Kalabankɔrɔ - Torokɔrɔbugu : Furancε in taama ye patisakana ye

Kalabankɔrɔ ye Bamakɔ dafεkin dɔ ye. Kabini sɔgɔma joona, jama b’a kε sira in kan. Mototigiw ni mɔbilitigiw bε sɔrɔba ɲɔgɔn na. Sennamɔgɔw kεrεbεtε. Kuma tε denmisεnnin minnu b’u a kalanyɔrɔw sεgεrε. N’i ye bɔlɔnw minε o ka jugu n’a bεε ye. Sugu bε bɔlɔn fan fila fε ; mɔgɔw b’u ka tabaliw sigi fo tεmεnsiraw kan. Taakasegin ma nɔgɔ yɔrɔ in na.

Mɔgɔ minnu bε taa u ka baarakεyɔrɔw la, olu b’a fisaya ka gitɔrɔnba kelen in minε. Kabini sɔgɔma joona, o gitɔrɔn bε fa tewu jama na. Mɔbilitigi fara mototigi kan, bεε b’a jilaja a yεrε ye taasirako la. Tuma dɔw la u bε tuntun ɲɔgɔn kan, sennamɔgɔw tε tεmεnda sɔrɔ u fε. A dɔw bε hinε sennamɔgɔw la ka sira di u ma u ka tεmεn. Dɔw fana b’u funun ka don u ɲεkɔrɔ. Denmisεnnin caman jɔlen bε mεεn makɔnɔni na, k’a sɔrɔ a ma se ka tεmεn ka taa a ka kalanyɔrɔ la.

Sorobaɲagami dan ye Kalabankɔrɔ-Torokɔrɔbugu furancε ye. Diɲε don o don lakɔliden ninnu bε farati dankan na. Nka a bε kε cogo di ? Wajibi ye kalanyɔrɔlataa ye. Kɔrɔbalenw bε to ka fitininw bolo minε ka tεmεn n’u ye bolifεnw ni ɲɔgɔn cε. Denmisεn ni mɔgɔkɔrɔba, a fεn o fεn bε sira in fε, u mako tε ɲɔgɔn na. Bεε ko n kɔrɔtɔlen don.
Tuma dɔw la u bε kεlε wuli ka jɔ sira kan, fo polisiw bεna yɔrɔ labila taakaseginnaw ka se ka lafiyanin sɔrɔ. Nin jama suguyaw, mɔgɔ dusumango ka ca a la kosεbε. Bεε ko ne ye woro ye ; mɔgɔ si tε kaman ye. Kɔrɔtɔko jugu fε, bolifεntigi dɔw b’u fiyε ka tεmεn sirakunnayeelenw la, yεrεsagokε bolo ma.

Mototakisitigi dɔw b’u pεrεn-pεrεn denmisεnninw siratigεtɔ fε, k’u ka tεmεn ka bɔ u ɲε. Nin ko lafiɲε ye siraba sariya dɔnbaliya an’a labatobaliya ye. bεε da foronnen don ɲɔgɔn nɔfε ; kunfεko dan bεε don. U bε ɲɔgɔn tu tuma dɔw la, ka dɔ fara sira gerenni kan ka taa a fε.

Bamakɔ kɔnɔ sirako gεlεya n’a ta bεε, mɔgɔw bolo tε jigin. U b’a kε cogo o cogo, u b’o kε u ka se k’u taayɔrɔw lasɔrɔ. Duguba sigili n’a gεlεyaw don.

Aminata JIBO

Dɔkala Yusufu JARA