Kalanko cogoya lajεba : Ka kalan sigi sen ɲuman kan

Sigikafɔba min bε ka kε kalanko cogoya kan, a faso ta daminεna kunun tarata zanwuyekalo tile 16 san 2024 Bamakɔ lajεkεsoba (CICB) la. Baaraw daminεni ɲεmɔgɔya tun bε minisiriɲεmɔgɔ D^r Sogεli Kokala Mayiga bolo ; gɔfεrεnaman minisiriw tun b’a kεnε kan.

Kalan cogoya sigikafɔba laɲinin ye ka kuntilenna jεlen don kalan kεcogo kɔrɔ ka kεɲε ni an seko n’an danbe, an ka nafoloko an’an lamini cogoya ye faso nafoloko n’a hadamadenya yiriwali kama. Sigikafɔba in daminεna lasigidensow ni marayɔrɔw la. O marayɔrɔ 19 ni lasigidenso 6 ka lajεw daminεna zanwuyekalo tile 4 k’u kuncε a tile 6 san 2024 masalakun 18 kan. Fεn min ye faso tɔgɔla sigikafɔba ye kalanko cogoya kan, o bε kuncε zanwuyekalo tile 19 san 2024. A bε dabɔ ka laɲinin kuraw kε mɔgɔlawoloma t’a la, kalanko sigili la sen ɲuman kan, ka jamana yεrεmahɔrɔnyanen jɔ ani ka yεlεma ɲuman don Maliden cogoya la.

Kalanko cogoya sigikafɔba kolabεnjεkulu kuntigi Kuluɲa Ɛdimɔn Danbεlε ye ɲεfɔli kε, ko lajε in ɲεbila labεnw na, kolabεnjεkulu in ye sεgεsεgεliw kε kalanko cogoya kan jamana kɔnɔ. Laɲinin minnu kεra lajεw senfε k’olu fεsεfεsε k’a daminε yεlεma min donna kalanko cogoya la kabini san 1962, ka se kalanko yiriwali san tan baara bolodalen (Prodec) ma, ka fara an ka jamana kɔnɔ fεεrε tɔw kan. Kolabεnjεkulu ye kalan baara kεbaa bεε kumaɲɔgɔnya.

Kuluɲa Ɛdimɔn Danbεlε ye hakililajigin kε, ko tile damadɔ hakilila falen in labεnna masalakun minnu kan, olu bε boli karamɔgɔ ka baara, ani sannayεlεnkalan ani ɲininni karamɔgɔw ka baara kan.

Kalanko minisiri Amadu Si Sawanε ye ɲεfɔli kε, ko hakilila falen in laɲinin ye Malidenw ka se ka kuntilenna jεlen don kalanko kɔrɔ, kalan suguya jumεn de ka fisa denmisεnninw ma, min b’a to u bεna se ka Mali kε jamana farinba ye. Amadu Si Sawanε ye ɲεfɔli kε, ko kolabεnjεkulu ka fεεrε kεra Malidenw haminankow tali ye.

A ko lajε minnu kεra, olu bangera jaabi caman na kalan siniɲεsigiko la. O jaabiw bε tali kε karamɔgɔ ka mara walanwalanni na, nɔrɔnkola ani jεlenya, ka kalanbolo kuraw sira dayεlε baaradegekalanw kan. Kalan min bε baara lase kalanden ma ka sinsin o kan ani kalanbolow ka tali kε ɲɔgɔn na.

Kalanko minisiri y’a kandi laɲininw waleyali kama sarati kutaala surun, kuntaa hakεlama ani kuntaala jan kɔnɔ. Minisiriɲεmɔgɔ ye jama fo kalanko cogoya lajε kεnε sigili la. A y’a jira k’u ŋaniya ye Mali kura ka se ka sigi lafiya, kow kεli ka ɲɔgɔn ta ani basigi kan, k’a sababu kε kalan ɲuman kεli ye denmisεnninw fε Mali kɔnɔ. A y’a ɲinin jama fε, u k’u sinsin an danbe ɲumanw kan an ka hadamadenya ni seko ni dɔnko yiriwali la, kalan ka kε baara sɔrɔli sira ye, ka fasokanw don ba la, ka kalanden hakε bεrε bεn kalansow kɔnɔ, ka wari don kalanko dafε ani ka kalan kuncεli kiimεni don dugumakalan na. D^r Sogεli Kokala Mayiga y’a ɲinin fana, u ka fεεrε tigε baara kεtaw waleyacogo la ka kεɲε ni kow bɔcogo ye ɲɔgɔn kɔrɔ, wari min b’a bɔ k’o dantigε ani ka saratiw da. A labanna k’a ɲinin jama ka fara furancεlafanga kan lafiya ani ku-ɲɔgɔn-kan sabatili la jamana kɔnɔ.

Kalanko cogoya sigikafɔba labεnni ye sigikafɔba (ANR) laɲininw dɔ ye Mali kura jɔli la. Zuluyekalo tεmεnnen in, kalanko cogoya sigikafɔba kεnε sigili kunnafoni dira furancεlafanga jamanakuntigi Kolonεli Asimi Goyita fε, a ka taama senfε Kayi mara la. O don ni bi cε, minisiriso naani y’u fanga fara ɲɔgɔn kan a baaraw labεnw na, min b’a to kalanko ka se ka sigi sen ɲuman kan an ka jamana kɔnɔ. N’o ye kalanko minisiriso, sannayεlεnkalan ni ɲininni minisiriso, cakεdako minisiriso ani mara ni desantaralizasɔn minisiriso. 

Mohamεdi JAWARA

Dɔkala Yusufu JARA