gosi zandaramaw y’o minɛ. Gosi ni Gawo cɛ ye km 145 ye. A kɔlɔsira k’o cɛ in ye kojugubakɛlaw ka ciden ye.
Dɔkala Yusufu JARA
Suleyimani SIDIBE
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
