Jago kɔnnen kεlεli : Nin ɲɔgɔnna fεnw tun ma deli ka minε Kulukɔrɔ ani Bamakɔ duwaɲεw fε

K’a daminε utikalo la san 2023 Kulukɔrɔ ani Bamakɔ faaba dɔrɔn kɔnɔ, duwaɲεw y’u tεgε da jago kɔnnen tigilamɔgɔ caman kan. Dɔrɔgu suguya min bε wele kanabisi, sanu, sεsogo kεnε farininmugu, ka fara dunfεn suguya wεrεw kan, o caman de minεna. Nin ɲɔgɔnna tun ma deli ka sɔrɔ u la fɔlɔ.

Duwaɲεso bolofara min ɲεsinnen bε kunnafoniko ma jago kɔnnen kεlεli la, o ɲεmɔgɔba Ɛnsipεkitεri Amadu Sanɔgɔ ka fɔ la, mεrikiri kεsu 150 minεna jumadon desanburukalo tile 29 tεmεnnen in, Maliden dɔw ka samubɔ cakεda la Kεɲεba, Kita mara kɔnɔ. O hakεya bε se sefawari miliyɔn kεmε caman ma ; a yεrε ka surun miliyari kelen na.

O y’a sɔrɔ Bamakɔ (BMI) ye sεworo karitɔn 906 minε. O peselen surunyana tɔni 10 na. O hakεya bε se miliyɔn 16 ma. O karitɔnw bɔra Etazuni ani Alimaɲi. Ɛnsipεkitεri Zan n’a bε wele Jakarija Kulubali, o ka fɔ la, kunnafoni min sɔrɔla u kan desanburukalo tile 9 tεmεnnen in, o y’a jirala ko kurun dɔ bɔra an kεrεfε jamana dɔ la, ka na doni dɔ jigin Kuruba dankan na. Mɔbili bεnni dɔ bɔra Welesebugu ka na o kunbεn yen. O kεlen duwaɲεw ye dabali tigε k’o mɔbili nɔbɔ. U nana u tεgε da o kan Ɲamakɔrɔ sugu la Bamakɔ.

O don kelen na, Bamakɔ (BIM) ye farininmugu tɔni 105 ani dunfεn suguya wεrε tɔni 2 minε. O hakεya bε se sefawari miliyɔn 50 ma. Minisirisariya fila minnu tara jago kɔnnen kεlεli siratigε la, nin fεn minnu minεna o hukumu kɔnɔ. Sariya fɔlɔ ye n°09-1652/MIIC-MEF-MEP-MSIPC ye ; o tara zuluyekalo tile 08 san 2009, ka sεsogo donni kɔn fɔlɔ Mali kɔnɔ. A filanan ye n°2023-1960/MIC-MEF-SG ye ; o tara utikalo tile 11 san 2023, ka farininmugu ani dunfεn wεrεw donni kɔn fɔlɔ Mali kɔnɔ.

Ka kɔn o ɲε ni dɔgɔkun damadɔ ye, Lajinε fanfεla la, Bankumana (BMI) Kangaba mara kɔnɔ, o ye kanabisi biriki 300 minε. O girinya ye kg180 ye ani sanu kg24,500. A kεra nowanburukalo ani desanburukalo kɔnɔ. Mɔgɔ min bε Bankumana (BIM) ɲεmɔgɔ nɔ na fɔlɔ, n’o ye Bubakari Dεse Sisɔkɔ ye, o ka fɔ la, u sigara mɔbili dɔ de la, taamaden si tun tε mɔbili kaari in kɔnɔ min tε Mali mɔbili ye, k’o lajɔ k’o larawe. O y’a kun ɲε. O de ye duwaɲεw sɔmi. U donnen ka sigilanw kɔrɔta, u ye yɔrɔ dɔw labεnnen ye minεndogo kama. Kanabisi birikiden 300 bɔra o kɔnɔ.

Desanburukalo tεmεnnen in tile 8, Kati duwaɲεw ye sanu kg24.250 kg minε. O hakεya bε se sefawari miliyɔn 557 ma. O duwaɲεso in ɲεmɔgɔ-dankan Daramani Tarawale ka fɔ la, u tun ye kunnafoni sɔrɔ, ko sanu bε mɔbili « Lexus » dɔ kɔnɔ ka bɔ Lajinε. U sɔrɔla k’o mɔbili in surutaama fo ka se Samankɔ peyazi ma, k’a minε yen a jɔlen, ka taa n’a ye u dagayɔrɔ la. Laraweli senfε, u bɔra bɔrε fila kan ; sanu kobali kg22 ani kolen kg2,250 b’u kɔnɔ. A fila girinya ye kg24.250 ye.

Abubakari TARAWELE

Dɔkala Yusufu JARA