Kojugubakε kεlεli : Sɔrɔdasiw ye bɔnε jigin kojugubakεlaw dagayɔrɔ caman kan

A bε waati jan bɔ, Mali sɔrɔdasiw bε ka fari kura da kojugubakε kεlεli la. N’o ye ka kojugubakεlaw ɲinin u mana sɔrɔ jamana yɔrɔ o yɔrɔ la, ka bɔnε jigin u kan, ani k’u bali ka labεnw sabati u ka waleya juguw kama. Mali sɔrɔdasiw ɲεmɔgɔso ka kunnafoniko cakεda « Dirpa » ka tile damadɔ in laseliw de b’o jira an na.

Laseli min yεrε kεra kunun an kɔrɔ, o bε misali bɔ. Sɔrɔdasiw ye kojugubakεlaw dagayɔrɔ caman bon ni pankurunw ye. A fɔlɔ kεra Muruja masurunna na kɔrɔnyanfan fε ni kilomεtεrε damadɔ ye Nara mara kɔnɔ. U ye kojugubakεlaw dagayɔrɔ dɔ bon yen ka caman faga. Sɔrɔdasiw ka wulikajɔw hukumu kɔnɔ jamana basigiliko la, u tun bɔra kojugubakεlaw dagayɔrɔ belebele dɔ kan Muruja dafεlaw la karidon desanburukalo tile 31 san 2023. U tun bɔra yen de ka na bin sɔrɔdasiw dagayɔrɔ kan Muruja.

Kojugubakεlaw dagayɔrɔ bonni filanan kεra Gire ni worodugu cε ka digi tilebin kan. U sera k’u ka mɔbili pikɔpu kelen tiɲε, k’o mɔgɔw fana faga. Ntεnεndon desanburukalo tile 25 san 2023, sɔrɔdasiw ye kojugubakεla caman faga u taatɔ Nawulenna. « Dirpa » ka fɔ la, sɔrɔdasiw coogora ka ɲε u dagayɔrɔw la, hali ni dɔw ni tora a kεlεw la.

U mana kojugubakεlaw dagayɔrɔ fεn o fεn lakodɔn, o bε bon ni pankurunw ye. Sibiri su desanburukalo tile 30 san 2023, aradariw ye kojugubakεla caman ye kεlεdegew la u dagayɔrɔba dɔ la Foyita, Moritani dancε masurunna na.

Sɔrɔdasiw mεεna k’u jate minε o farifoni na fo k’u tila, ka sira ta k’u kunda Mali kan. U y’u k’u kunbεn ka bɔnε jigin u ka mɔbiliw kan ni pankurun ye. Mɔgɔw tun bε ɲεfεmɔbili kɔnɔ, kεlεminεnw tun bε kɔfεta kɔnɔ. Jumadon sɔgɔma joona desanburukalo tile 29 san 2023, kojugubakεlaw ye Kidali bon ni mugu juguw ye. Sɔrɔdasiw wulila k’u nɔbɔ ka bɔnε jigin u kan.

U y’u dagayɔrɔ daga kolon ci, k’u ka minεn caman tiɲε. Pankurunw y’u bon mɔbili fila kɔnɔ. Fɔlɔ bonna Kidali woroduguyanfan fε ka digi kɔrɔn kan. Bonni filanan na, kojugubakεla tan ni duuru ɲɔgɔnna dajira ; olu tun dogolen bε jiritu la. Sɔrɔdasiw b’a da sigidalamɔgɔw tulo kan, k’u bε wulikajɔ suguya bεε la, min b’a to basigi ka se ka sabati jamana fan bεε fε.

Hakililajigin na, kojugubakε kεlεli wulikajɔ fanga bonyana kosεbε san 2023 in bantɔ. O wulikajɔba in de bε wele Dugukoloko. A laɲinin ye Mali sɔrɔdasiw ka se ka jεnsεn jamana fan bεε fε, Minusima taalen kɔ ka bɔ Mali kɔnɔ. Nin jaabi ɲumanw sɔrɔli sababu ye kεlεminεn nafamaw sɔrɔli ye gɔfεrεnaman fε ; i n’a fɔ mɔbiliw, pankurunw, doroniw ani aradariw. Kojugubakεla hakε min fagara kɔsa in na, a ka ca ni kεmε caman ye ; dɔw yεrε ɲεnamama minεna k’u don kiiri tigilamɔgɔw bolo. U sera ka kojugubakεlaw dagayɔrɔ caman tiɲε, ka kεlεminεn caman fana sɔrɔ u kɔ.

Furancεlafanga jamanakuntigi Kolonεli Asimi Goyita ka san kura laseli kɔnɔ, a y’a jira ko tεmεn bε kε ni kojugubakε kεlεli ye fo ka basigi don jamana fan bεε fε.  A ko Mali dugukolo sibiriɲε kelen tε to mɔgɔ si bolo, i k’i sago kε jamanadenw na.

A y’o ci min lase, o jεlen don i ko ntori tεgε. San 2023 kεra cogo min na kojugubakε kεlεli la, san 2024 ta bε juguya n’o ye. Sabula sɔrɔdasiw tigεlen don a kan, k’u t’a dabila ni sebaaya ma sɔrɔ a ko la, a ɲεma. Jamana ka lafiya de b’o la.

Suleyimani SIDIBE

Dɔkala Yusufu JARA