Kidali mara : Jamana bɔrɔtɔlaw tun bε faso nafolo yεlεma u kun cogo di ?

An ma tila Kidali dugu maracogo gundow dali la kεnε kan taɲinin kama jamana bɔrɔtɔlaw an’u dεmεnbaa kojugubakεlaw bolo. San tan ni kɔ kɔnɔ u tun ye Kidali mara k’u sago ye. Kabini Mali sɔrɔdasiw donna Kidali nowanburukalo tile 14 san 2023 tεmεnnen, mɔgɔw bε ka bɔ u ka dansagonwale suguya caman kalama. U tun ye Kidali mara k’a damana jamana ye diɲεmaa ɲεna, k’a sababu kε Alize bεnkan ye lafiya ni fɔkabεn sɔrɔli la Mali kɔnɔ.

Minisirijama min ye taama kε Kidali dɔgɔkun tεmεnnen, o sera k’a to dugu maracogo jugu ko dɔw ka da kεnε kan, jamana bɔrɔtɔlaw tun bε minnu kε. U tun bε faso nafolo de kunmaniya jama ma, ka laban ka jamana kεlε n’o ye. O waleya in ɲɔ tun ɲεnen don kosεbε sanni ka se furancεlafanga ma.

Dεmεnbaaw tun bε balo minnu di ka sigidalamɔgɔw bolomagεnni kama, marifatigikuluw tun b’o bεε kunmaniya u ma. U tun b’o balow feere k’o mari kε jamana sɔrɔdasiw kεlεli musaka ye.

Wari minnu bε ɲεsin lakɔlisow, kεnεyasow jɔli ani pɔnpew senni ma, marifatigikuluw jεɲɔgɔnw ye cakεdaw sigi senkan, minnu tun b’o wariw jaso k’u yεrε k’o baaraw kεbaa ye. O baaraw kεra o, u ma kε o, u kɔni tun bε a wariw labɔ. Nin waleya juguw kosɔn, gɔfεrεnaman ye sεgεn jugu sɔrɔ. Komini minnu bε jamana kɔrɔnyanfan fε yen, u tun bε wariw minε u la, k’u bεna baaraw k’u ka kominiw kɔnɔ ; kasɔrɔ u tun tε baara fosi kε u ye.

Nin waleya kofɔlenw dɔrɔn tun tε u ka warisɔrɔsiraw ye gɔfεrεnaman kɔkan. U y’u daji kε ɲɔgɔn da kɔnɔ, k’u sagolamɔgɔw coogo kominiw kunna. Kasɔrɔ o ma fɔ Alize bεnkan kɔnɔ. Fosi tun tε ka kε sariya kɔnɔ ; sabula u y’o mɔgɔ minnu kε kominiw ɲεmɔgɔw ye, olu tun kεra i n’a fɔ sigidalamɔgɔw ka mɔgɔ sugadilenw. U tun bε ko bεε kε jamana bɔrɔtɔlaw n’u dεmεnbaaw ka nafa kama ; ka jamana sɔrɔfεnw bisi k’u nɔɔnɔ bɔ u ka cakεda namaratɔ sigilenw ye.

Marayɔrɔ sεnεkεso ɲεmɔgɔya, marayɔrɔ jagoko soba ɲεmɔgɔya ani bololabaara soba ɲεmɔgɔya, nin bεε tun b’u bolo. Wa, a tun tε ku jamana na ka sεgεsεgεli boli o cakεda ninnu maracogo kan. O bεε tun bε marifatigikuluw sagoya la. Wari min bε sɔrɔ o cakεdaw la, o bε taa jamana sɔrɔdasiw kεlεli dafε.

Nin cogoyaw de la, u tun bε ka jamana yεrε sendon u ka kojugubakε ni diinε kεlε musaka bɔli la. U ka dabali tigεlen bεε tun ye ɲangata ye sigidalamɔgɔ tɔw kan. U tun b’u yεrε kε mɔgɔ jεlenw ye k’a sɔrɔ sariya sɔsɔlaw don. Jamana bɔrɔtɔla ninnu an’u dεmεnbaa kojugubakεlaw, wari minnu bε ɲεsin hadamadenya bajuw kama, u tun b’olu fana kunmaniya ka k’u yεrε kun ; ka sɔrɔ ka kule diɲεmaa dala, ko fanga bε k’a mako bɔ olu la, ko, ko sεbε fosi tε ka dilan olu ka yɔrɔw la.

SANIN KUN FILA WALE- Murutili jamana ma, ka fara jihadi bisigiyalen kan, olu kεra warisɔrɔsiraw ye. Faso wari yεlεmani kɔfε u kun, wari sɔrɔsira wεrεw tun b’u bolo. Marifatigikuluw an’u dεmεnbaa kojugubakεlaw tun bε sɔrɔba kε ninnu fε. Sanubɔ tun b’o la. Sanubɔ kεli yurugu-yurugu la. U tun bε takisiw bin sanubɔlaw kan, k’o minε ka k’u yεrε kun. O sanu sɔrɔta caman fana tun bε feere larabujamanaw na. U tun bε salen minε jagokεlaw la, ka wiɲεtiw dilan ka feere.

Nin kεwaleya jugu bεε tun ye marifatigikuluw an’u dεmεnbaa kojugubakεlaw nɔ ye ; wa faso tɔgɔla baarakεla dɔw tun y’u dεmεnbaaw ye nin kow la. Wari sɔrɔli nɔgɔya la, o ye o mɔgɔw bila ka dεmεn jamana bɔrɔtɔlaw an’u dεmεnbaa kojugubakεlaw fε, ka faso sigi a sentεgε kɔnɔ.

Se wεrε tun tε gɔfεrεnaman ye k’u filε u ka dansagonwalew la. O tun bε bεnkan jateminε, ka mɔgɔ ninnu fari saalo ka jigin. Hεrε fεn o fεn tun kun mana sin jamana ma, karan tun bε kε ka mɔgɔ jugu ninnu ta ɲεnabɔ o la joona. U tun jatelen don, i n’a fɔ hakε bε minnu bolo, nka kεta t’u ma. Fo k’u yεrε kε mɔgɔw ye, karan ka kan ka kε minnu kunko ma : Gɔfεrεnaman ye kurandi mansin minnu di Kidali mara yeelenko kama, jamana bɔrɔtɔlaw ɲεmɔgɔ dɔw y’olu kunmaliya dugu ma, ka taa u sigi u yεrεw ka duw kɔnɔ, mɔgɔ wεrε mako tε ɲε u la.

O t’a bεε ye. U ka laadalaɲεmɔgɔ joli bε jamana fangabulonw kɔnɔ ? Kasɔrɔ o dabɔkun tun ye u ka se ka mako ɲε u yεrεw an’u ka sigidaw ye, k’u senbɔ jamana bɔrɔtɔli la. O bεε la, a yera k’o caman balimakεw, walima u denw bε kojugubakεlaw ɲε ka faso kεlε. Jɔnnin bε se ka da o sanin kun fila wale la.

Sigida ɲεmɔgɔ dɔw ka o sanin kun filaya, ka fara nafolo sɔrɔli kan kojugubakε la, murutili jamana ma, o sinsinnen don o waleyaw de kan. Murutili jamana fanga ma u y’o kojugu kunyanfan ye, u ye gɔfεrεnaman tɔgɔlabaarakεla fana ye. I m’a dɔn ko laadaɲεmɔgɔ ninnu caman ye sanin kun fila ye. Nin bεε b’a niyɔrɔ sɔrɔ basigibaliya la jamana kɔrɔnyanfan fε kabini Mali y’a ka yεrεmahɔrɔnya ta.

A tuma sera sa, gɔfεrεnaman ka fu siri nin waleya juguw dan na, k’a ka fanga boli u kan. O tε baara ye, min bε se ka Mali kεɲε bi, sɔrɔdasiw tigεlen a kan k’u bε jamana dugukolo fan bεε lakanan, min b’a to gɔfεrεnaman bε se ka mara kε a cogo la jamanaden bεε ka nafa kama. Sigikafɔba min bεna kε Malidenw yεrε dama cε, o na se ka nɔbɔ a ko la kosεbε.

Sεbεnnijεkulu