Kuranko gɛlɛya bɛ Mali kɔnɔ ; wa disidako caman b’a kɔnɔ kuran sɔrɔko an’a dicogo la. Kuran tigɛliba min bɛ sen na, o ka jugu mɔgɔw ma, minnu bɛ baara kɛ ni kuran ye ; wa o kɔlɔlɔ bɛ se ka yɛlɛn mɔgɔ wɛrɛ caman na, ka jamana ka sɔrɔ yiriwali sennasiri. O de hukumu kɔnɔ, minisiriɲɛmɔgɔ ye taama min kɛ ka taa a ɲɛ da Mali yeelenko ni jiko cakɛ ɲɛmɔgɔso kan, a tun y’a wajibiya u kan, u ka hakilila falenw kɛ ka jaabi di a ma gɛlɛya ninnu furakɛliko la. O de kɔmaseginni kɛra kunun, Mali yeelenko ni jiko ɲɛmɔgɔso la. Minisiriɲɛmɔgɔ Zenerali de diwisɔn Abudulayi Mayiga, ka fara Mali yeelenko ni jiko minisiri Bubakari Janɛ kan, olu tun b’a kɛnɛ kan.
Kuranko kunkankow dɔnbaa caman y’a fɛla dajira Mali kuranko gɛlɛya in furakɛli la an ka jamana kɔnɔ. O dajirali dɔw ye, tile kuranko yiriwali, yɛlɛma ɲuman donni kuranko cogoya la ani kuran sɔrɔli siraw lakurayali. EDM-SA ye kuntilennasɛbɛn bila baarakɛla bɛɛ ka bila la ɛntɛrinɛti kan, min b’a to bɛɛ sen ka don baara kɛtaw la ani ka dusu don ko kɛtaw ɲɛɲininni kɔnɔ.
Mali yeelenko ni jiko cakɛda ɲɛmɔgɔba Abudulayi Jibirili Jalo ye ɲɛfɔli kɛ, ko dajiraliw fɛsɛfɛsɛli ɛntɛrinɛti kan, o bɛ seereya bɔ fɛɛrɛ kuraw labaarali la, walasa ka se ka dɔ fara bɛnkanw tali fanga kan. A k’o fɛɛrɛ in sera k’a to u ka se ka hakilila sɔrɔlenw kulusigi ka kɛɲɛ n’u nafaw cogoyaw ye ani da donna masalakun minnu na, ka kɛɲɛ n’olu cogoyaw ye, ani fana, ka kuntilenna di baara kɛta nataw ma. Fɛɛrɛ kuraw ni ɛntɛrinɛtiko donni baara la, olu bɛ yeelenko ni jiko ŋaniya jira kuranko gɛlɛya in furakɛli la ni yɛlɛma ɲuman donni ye kuran sɔrɔli an’a dili la.
DAJIRALI 2.300 – EDM-SA baarakɛlaw ka kandili ni mɔgɔ 607 ka fɛlajira ye, o sera k’a to u ka se ka dajirali 2.300 sɔrɔ. O dajiraliw sinsinnen don kɛrɛnkɛrɛnnenya la dɔ faracogo kan kuran sɔrɔli fanga kan, dɔ farali marayɔrɔ ka kuran dita hakɛ kan ani wariko mɛɛnni si la. Fɛn min ye dɔ farali ye kuran sɔrɔli fanga kan, o de ye disidakoba ye kuran ɲininbaaw ka laɲinin jaabili la lamini lakananni kɔnɔ. Jalo ka fɔ la, dajirali 338 cɛla o siratigɛ la, EDM-SA ɲɛmɔgɔw hami ye tile kurandisow jɔli ye jigisigi ka se ka kɛ kuranko la. Baraziw ka kuran dita fanga bonyani bɛ se ka yiriwa ka fara o kan, ka dɔ bɔ an siriliba la taji ka kuran dita la.
Yɛlɛma donni kurandisow cogoyaw la, o bɛ se k’a to wariba ka bɔ ka don kurandiso kuraw jɔli dafɛ. O la, dɔ bɛ se ka fara kuran dili fanga kan a ɲininbaaw fɛ ni tile kuran fanga fara kɔrɔlenw kan. Nin dajirali ninnu ye hakililaw faralen ye ɲɔgɔn kan, kuran sɔrɔli la ka wasa waati kuntaala jan kɔnɔ.
Tile kuran farali kɔrɔlen kan, o bɛ taa ni wariladɛmɛn min bɛ kɛ mɔgɔw ye, minnu bɛ pano solɛriw sigi ka kuran feere a ɲininbaaw ma, ka dusu don olu kɔnɔ ka taa a fɛ. O wariladɛmɛnw bɛ nɔgɔya don tile kuran lasɔrɔli la denbayaw bolo, k’u sirilen bɔ EDM-SA ka kuran na.
Ka nafa bɔ marayɔrɔ ka kuran dita la, o fana ye EDM-SA hakilila dɔ ye. O la, dajirali 267 minnu kɛra o hukumu kɔnɔ, sinsin kɛra kuranw kalansoli sennateliyali kan ; i n’a fɔ Mali ni Lajinɛ-Konakiri cɛ. U ko a ɲuman ye ka dusu don kuran sɔrɔcogo bolofara cayali kɔnɔ. Kuran sanni b’o la fan wɛrɛw fɛ. K’o bɛ se ka dɔ bɔ kuran labaarali musaka la ani ka basigi don kuransiraw la.
Ka dɔ fara Mali ni Kɔnɔwari kuran kalansoli fanga kan EDM-SA ɲɛmɔggɔ ka fɔ la, k’o de bɛ se ka basigi don kuran sɔrɔli la. K’o waleyaw de bɛ se k’a to an ka se ka an dafɛjamanaw ka kuran nafa bɔ. EDM-SA ɲɛmɔgɔw ye dajirali minnu kɛ, n’o ye ka fɔkabɛn kɛ fɔlɔ n’an kɛrɛfɛjamanaw ye, k’o ye kuran sɔrɔcogo bolofara cayacogo dɔ ye, k’an fana sirilen bɔ kuran dibaa kelen na, ka dɔ bɔ kuranko gɛlɛya la.
WARIKO BILALI SIRA ƝUMAN KAN- Walasa ka se ka EDM-SA ka wariko bila sira ɲuman kan, dajirali dɔw kɛra, cakɛda in ka mara kɛcogo gɛrɛntɛli kama. Kuran sɔngɔ mabɛnni ye fɔlɔ ye walasa ka se ka jigisigi kɛ cakɛda mɛɛnni na si la ani kuran lasɔrɔli la mɔgɔw fɛ. Dɛmɛnwari dili kɛrɛnkɛrɛnni denbaya dɛsɛbaatɔw ye kuranko kama, nka ka janto kɛ EDM-SA ka sɔrɔ lakananni na. Ani kuran juru kɔrɔ bɛɛ kaninni ; kɛrɛnkɛrɛnnenya la minnu bɛ foroba cakɛdaw la, o ye EDM-SA haminankoba ye wari sɔrɔli la. U y’a ɲinin fana kuran sɔngɔ ka mabɛn ni a cogoya ɲuman ye izinintigiw ma, ani minnu wɛrɛ bɛ kuran jenin kosɛbɛ, ani ka dusu don pano solɛriw sigili kɔnɔ ni dɛmɛnwari dili ye o ko la.
Kunnafoni tɔpɔtɔli masalakun nafa bonyana kosɛbɛ ; sabula dajirali 243 kɛra o kan. O hakilila dɔw kɛra kanpaɲi dɔ labɛnni ye kunnafonidi kama ka ɲɛsin jama ma kuran ladonko ɲuman siratigɛ la. EDM-SA ɲɛmɔgɔw y’a ɲinin nɔgɔya ka don kow tɛmɛnsira la ka ɲɛsin kɛnyɛrɛye minnu b’a ɲinin ka pano solɛriw sigi yɔrɔw la ka kuran feere a ɲininbaaw ma.
A dajirala fana, basigi ka don mara kɛcogo la EDM-SA la, min b’a to tɛmɛn bɛ se ka kɛ ni poroze kuraw waleyali ye yɛlɛma ɲuman donni kama kow la waati kuntaala jan kɔnɔ. O fɛɛrɛw, n’u waleyara a ɲɛma, o bɛ sɔn k’a to nɔgɔyaba ka don kuranko la, ka dannaya to EDM-SA ni kurantalaw cɛ. Fɛɛrɛ kuntaala janw tigɛli kuranko nasira la, o bɛ na ni jigisigi ye waati kuntaala jan kɔnɔ. Dajirali 127 minnu kɛra o siratigɛ la, sinsin kɛra kuranko yiriwali kan.
DAJIRALIW WALEYALI- Nin bɛɛ la, kuranko gɛlɛya min bɛ Mali kɔnɔ, o ye disidako ye, min ɲɛ ka misɛn kosɛbɛ. A ɲuman ye furakɛcogo saba waleyali ye teliya la waati kuntaala jan kama. Gɔfɛrɛnaman ka dɛmɛn ani sɔngɔ ɲuman sigili kuran na, olu b’a to kuranko ka bila sira ɲuman kan. Ani fana, hakililaɲinin min hakilila tara minisiriɲɛmɔgɔ fɛ, o sera k’a to hakilila kuraw ka fara ɲɔgɔn kan, ka barika don baarakɛlaw taw la, fura ɲuman kuntaala jan sɔrɔli la. A bɛ EDM-SA baarakɛlaw ŋaniya jira dɛmɛn donni na kosɛbɛ kuranko gɛlɛya furaw ɲininni na.
Minisiriɲɛmɔgɔ ye foli di EDM-SA ɲɛmɔgɔso ma a ka baara kɛlen na. Wa k’u ka baara kɛlen lakodɔnni u ye, tɛmɛnni ni jɛkabaara ye, o daminɛ n’o ye ; sabula ko u bɛna taa baara tɔ kɛ minisiriɲɛmɔgɔso la.
Zenerali de diwisɔn Abudulayi Mayiga y’a faranfasiya ko fura minnu dajirala ni bɛn kɛra u kan, u yiriwali an’u waleyali b’ale ma. Jɛkabaara taali nin cogo la, o b’a ɲinin ka dɔ fara a ka fɔ la, kuran sɔrɔsiraw ɲɛni fanga kan an ka jamana kɔnɔ, ka jaabi ɲuman sɔrɔ fasojama ka laɲinin na kuranko la.
Minisiriɲɛmɔgɔ sinsinna jɛkabaara nafa kan fana, cakɛda in baarakɛlaw yɛrɛ dama cɛ Mali kuranko gɛlɛya furakɛli la. A ko a ka dannaya b’u kan, wa a b’a dɔn k’a dɔnniya fana b’u la. A ka fɔ la, furaw sɔrɔli gɛlɛyaw la, o bɛ bɔ EDM-SA sekow la. A k’a jigi bɛ dɛmɛnbaaw ka senkɔrɔmadonni kan ka taa a fɛ, walasa an ka se ka fura sɔrɔ kuranko gɛlɛya in na.
Dɔkala Yusufu JARA
Amara Bɛni Yaya TARAWELE
Esɔri sɛbɛnnijɛkulu
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
