Ka kɛɲɛ ni furancɛlafanga jamanakuntigi ka magɛlɛyali ye araba nowanburukalo tile 27 minisirilajɛ senfɛ, minisiriɲɛmɔgɔ bɛ wulikajɔ suguya bɛɛ la, min b’a to kalata nataw bɛ se ka kɛ basigi ani jenlenya la, ka dan sigi furancɛlafanga la. O de hukumu kɔnɔ, minisiriɲɛmɔgɔ, mara ni desantaralizasɔn minisiri, a taara a ɲɛda kalata jɛkulu kɛrɛnkɛrɛnnen « Aige » baarakɛlaw kan teriya ani baaraɲɔgɔnya kɔnɔ.
Minisiriɲɛmɔgɔ dɛmɛnni minisiri Mamanin Nasire ka ɲɛsin politiki yɛlɛma kuraw ani kalataw senkɔrɔmadonni ma, o tun b’a kɛnɛ kan. « Aige » ɲɛmɔgɔ Mɛtiri Musutafa Sise y’a baaraɲɔgɔn kelenna jira minisiriɲɛmɔgɔ n’a taamaɲɔgɔn in na, ani labɛnw bɛ dakun min na k’o ɲɛfɔli k’u ye. N’o ye « Aige » bolofaraw sigili ye marabolo bɛɛ kɔnɔ ani lasigidensow ni kɔnsulaw la jamana kɔkan.
Mɛtiri Musutafa Sise ka ɲɛfɔli la, « Aige » sun an’a bolofaraw jamana tɔgɔ la, o ye mɔgɔ 6.460 ye an bɛ don min na ; cɛ ye mɔgɔ 5.523 y’o la. O bɛ bɛn a mumɛ 80% ma. Muso hakɛ ye 937 y’u cɛla. Wa u ye baara minnu kɛ kabini cakɛda in sigira senkan san 2023 zanwuyekalo kɔnɔ, a y’olu fana dantigɛ. A labanna k’a haminankow dajira minisiriɲɛmɔgɔ la. A y’a jira ko a mako b’o ka dɛmɛn na badenya kɔnɔ an’a jɔyɔrɔ kama u karankow waleyali la ; n’o y’u ka kɛtaw ye.
O siratigɛ la, Mɛtiri Musutafa Sise ko u ye fɛn minnu kɛ Mali kɔnɔ fɔlɔ, o ye baarakɛminɛnw labɛnni ye, u mako bɛna jɔ minnu na u ka baara kɔnɔ. O la, a jigi bɛ kalata kɛcogo kɔrɔ kan mɔgɔw delilen bɛ min na mara minisiriso, plotikitɔnw, jɛkulu minnu tɛ politikitɔnw ye ani ko dɔnbaa ŋanaw fɛ.
O de y’a to u ye u ka baarakɛlaw dege baara taabolow la, u ye layidu ta kiiriso ɲɛkɔrɔ baara min kɛli kama. A y’a jira minisiriɲɛmɔgɔ la tuguni, ko n’i kɛra « Aige » mɔgɔ ye, i kɛra faso tɔgɔla koɲɛnabɔla ye kalatako nasira, u ka kan k’o jɔyɔrɔ in fa laadiriya kɔnɔ.
Mɛtiri Musutafa Sise ko a ka mɔgɔw ye taama daminɛ yɔrɔw la, ka taa u ɲɛ da kalasɛbɛnw filiw latilenyɔrɔw kan kunun zanwuyekalo tile 2, ka baaraw kɛcogo lajɛ u bolo, ani ka baara kɛtaw mabɛnbaaw dege kow kɛcogo la ka kɛɲɛ ni sariya ka dantigɛcogo ye. O ye jɛkulu minnu ɲɛsinnen bɛ hakilila falenw ma ni mara minsiriso ye, politikitɔnw ani tɔn minnu tɛ politikitɔnw ye. Mɛtiri Sise bolo, u bilala ka taa ci min na, a kun dɔ ye ka jateminɛ kɛ minɛnko ni wariko cogoya la, mara minisiriso ye minnu bila u ka bolo kan, k’o cogoya dɔn, min b’a to u ka se k’u jɔyɔrɔ fa a ɲɛma kalataw donw na.
TELIYA ANI KƆRƆTƆKO JUGU KANA KƐ KELEN YE- Jaabili la, minisiriɲɛmɔgɔ y’a jira ko furancɛlafanga jamanakuntigi ye kuntilennasɛbɛn min don ale bolo nowanburukalo tile 27, sinsinbɔlɔ seegin b’o kɔnɔ. O sinsinbɔlɔ laban ye kalata nataw labɛnni ye basigi ani jɛlenya kɔnɔ, walasa ka dan sigi furancɛlafanga la. Zenerali de diwisɔn Abudulayi Mayiga bolo, cikan fila bɛ o sinsinbɔlɔ in kɔnɔ. A fɔlɔ, Zenerali darimɛ Asimi Goyita hami ye segin ka kɛ sariya ma basigi ani jɛlenya kɔnɔ. Ani ka sinsin cogoyaw kan an bɛ minnu sigi senkan a waleyali la. O siratigɛ la, jamanakuntigi b’a ɲinin an fɛ, an k’an fanga fara ɲɔgɔn kan baara kɛtaw sabatili kama.
Minisiriɲɛmɔgɔ ko a bɛ fasodenw ani diɲɛmaa ladɔnniya, ko baara min kalifara ale ma, a bɛna a cɛsiri a waleyali la ka teliya, ani fana k’a janto a kana kɛ kɔrɔtɔkojuguya kɔnɔ ; sabula teliya ani kɔrɔtɔko jugu tɛ kelen ye. A ye foli di « Aige » an’a ɲɛmɔgɔ ma, ka da a kan a sigilen ma san kelen kuntaala sɔrɔ, a sera ka kandili kalata labɛn sariyasunba kan ni wasa ye. O b’a jira ko seko ani dɔnkow b’an ka jamana na kalatako la. A ko fana, ko seginni sariya ma jamana maraliko la, o ye wajibi ye.
Nka, walasa kalataw ka se ka kɛ basigi ani jɛlenya kɔnɔ, fo kalata jɛkulu kɛrɛnkɛrɛnnen « Aige » ni mara minisiriso ka baara kɛ ɲɔgɔn fɛ. Baara kɛbaa bɛɛ fana ka sendon a tɛmɛnsira la ; kɛrɛnkɛrɛnnenya la politikitɔnw ani tɔn minnu tɛ politikitɔnw ye. A y’a jira ko u bɛ tɛmɛn ni baaraɲɔgɔnya ye n’olu ye ani k’u cɛsiri laɲininw sabatili fɛ. Minisiriɲɛmɔgɔ sɔrɔla k’a jira ko ale ka daw ani politiki yɛlɛma kuraw ni kalataw sankɔrɔmadonni minisiriso da yɛlɛlen don sanga ni waati bɛɛ la. Minisiriɲɛmɔgɔ dɛmɛnni minisiri y’a jira ko ale jigi sigira ni kalata jɛkulu kɛrɛnkɛrɛnnen sigili ye, ani kɛrɛnkɛrɛnnenya la, a bɛna ko bɛɛ kɛ, ka baara kɛ ni maraɲɛmɔgɔw hakililaw ye kalataw kɛcogo ɲuman siratigɛ la.
Dɔkala Yusufu JARA
Abubakari TARAWELE
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
