Nin don kɛrɛnkɛrɛnnen in sigira senkan dekere n°2022-0128/PT-RM fɛ, min tara marisikalo tile 4 san 2022
Mali laadatigiw tɔgɔladon laɲɛnamayali b’a jira ko sisan jamana ɲɛmɔgɔw ye ba don u ka koɲɛ na an ka jamana kɔnɔ. Kunun novanburukalo tile 11 san 2024, laadatigiw tɔgɔladon laɲɛnamayali tako 3nan kɛnɛ sigira Bamakɔ lajɛkɛsoba CICB la.
A ɲɛmɔgɔya tun bɛ fɔkabɛn, bɛn ani hadamadenya donɲɔgɔnna minisiri Zenerali de kɔri darimɛ Isimayɛli Wage bolo. Ale tun ye furancɛlafanga jamanakuntigi Zenerali darimɛ Asimi Goyita nɔnabila ye. Bulonba kɔnseyew tun b’a kɛnɛ kan. Wagadugu laadatigiw ɲɛmɔgɔba Mogo Naaba ka ciden Kileman Ewarisiti Uruwanba Naaba Kiba, ka fara Nizɛri laadatigiw ka tɔn ɲɛmɔgɔba Isa Alifayizi Sise Sayidu kan, olu fana tun bɛ yen.
Laadatigiw tɔgɔladon laɲɛnamayali kolabɛnna tun ye seko ni dɔnko, lotoliko ani ɲɛ daamuda minisiri Andogoli Gindo ye. O bɛ laadatigiw jɔyɔrɔ lakodɔnni seereya hadamadenya ani seko ni dɔnko la danbew ni kɛtaw la hadamadenya donɲɔgɔnna nasira la Mali kɔnɔ. Don kɛrɛnkɛrɛnnen in sigira senkan san 2021, dekere n°2022-0128/PT-RM fɛ, min tara marisikalo tile 4 san 2022. O bɛ gɔfɛrɛnaman ŋaniya jira dɔ farali la laada ɲumanw ani sisan kow ni ɲɔgɔn cɛ fanga kan jamana yiriwacogo ɲuman na.
Cogoya don jamana furancɛlafanga ɲɛmɔgɔw bolo k’u ka bonya jira laadatigiw la ; olu minnu ka fanga sinsinnen don laadaw kan. A tako 3nan san 2024 in kɔnɔ, o bolila masalakun min kan, o ye « laadatigiw jɔyɔrɔ hadamadenya ani seko ni dɔnko danbew lakananni ni ladamuni na », Burukina faso ni Nizɛri laadatigiw farala a ko kan. Nin masalakun in bɛ laadatigiw jɔyɔrɔ nafa jira seko ni dɔnko danbew ani bɛn ɲɛtaa sabatili la an ka sigidaw la. A laɲinin ye ka Mali basigilen jɔ, ka sinsin an dabew kan.
Laadatigiw jɔyɔrɔ hadamadenya donɲɔgɔnna na, o ye koba ye ; kɛrɛnkɛrɛnnenya la gɛlɛya waati in na. Kileman Ewarisiti Uruwanba Naaba Kiba bolo, o min ye Wagadugu laadatigiso ɲɛmɔgɔba Mogo Naaba ka ciden ye, laadatigiw b’an sigidaw tariku an’u seko n’u dɔnko kɔnɔ. Sinsinyɔrɔ don ka nɔgɔya don basigiko la gɛlɛya waati la. O de kosɔn a y’a jira ko don in sigili senkan, o ye yiriwali motɛri ɲuman ye ka sira jɛ laadaw ni sisan kow cɛ. A k’u sendonni don kɛrɛnkɛrɛnnen in laɲɛnamayali la, o bɛ hakilila in nafa jira u bolo ; sabula u fana bɛ yiriwali kuntaala jan sɔrɔli de nɔfɛ an yɛrɛ kɔrɔ.
O sira kelen na, Nizɛri laadatigiw ka tɔnba ɲɛmɔgɔ Isa Alifayizi Sise Sayidu ye foli ni waleɲumandɔn kɛ ka ɲɛsin Mali, Burukina faso ani Nizɛri jamanakuntigiw ma baaraw kɛli la ɲɔgɔn fɛ AES kɔnfederasɔn kɔnɔ. A k’o de y’u jamana saba yeli sɛmɛntiya nin kɛnɛ kan.
BƐN NI DONƝƆGƆNNA SABABU- Bololabaara, seko ni dɔnko, lotoliko ani ɲɛ daamuda minisiri Andogoli Gindo y’a sinsin don kɛrɛnkɛrɛnnen in sigili senkan, o nafa kan kow mabɛnni na an ka fasojamaw cɛ. An ka laadaw tiɲɛnen an bolo, waajibi tun don ka cogoya sigi senkan, min b’an ka sigidaw tagan wurubali ma k’a sababu k’o danbetiɲɛ ye. A dɔnnen don, ko laadatigiw ka fanga bɛ tɛmɛn laadalakow kan, ka don fɔkabɛn, ɲɔgɔn bonya ani ɲɔgɔn dɛmɛn kɔnɔ. A ko laadatigiw de ye laadaw taganbaaw ani ko kɔrɔ ni ko kura kalabaaw ye ɲɔgɔn na.
Fɔkabɛn, bɛn ani hadamadenya donɲɔgɔnna minisiri Zenerali de kɔri darimɛ Isimayɛli Wage bolo, nafa min bɛ dɔ farali la laadatigiw jɔyɔrɔ fanga kan, o dɔ y’u sendonni ye furancɛlafanga tɛmɛnsira la.
A ko wajibi don u ni laadatigiw ka jɛ ka baara kɛ ɲɔgɔn fɛ bɛn sinsinni ani yiriwali kuntaala jan sabatili siratigɛ la ; kɛrɛnkɛrɛnneya la AES kɔnɔ. Minisiri Wage y’a ka nisɔndiya jira Nizɛri ni Burukina faso yeli la kɛnɛ in kan, sabula ko laadatigi bɛɛ jɔyɔrɔ ye kelen ye u sigidaw la.
A da sera laadaw donni ma ba la, o nafa ma an ka sigidaw la ; sabula k’u jɔyɔrɔ ka bon kosɛbɛ bɛn sinsinni ani kelenya mabɛnni na jamana kɔnɔ. A ko laadatigiw jɔyɔrɔ ka bon an ka sigidaw la, wa u jɔyɔrɔ ka bon fɔkabɛnko la jamana kɔnɔ, danbew taganbaa ɲumanw don, danbe minnu bɛ fasojama kelenna bugunnatigɛ kofɔ.
Zenerali de kɔri darimɛ Isimayɛli Wage ye dugutigiw, bugudatigiw ani kintigiw ka basigi an’u ka dɔnniyaw lakodɔn u ye, ka sɔrɔ ka hakililajigin kɛ, ko a ɲuman ye laadatigiw ni sisan fanga ka jɛ ka baaraw kɛ ɲɔgɔn fɛ, min b’a to an bɛ se ka Mali basigilen yiriwalilen jɔ, ka AES kɔnfederasɔn jamana tɔw jɔ o cogo kelen na.
Dɔkala Yusufu JARA
Amara Bɛni Yaya TARAWELE
Esɔri sɛbɛnnijɛkulu
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
