KANI 2023 bonni kεra : Mali ni Tunizi kε kulu kelen kɔnɔ

Tunizi delila ka kupudafiriki ta san 2004, Afirikidisidi fana y’a ta san 1996. Hali n’i y’a sɔrɔ o jamana fila ni Mali bε kulu kelen kɔnɔ, an bε se k’a bisigiya, ko kuluntolantan in bonni ma kε ko goman ye Mali ma. U si ni Kɔnɔwari, Marɔku ani Sεnεgali tεna bεn kuluntolantan na. Nka, o n’a ta bεε, a bε se ka kε a tεna kε ntɔnjalantɔmɔ ye Samatasεgεw ɲεmɔgɔ Hamari Tarawele n’a tɔɲɔgɔnw bolo ; sabula u bεna sinaya saman kosεbε ni Tunizi ani Afirikidisidi ye kuluntolantan in na. Ka da a kan sεbεnw ka lagamucogo la, a b’i n’a fɔ o jamana fila in ka girin ni Mali ye.

Tunizi yεrε ye joli min tigε Mali la kupudimɔni tεmεnnen in ɲεbilantolantan laban na, o ma kεnεya halibi. An bε se k’a bissigya, k’u ka ɲɔgɔn sɔrɔ bε sɔn ka kε tajurusara ye. Tɔgɔba tε Namibi min na a ko la kosεbε, o bε sɔn k’a jigi da jamana farin ninnu fεgεnmanfan dɔ kan, ka dimi o la, ka yεlεma don kuma fɔlen kɔrɔw la. Hakililajigin na, Mali sen bɔra tulon na, kabini kupudafiriki tεmεnnen fila in kuluntolantanw na. 

Fεn min ye kulu tɔw ye, an bε se ka hakililajigin kε. Kɔnɔwari, Gine Bisawo, Gine Ekatoriyali ani Nizeriya, olu bε kulu kelen kɔnɔ. Sεnεgali min ye kupudafiriki tεmεnnen in ta, Kameruni, Ganbi ani Lajinε, olu bε kulu kelen kɔnɔ. Eziputi, Gana, Kapuwεri ani Mozanbiki, olu bε kulu kelen kɔnɔ.

KANI Kɔnɔwari san 2023 bε daminε zanwuyekalo tile 13 k’a kuncε feburuyekalo tile 11 san 2024 dugu duuru kɔnɔ : Abijan, Yamussokɔrɔ, Buwakε, San-Pedoro ani Korogo. Mali n’a ka kulu jamana tɔw dagayɔrɔ ye Korogo ye. A ntolantanw bεna kε Amadu Gɔn Kulubali tɔgɔlafarikoloɲεnajεkεyɔrɔ la. Mɔgɔ 20.000 bε se ka don yen.

NTOLANTANKULUW FILƐ

Kulu A (Abijan) : Kɔnɔwari, Nizeriya, Gine Ekatoriyali, Gine-Bisawo 

kulu B (Abijan) : Eziputi, Gana, Kapuwεri, Mozanbiki 

Kulu C (Yamusokɔrɔ) : Sεnεgali, Kameruni, Lajinε, Ganbi 

Kulu D (Buwakε) : Alizeri, Burukina Faso, Moritani, Angola 

Kulu E (Korogo) : Tunizi, Mali, Afirikidisidi, Namibi

Ladi Madiheri JABI

Dɔkala Yusufu JARA