Faso lajεba nafoloko yiriwali kan : Jamanakuntigi ye laselisεbεn sɔrɔ

Jago ni iziniko soba (Ccim) ɲεmɔgɔ Maju Sεnpara ye nafoloko yiriwali lajεba laselisεbεn don furancεlafanga jamanakuntigi Kolonεli Asimi Goyita bolo kunun ntεnεn zanwuyekalo tile 8 san 2024 jamanakuntigiso la Kuluba. A dili kεra a damana lajε ye. Bulonba kuntigi Kolonεli Maliki Jawu, minisiriɲεmɔgɔ D^r Sogεli Kokala Mayiga, minisiri dɔw, Mali makobatigiw ka jεkuluba (CNPM) ɲεmɔgɔ Mosadεki Bali ani (Ccim) mɔgɔ caman wεrεw.

O siratigε la, (Ccim) jɔyɔrɔ kama fεsεfεsεli, sεgεsεgεli ani dajirali la, a ye nafoloko tigilamɔgɔw wele ka sigi lajε la Segu marisikalo tεmεnnen in tile 30 ni 31, ka ɲiɲinkaliw kε, ka hakilijakabɔw kε ani ka furaw dajira nafoloko ɲεtaabaliya gεlεyaw la. O lajε de senfε, laɲininw kεra ka dεn fangabulonko, iziniki fεεrε tigεlenw, a baaraw kεcogo, musakako cogoya, nafoko baara tε taa fεn minnu kɔ, jago ani sigidaw la.

Maju Sεnpara ye foli ni tanuni lase furancεlafanga jamanakuntigi ma u dεmεnni na, ko laɲinin ninnu waleyali b’a to Mali nafoloko ka se ka bila sira ɲuman kan yiriwali siratigε la.

Jεkuliu kεrεnkεrεnnen min sigira senkan, o ɲεmɔgɔba Mamadu Cεnin Konate ye kumaɲɔgɔnya kε lajε in kan jamana fεnw ɲεtaa, bolo donni kεnyεrεye kɔrɔ, min b’a to sεnε ka bɔ baloɲininsεnε dama na, k’a kε bayεlεmani ye. O bεna ni sεnεfεn suguya caman donni ye ba la. O de kosɔn, a ɲininna ɲεsin ka kε kεnyεrεye sankɔrɔtali ma, k’a bila baara waleyataw cεmancε la.

Dajirali kεra fana, sinsin ka kε faso cakεdaw kan dugujukɔrɔfεnko nasira la, u ka se k’u jɔyɔrɔ fa kosεbε Afiriki marayɔrɔw kɔnɔ sangaɲɔgɔnma kɔnɔ. Kuma lasurunya na, ka jago ni iziniko soba dεmεn Mali kura jɔli la. Jεkulu kεrεnkεrεnnen ɲεmɔgɔ y’a jira k’a sago ye jamanakuntigi ka laselisεbεn in labaara koɲuman Mali nafoloko ɲεtaako la.

JAGO NI IZINIKO BƐ ƝƆGƆN DAFA- Jago ni iziniko minisiri Musa Alasani Jalo ka fɔ la, minisiriɲεmɔgɔ yeli Segu lajεba kεnε kan, o b’a jira ko gɔfεrεnaman sεbε ye poroze in ye. A y’a jira fana, ko ka iziniko kε sεnεko baara kεbaaw kun na kosεbε. Laɲinin minnu kεra Segu lajεba senfε, olu bε tali kε furancεlafanga jamanakuntigi Kolonεli Asimi Goyita kuntilenna na.

Mali nafoloko yiriwali kuntaala jan damakεɲε kɔnɔ, o bε tεmεn iziniko fε ; n’o tε tεmεnsira wεrε t’a la. Minisiri y’a jira, ko cakεda fitininw, mankanw ani belebelew ka kan ka senkɔrɔmadon, u ka se ka sɔrɔfεnw bayεlεma, ka baaradaw dayεlε, ka nafolo sɔrɔ ani ka sɔrɔ tila. O tε ko gonin dama ye ; wajibi yεrε don. A tε dabɔ ka jago ni iziniko kɔ don ɲɔgɔn ma.

Nka a bε dabɔ k’u kε ka ɲɔgɔn dafa u ka se k’u jɔyɔrɔ fa a ɲεma nafoloko yiriwali la an ka jamana kɔnɔ. Musa Alasani Jalo ka fɔ la, izinitigi bεε ye jagokεla ye ; nka jagokεla bεε tε izinitigi ye. O de kosɔn yεlεma kuraw sinsinbɔlɔ 3nan kɔnɔ jago ni iziniko minisiriso la, a ɲininnen don ka senkɔrɔmadonni kε jagokεlaw yεlεmani na iziniko kan, k’u ka jagosiraw to a cogo la.

Lajε in senfε, hakilito kεra dabali tigεtaw la mara kεcogo la. O siratigε la, jεkuli dɔ sigira gɔfεrεnaman ni kεnyεrεye cε laɲinin kεlenw waleyacogo kɔlɔsili kama. Segu laɲininw waleyali b’a to gɔfεrεnaan ka se ka kiimεni kε ; nka n’o ma kε, a ka se ka politikiw mabεn ni sεnεko fεεrεw ye, baara kεtaw waleyali hukumu kɔnɔ. 

Umaru JAKITE

Dɔkala Yusufu JARA