A bε san caman bɔ, a kɔlɔsilen don ko AEEM tε k’a sigikun ɲε lakɔlidenw ni kalanden kɔrɔbaw lafasali la, ka kεɲε n’a laɲininw ye. Sanga ni waati bεε la, jalakili bε ka ta k’a sεgεrε ɲangatawalew la lakɔliw ni Iniwεrisitew la. Tuma caman na, kalandenw bε kari ɲɔgɔn na. U bε maramafεnw ta ɲɔgɔn kama jεkuluba in kɔnɔ. O siratigε la, mara ni desantaralizasɔn minisiri Kolonεli Abudulayi Mayiga y’a jira ko nin waleya minnu kɔlɔsira AEEM kunkan, minisirilajε y’a ci. A cili kunnafoni dara jamanadenw tulo kan ni laseli ye u ka lajε senfε.
Nin ŋaniya min tara ka AEEM ci, a kεra lεrε 24 sigikafɔba min kεra kalanko kan (EGE), o laselisεbεn donnen furancεlafanga jamanakuntigi bolo. A kεra kasaara min fana kεra a tε tεmεn dɔgɔkun damadɔ kan fɔlɔ. Kalanden kɔrɔba dɔ ni tora o la. Sinaya bε kalanden kɔrɔba minnu cε, olu de karila ɲɔgɔn na fo ka saya bɔ o la ; mɔgɔ caman fana joginna a la. Sabula mugukan min bɔra tariku ni dugukolokalan Iniwεrisite (FHG) la ani Iniwεrisite min ɲεsinnen bε maraliko ma (IUG), ani Iniwεrisite min ɲεsinnen bε hadamadenya dɔnniyaw ni maraliko ma Bamakɔ (USSGB), kasaara in ju y’o ye. Nin kεwale jugu ninnu sɔrɔla kalanden kɔrɔbaw ka AEEM biro falenni de senfε.
O kasaara min kεra feburuyekalo sawaati la, sannayεlεn ni ɲininni minisiri tun ye laseli kε, ka diɲεmaa ladɔnniya, ko ka AEEM ka baaraw lajɔ, o kana bila ka balan kɔnɔ lakɔliw ni sannayεlεn kalansow la fo ka taa a fɔ min kεra. Minisiri k’o ŋaniya in bεnna Iniwεrisitew mɔgɔ caman ma ; sabula u ka ko tun kεra damatεmεn ye ka da u kεle juwu kan kalanyɔrɔw la, ka basigibaliya fang awara kosεbε u ka birow ni ɲɔgɔn cε. Sannayεlεnkalan ni ɲininni minisiri tun y’a jira, ko AEEM ka baaraw bε lajɔ fo ŋaniya kura ka ta u kan, ka dansagonmɔgɔw sεbεkɔrɔ ɲangi u cεla. A tun labanna ka jigisigi kuma fɔ, ko a ka minisiriso bεna a seko kε Iniwεrisitew kεnεw basigili la.
Ɲangatawalew lakɔliw ani Iniwεrisitew kεnεw kan, o lagosili tun bε bεε da la. AEEM tun kεlen bε kojugubakεlaw dogoyɔrɔ ye, k’u malasa mɔgɔ tɔw sen na u yεrεw ka nafa kama, walima ka basigibaliya don yɔrɔw la. AEEM yεrε tun sinnen bε ka yεlεma ka kε lafasalitɔn ye, kasɔrɔ o yamaruya t’a bolo. O de tun bε k’a ɲεmɔgɔw kafa k’u yaada, ko fosi baasima tε se u ma, hali n’u ye jahanama sigi lakɔlidenw, kalanden kɔrɔba tɔw, denmansaw ani lakɔlikaramɔgɔw kun. Ko o ko tun mana dabɔ jamana in kɔnɔ, u tun b’u disi gosi kafa yεrε bolo ma, ka bagabagaliw kε ni baarabilaw ye. politikitɔn minnu fana b’u kɔkɔrɔ dogo la, olu b’u tɔ lasu ka kε fanga kan.
O siratigε la, AEEM tun kεlen bε fεn jugu ye Mali kalan ma. O de kosɔn mɔgɔ caman tun b’a la k’a ɲinin AEEM yεrε ka ci siɲε kelen. Sannayεlεnkalanso min ɲεsinnen bε kelenna hakεw dɔnniyaw ma (Fdpri) o tun y’o sekeretεi zenerali Isaka Kulubali hakiilila ye, a ɲininkalen kunnafonisεbεn « Esɔri » fε. O tun ye kεnyεrεye Lise « les Castors » kalanko ɲεmɔgɔba Adama Yatara fana hakilila ye. O k’ale tun bε hami, ko don nataw la, ni jamana ɲεmɔgɔw tεna farinya ka AEEM ci ka bɔ yen pewu. Ka da a kan olu ka kalanso bε kuluju la ; sanga ni waati bεε la kalanden kɔrɔbaw mana wuli u ka mankanw na, o gεrεgεrε bε yεlεn yen na.
AEEM ɲεmɔgɔ dɔw ka nin dansagonwale caman sababu tun ye wariko ye. U tun b’u yεrε kε kalanden tɔw dεmεnbaaw ye, k’a sɔrɔ u b’u dɔrɔn ka nafa nɔfε. Kalanden kɔrɔbaw siyɔrɔw an’u ka bolifεnw jɔyɔrɔw mara tun b’u bolo. U tun bε dɔ tigε hali dɔw ka kalanwariw (burusiw) la. Kεlε ninnu caman de tun bε sɔrɔ o warikow nɔfε. O de kosɔn AEEM biro dɔw tun kεlen bε bama ɲin kurunw ye ; sanga ni waati bεε la, n’u karila ɲɔgɔn na, u bε berew, besew ani marifaw yεrε ta ɲɔgɔn kama o miliyɔnw sɔrɔtaw kεsu sɔrɔli la ka bila u ka bolo kan.
AEEM tun kεlen bε jεkulu farinba ye, Iniwεrisitew maraɲεmɔgɔw yεrε tun bε siran min ɲε. Fo olu tun bε wajibiya ka polisiw wele tuma dɔw la, k’u dandan ka bɔ n’u ye mankanw cεla. AEEM sekeretεri zenerali tun jatelen bε i n’a fɔ faamaden ; a tun tε siran fanga ɲε hali dɔɔnin.
Waati tun sera sa, jamana ɲεmɔgɔw k’u jɔ u jɔyɔrɔ la, ka ntura ta a gere ma ; n’o ye ka AEEM ci bɔgɔbɔgɔ.
Sεki Mukutari TARAWELE et
Dɔkala Yusufu Jara
Ciden minnu bε Malidenw yεrε dama cε sigikafɔba kεnε kan, u y’a ŋaniya kumaɲɔgɔnya sigikafɔ in da ka yεlε kojugubakεlaw ye, ka silamεdiinε dungew don an n’u cε kɔrɔfɔw la. U y’a ɲinin fana, ko ka kuranko gεlεya furakε joona walasa hakilisigi ka na mɔgɔw la.
Faso tɔgɔla sigikafɔba min daminεnen filε, o bεna kε sababu ye Malidenw ka kumaɲɔgɔnyaw kε u ni ɲɔgɔn cε ka furaw dajira gεlεya kofɔlenw na. A ka kan ka se ka hadamadenya juru caanin an cε, ka dɔ fara ku-ɲɔgɔn-kan fanga kan ani ka na ni bεn kutaala jan ye..
Furancεlafanga jamanakuntigi Kolonεli Asimi Goyita ye laseli kε tarata awirilikalo tile 30 san 2024, ko gɔfεrεnaman bε sεnε kεfεn minnu di, tεmεn bε kε n’o ye. O siratigε la, angεrε (ire) kg50 bɔrε ye sefawari dɔrɔmε ba fila ani kεmε seegin (d2 800) ye, farafinnɔgɔ kg50 .
San o san mεkalo tile 1lɔ ye baarakεlaw tɔgɔladon ye diɲε kɔnɔ. O hukumu kɔnɔ, Mali baarakεlaw lafasatɔn minnu bε UNTM jεkuluba kɔnɔ, olu ye yεrεjirataama kε jamana ka yεrεmahɔrɔnya kεnεba kan. A kεra kεnε ye, min kɔrɔfɔw bolila hadamadenya basigili ni ɲεtaa laɲini.
Mali sɔrɔdasiw ye kojugubakεla Hugo faga Indelimani kεlεdaga la Gawo mara la. Kabini Mali y’a ŋaniya k’a mεru don Irisijamana na sɔrɔdasiko nasira la, an ka lakananbaaw b’a la ka sebaayaw sɔrɔ dɔrɔn kojugubakεlaw kan..
UNTM biro kura mɔgɔ ye 53 ye. U ye lahidu ta, ko furakεcogo ani laɲinin minu kεra a ka sigikafɔw senfε, olu bεna kε sisinnan ye sarati kura in kɔnɔ.
