Jamana sɛgɛsɛgɛlikɛlaba ka kɔlɔsili bolila wariko majɛw kan « Camam » ka mara kɛcogo kɔnɔ mɔgɔko ani wariko la. Wo minnu yera mɔgɔko la, a ɲuman ye yɛlɛma ɲuman ka don kow tɛmɛnsiraw an’u waleyacogo la. O siratigɛ la, laɲinin jɔnjɔnw kɛra. Olu b’a ɲinin ka dɔ fara mara kɛcogo dabali tigɛlenw fanga kan, ka kow mabɛn ni sariyaw ni taabolow ye gɛrɛntɛ kɔnɔ, ani ka yɛlɛma ɲuman don kɔnɔnakow tɛmɛnsiraw la. Fɛn min ye wariko la majɛw ye, ka da u fanga bonyani kan, u koɲɛ donna kiiri tigilamɔgɔw bolo, sɛgɛsɛgɛliw ka kɛ, ni nɔminɛni b’a la o ka boloda. O tɛmɛnsira in b’a ɲinin ka jigisigi kɛ jɛlenya ani jɔyɔrɔ fali la wariko nasira la mɔgɔw fɛ, siga kɛlen don minnu na a kow la
Seereyasɛbɛn y’a jira ko « Canam » tɛ ka bɛnkan laɲininw labato dɔ bɔli la baara kɛtaw musakaw la. Faranfasiyali la, a kɔlɔsira ko gɛlɛya bɛ « Canam » ka kunnafoni dicogo la dɔ bɔli siratigɛ la baara kɛta dɔw musakaw la kɛsu min bɛ wele tubabukan daɲɛ surun na (CMSS) n’o kɔrɔ ye Mali kɛsu hadamadenya basigi la, o hakɛ tɛmɛnna dɔbɔta dantigɛlen kan.
Faso ka cakɛda min fana ɲɛsinnen bɛ kɔrɔ ɲɛsigili ma hadamadenya kɔnɔ n’o ye iyɛnipeyɛsi (INPS) ye, seereyasɛbɛn y’a jira ko dɔ bɔra baara kɛta minnu musakaw la, olu hakɛ bɛ dantigɛlen jukɔrɔ kosɛbɛ bɛnkan kɔnɔ. O ko ninnu bɛ mabɛnbaliya kofɔ ni sariya ani taabolow ye, karan ka kan ka kɛ minnu furakɛli ma teliya la, min b’a to jɛlenya bɛ se ka don kunnafoniko cogoya la nin cakɛda ninnu na.
BAARA KƐCOGO JUGUW ANI MAJƐW- Seereyasɛbɛn ka fɔ la, (CMSS) ma se ka dalilu kɛnɛman si di kow kɛcogo musakaw kan. O b’a jira ko a ma walanwalanni kɛ musaka min dabɔlen baara kɛtaw kama mara kɛcogo la, olu tɛmɛnna hakɛ dantigɛlen kan. O b’a jira fana, ko jɛlenya ma ye o musaka ninnu tɔpɔtɔcogo la.
A fɔra fana, ko INPS ye musaka dɔw sara mɔgɔ 115 ye sanni kow tɛmɛnsira yɛrɛ ka dagu dɔ bɔli siratigɛ la o hakɛw la. O b’a jira ko mabɛnni ka kɛ ni sariya dantigɛlen ye. Wa a bɛ filiw ani namaraw de kofɔ baara kɔnɔ. O kɔlɔsili ninnu b’a jira ko yɛlɛma ɲuman ka don kɔlɔsili kɛcogo la cakɛda la ani ka jɛlenya don wariko tɛmɛnsira la.
Wariko nasira la, seereyasɛbɛn ye gɛlɛya dɔw da kɛnɛ kan, karan ka kan ka kɛ minnu furakɛli ma AMO tɔnwari sarabaliya la baarakɛla dɔw fɛ Mali marayɔrɔ caman na ; kɛrɛnkɛrɛnnenya la Kayi, Kulukɔrɔ, Sikaso, Segu, Gawo ani Bamakɔ faaba yɛrɛ kɔnɔ. A sɛmɛntiyara ko baarakɛla 275 yera, minnu tɛ ka AMO sara. O juru mumɛ bɛ bɛn sefawari miliyari 19,396 ma INPS fanfɛ. O ye gɛlɛyaba ye cakɛda laɲininw na. O de la a bɛ wajibiya dabali jɔnjɔn ka tigɛ tɔnwari sarali la. Ka da a kan nin gɛlɛya in bɛ na ni jigisigibaliya ye o baarakɛla kofɔlen ninnu ka siniɲɛsigiko la, wa min fana ka kan ka k’u ye don nataw la, u tɛna se k’o sɔrɔ.
Seereyasɛbɛn ye kow kɛcogo jugu kɔlɔsi marayɔrɔw INPSiw ɲɛmɔgɔsow la. Mɔgɔ minnu ka baara ɲɛsinnen bɛ dɔ bɔli ma baara kɛtaw musakaw la, olu sen b’o waleya jugu in na, ka fara kɔlɔsilikɛlaw ni warimaralaw kan. A kɔlɔsira k’u ye namara kɛ ka musaka dɔw sara ɔridonansi dilannen dɔw la dɔgɔtɔrɔ dɔw fɛ, minnu yɛrɛ tɛ yen fiyewu Sikaso INPS la ani ka ɲinɛ ka dɔgɔtɔrɔ dɔw bugunnatigɛ kɛ ɔridonansi dɔw kan Segu INPS la. O namara ninnu ye sefawari dɔrɔmɛ ba bi wolonwula ni wolonwula ani bi naani ni kɔnɔntɔn (d77 049) wo jira.
Jamana sɛgɛsɛgɛlikɛlaba ka laɲinin ye mara kɛcogo majɛw furakɛli ye banako jigisigi wariko tɔpɔtɔli la ni jɛlenya donni ye baara kɛcogo la. Dɔ bɛ bɔ baara kɛta minnu musakaw la, ka dɔ fara o kɛcogo kɔlɔsili fanga kan, k’u mabɛn ni sariya ani taabolo dantigɛlenw ye, min b’a to jigisigi ka don foroba wari labaaracogo la, mɔgɔw ka hakɛ ye min ye u ka se k’o sɔrɔ.
O dun tɛ ɲɛ ni sariya ma labato, ka da a kan o b’a to fana, AMOko ka mɛɛn si la. O dabaliw b’a ɲinin ka yɛlɛma ɲuman don baara kɛtaw cogoya la, ka jɛlenya don wariko kɛcogo fana na. O siratigɛ la, seereyasɛbɛn b’a ɲinin « Canam » ɲɛmɔgɔba fɛ, a ka jateminɛ kɛ kosɛbɛ a ko la, dɔ ka kan ka bɔ baara kɛta minnu musakaw la ani dɔ man kan ka bɔ minnu taw la, namara kana k’a la tuguni ani min b’a to jigisigi ka don wari sɔrɔtaw tɔpɔtɔcogo la. A jirala fana, ko fɛn man kan ka bɔ ko minnu musakaw la, n’o kɛra a laseginni ka wajibiya kɛsu ma ka ɲangiliwari da a kan namaratɔ fɛ.
A sɛmɛntiyara seereyasɛbɛn fɛ, ko majɛ caman kɔlɔsira AMO tɔnwari sarali la INPS fɛ. O juru sarabali min yera, o hakɛ bɛ se sefawari miliyari 19,396 ma. O ye majɛba ye baara kɔnɔ. Gɛlɛyaw ni majɛw fana kɔlɔsira ɔridonansiw tɔpɔtɔcogo la. O majɛw hakɛ sera sefawari d77 049 ma, ka dɛn dɔ bɔli la ɔridonansi dɔw musakaw la, minnu ye namara labɛnnen ye. O de kosɔn o waleya ninnu koɲɛw donna kiiri tigilamɔgɔw bolo ; kɛrɛnkɛrɛnnenya la jamana kiiritigɛso sanfɛdan korokirɛni, ka ɲɛsin wariko kunkankow ma. Olu bɛ sɛgɛsɛgɛliw boloda majɛ kɔlɔsilen ninnu kan, min b’a to jigisigi bɛ se ka kɛ jɛlenya ani jɔyɔrɔ fali la wariko nasira la mɔgɔw fɛ, siga kɛlen don minnu na a kow la.
Dɔkala Yusufu JARA
Amara Bɛni Yaya TARAWELE
Esɔri sɛbɛnnijɛkulu
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
