Kabini Mali cidenkulu cunna Maputo kari tɛmɛnnen in, wulikajɔba bɛ sen na ka Sɛbɛw senkɔrɔmadon ; kɛrɛnkɛrɛnnenya la Malidenw fɛ, minnu sigilen bɛ Mozanbiki faaba la yen. Kabini cidenkulu cunna Maputo pankurujiginkɛnɛ na, Maputo Malidenw bɔra ni Mali darapo ye fan bɛɛ fɛ ka na Tɔmu Sɛnfiye n’a ka cɛdenw kunbɛn. Mɔgɔ min bɛ Mali ka lasigidenya jɔyɔrɔ la yen n’o ye Abubakri Daramera ye, o tun b’u cɛma.
Kuma wɛrɛ t’u da la fo Sɛgɛw ka sebaaya sɔrɔ Mozanbiki kan KANI 2025 ɲɛbila ntolantanw tile 5nan yɛrɛ la sanni se ka kɛ tile 6nan ma. Kabini jamana ɲɛmɔgɔw ye lasigiden (kɔnsulu) ladɔnniya ko Sɛgɛw bɛ taa balontan kɔmaseginni na Mozanbiki « Mambas » kama, u ye wulikajɔ daminɛ ka lajɛw kɛ ni Malidenw ye, minnu sigilen bɛ Maputo, labɛnw sabatili kama. O lajɛ dɔw kun ye ka Sɛgɛw lafaamuya u ka baara kɛ ni hakilisigi ye. Kɔnsulu ka fɔ la, senkɔrɔmadonnaw labɛnnen don, wa u jigi b’a kan fana ko Sɛgɛw ni sebaaya bɛ kɔsegin Bamakɔ.
Abubakari Daramera ye jigisigi kɛ. A y’a jira Sɛgɛw ɲɛmɔgɔ Iwu Bisuma n’a tɔɲɔgɔnw na kabini u kunbɛnyɔrɔ la pankurunda la, k’u tɛna kɛ fala ye olu fɛ yen. Wa k’u labɛnnen don ka tasuma da Mozanbiki « Mambas » tɛgɛ Maputo ni balontan kɛcogo ɲuman fana ye. Abubakari Daramera bolo, dabali bɛɛ tigɛlen don kunbɛnnikulu ni Mali ka kɔnsula fɛ Mozanbiki, min b’a to u bɛ se ka tagan tɔgɔtiɲɛwale bɛɛ ma gintan in kuntaala kɔnɔ.
A k’u dalen b’a la ko Mali bɛna se k’a ka sebaaya sɔrɔ nin janjo in senfɛ. Balontannaw ni galabu don, wa olu yɛrɛ fana bɛna u seko jira u la. Musa Ture min ye Sɛgɛw senkɔrɔmadonnaba ye, o fana ko ale dalen b’u la, wa k’a bɛ ntolantan jaabi dɔn kabini sisan : a k’a bɛ laban Mali ka 2-0 la. Ntolantanna tan ni wɔɔrɔ de sera Maputo fɔlɔ Sɛgɛw la, fo k’u ka farifoniko fɔlɔ kɛ kunun ntɛnɛn.
O ntolantannaw ye : Iwu Bisuma (Tottenham, Angiletɛri) Aliyu Jɛngi (Al-Okhdood, Arabi sawuditi), Mamadu Fofana (Amiens, Faransi), Sɛki Umaru Konate (Clermont Foot, Faransi), Mohamɛdi Kamara (Al-Sadd SC, Emira arabu uni), Mamadu Dunbiya (Watford, Angiletɛri), Ibarahima Kɔnɛ (Al-Okhdood, Arabi sawuditi), Foden Dukure (Red Star, Faransi), Jigi Jara (Young Africans, Tanzani) Yusufu Koyita, Usumani Jalo (Joliba) et Fadi S. Kulubali (Sitadimaliyɛn).
Sɛgɛw degelikaramɔgɔ Tɔmu Sɛnfiye y’a jira, ko a wasara ni taama kɛcogo ye, wa k’u bisimilala Maputo lotoli ɲɛnamaba dɔ kɔnɔ. A k’u ɲuman sera ni ntolantanna damadɔw ye ka fara ntolantan ɲɛmɔgɔw kan. A ko fɛn min ye ntolantanna welelelen tɔ ye, k’a jigi b’olu kan bi ni Ala sɔnna. Tɔmu Sɛnfiye ka fɔ la, Mozanbiki ye ntolantan jamanaba ye ; sabula a bɛ jɔyɔrɔ filanan na a ka kulu kɔnɔ kupudimɔni san 2026 ɲɛbila ntolantanw na.
A k’u ka laɲinin ye sebaaya sɔrɔli ye KANI 2025 kama. Ko n’u sera ka sebaaya sɔrɔ walima ka filaninbin kɛ 2-2, o bɛɛ da ka di Mali la. A k’a sago tɛ joginta ka bɔ a ka cɛdenw na ka baara gɛlɛya u bolo ; sabula u haminanko dɔ ye jɔyɔrɔ fɔlɔ sɔrɔli ye u ka kulu in kɔnɔ. Mali ni Mozanbiki fila bɛɛ ka kuru ye 8 ye tile 4 kɔfɛ, nka bi hakɛ danfara b’u ni ɲɔgɔn cɛ ka da u ye filaninbin min kɛ 1-1 ntolantan taali la Bamakɔ yan « 26Mars » farikoloɲɛnajɛkɛnɛ na
Dɔkala Yusufu JARA
Seyibou Sanbiri KAMISƆKƆ
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
