Laadatigiw tɔgɔladon Mali kɔnɔ : Laadatigiw, bεn sinsinbaaw

A kεra nisɔndiyakoba ye. Taamasiyεnnanw k’u kanw na, laadafiniw b’u la, wa taamacogo yεrε bε maabaya jira… laadatigiw ye Bamakɔ lajεkεsoba CICB yεlεma sibiridon, k’a kε u ka bulonba ye, walasa ka se k’a ɲinin k’u jɔyɔrɔ jira fura sɔrɔli la fɔɲɔgɔnkɔw la an ka jamana kɔnɔ. U bɔra Mali fan bεε fε ka ɲɔgɔn dalajε yen nowanburukalo in tile 11 san 2023, k’u ka cεfɔli ni fɔkabεn jɔyɔrɔ jira.

Lajε in daminεni ɲεmɔgɔya tun bε mara ni desantaralizasɔn minisiri Kolonεli Abudulayi Mayiga bolo. Bololabaara, seko ni dɔnko, lotoliko ani ɲε daamuda minisiri Andogoli Gindo tun b’a kεrεfε. Minisiri caman wεrεw tun bε yen ; kεrεnkεrεnnenya la, jamana jɔli kura minisiri ka ɲεsin gɔfεrεnaman ni fangabulonw cε koɲεnabɔ ma Ibarahimu Ikasa Mayiga, fɔkabεn minisiri Kolonεli-Mazɔri Isimayεli Wage. Bamakɔ dugulenw ka maakɔrɔba Suleyimani Ɲarε, Kidali maakɔrɔba Bajan Agi Hamatu, nin bεε tun bε kεnε kan. Wele kεrεnkεrεnnen tun bilala Burukina faso Moro Naba ma ; nka a nɔnabila yera.

JAMANA ƝΕMƆGƆW SENKƆRƆMADONNI- Nin lajεba in senfε, laadatigiw y’a jira k’u ka senkɔrɔmadon bε furancεlafanga ɲεmɔgɔw ye, ka kε bonyamasegin ye ka ɲεsin jamanakuntigi Kolonεli Asimi Goyita ma, a kεli la k’a to tanga ka da u kan ni u tɔgɔladon sigili ye Mali kɔnɔ, k’o bεn san o san nowanburukalo tile 11 ma. Laadatigiw ka kumalasela Suleyimani Ɲarε y’a jira, ko u bε jamanakuntigi fo k’a waleɲumandɔn, tanga dali la u kan an ka jamana kɔnɔ. O siratigε la, u fana ka dεmεn b’a ye, min b’a to an ka jamana bε gεlεya min kɔnɔ, an fanga ka se k’o dabεn.

Kidali maakɔrɔba y’a jira, ko mɔgɔ minnu ye marifa ta k’u jigi da a tilali kan, ka fara u dεmεnbaa jugu tɔ bεε kan, olu de y’an ka jamana juguw ye. A ko olu labεnnen bε ka sa furancεlafanga dεmεnni na, an ka jamana ka se ka lafiya sɔrɔ. Ni mɔgɔ min y’a dɔn k’i tε Maliko la, o bε se ka taa jamana wεrε ɲinin a yεrε la ; Bajan Agi Hamatu ye nin laseli in kε u ka tamasεkibonda bεε tɔgɔ la, u ka duguw ni bugudaw la jamana kɔrɔnyanfan fε. Ale yεrε bolo, nin kεnε in bε dabɔ laadatigiw k’u jɔyɔrɔ fa fanga dεmεnni na. Sabula an ka jamana danbe an’a fanga sinsinyɔrɔ fɔlɔ ye laadatigiw ye.

Laadatigiw de ka kan ka kε bεn, basigi ni lafiya ani jamana kelenya sinsinbaa fɔlɔw ye. A labanna k’a ɲinin, ni lajεw bε se ka kε jamana marayɔrɔ bεε la laadatigiw cε, walasa u k’u sεbε don a ɲεma u jɔyɔrɔ fali la. Bajan Agi Hamatu ye taamasiyεnnan di mara ni desantaralizasɔn minisiri ma Mali kɔrɔnyanfan n’a cεmancε laadatigi bεε tɔgɔ la, a k’a di Kolonεli Asimi Goyita ma. Taamasiyεnnan in bε wele tubabukan na « tabulo ».

LAADATIGIW KA MARA KΕCOGO- Hakililajigin na, furancεlafanga jamanakuntigi Kolonεli Asimi Goyita de ye hakilila ta, ka nowanburukalo tile 11 kεrεnkεrεn Mali kɔnɔ, ka kε laadatigiw tɔgɔladon ye. A laɲinin ye jamana basigilen sɔrɔli ye, mara kε cogo ka ɲi min kɔnɔ, ka sinsin an danbe kɔrɔw kan. Seko ni dɔnko minisiri y’a jira, ko don kεrεnkεrεnnen in sigili senkan, o bε maakɔrɔbonya jira an ka jamana kɔnɔ. K’a jira k’u ma bila bolo kɔfε. A b’a to dannaya ka to u kan halibi u ka baara la, k’u sendon faso baara la, mara kεcogo ɲuman min b’u bolo ka fanga dεmεn n’o ye, ka lafiya ɲεtaa sabati, ka mɔgɔw tin don ɲɔgɔn na ka taa a fε, ka k’u-ɲɔgɔn-kan sabati jamana jɔli kura hukumu kɔnɔ.

Andogoli Gindo ka fɔ la, laadatigiw tɔgɔladon kεrεnkεrεnni laɲininba ye ka se k’u ka mara kεcogo dɔn a ɲεma, k’o waleya fɔɲɔgɔnkɔw kunbεnni an’u dalasali la. Fɔcogo wεrε la, a laɲininba ye ka sinsin laadatigiw ka mara kεcogo kan, fɔɲɔgɔnkɔw tɔpɔtɔli la. O de ye ɲinan masalakun sugandikun ye : « laadatigiw jɔyɔrɔ fɔɲɔgɔnkɔw kunbεnni an’u dalasali la ». Barosigiw kεra, ka ɲininkali-jaabiw kε masalakun in kan a dɔnbaa ŋanaw fε ; n'o ye ɲininnikεla minnu bε laadalakow kalama kosεbε. Mara minisiri min tun ye jamanakuntigi nɔnabila ye kεnε in kan, mɔgɔ minnu bε jamana kɔkɔrɔ, k’a lafasa, kεnε in y’u lakodɔnkεnε ye.

Kolonεli Abudulayi Mayiga y’a jira ko nafaba bε masalakun in na. A bε maakɔrɔbaya diya an’a nafa da kεnε kan sigi kɔnɔ. A nafa dɔ ye gεlεya minnu b’an senkɔrɔ an ka jamana kɔnɔ n’a ka ca ni san tan ye, fura ka sɔrɔ olu la cogoya ɲuman na. Ani u ka se k’u sendon lafiya sɔrɔli la. Laɲinin fana ye, ka se ka laadalamara kεcogo don ba la. Walasa o ka se ka kε, furancεlafanga jamanakuntigi Kolonεli Asimi Goyita y’a gεlεya gɔfεrεnaman ma, a ka bεnkan nafamaw ta, laadatigiw jɔyɔrɔw dantigεli la.

Umaru JAKITE

Dɔkala Yusufu JARA