Mali basigili : Agelihɔku bε sɔrɔdasiw sagoya la

Nin ye tariku bɔ. Agelihɔku min, n’an ka sɔrɔdasi caman fagara kojugubakεlaw fε san 2012 feburuyekalo la, a dugu bε sɔrɔdasiw sagoya la bi.

Nin laseli in kεra Mali sɔrɔdasiw ɲεmɔgɔso ka kunnafoniko cakεda « Dirpa » ɲεmɔgɔba fε araba desanburukalo tile 20 san 2023. A ka fɔ la, Agelihɔku bε Mali bolo a ɲεma. A y’a jira, ko sɔrɔdasiw bε wulikajɔ min na sisan, o ye jamana basigili baaraw ye, fanga ka se ka sigi fan bεε fε.

Mali sɔrɔdasiw ɲεmɔgɔso ka kunnafoniko ɲεmɔgɔba Kolonεli -Mazɔri Suleyimani Danbεlε y’a sinsin nin kow kan, ka foli ni tanuni lase sɔrɔdasiw ma. A labanna k’a ɲinin sigidalamɔgɔw fε, u k’u janto u yεrε la, ani ka sɔrɔdasiw ka laadilikanw lamεn, k’u matarafa.

Agelihɔku ye taamasiyεn ye Mali gεlεla kɔnɔ. A ka ca ni san tan ye bi, jamana in kεlε jugu daminεna yen. Kojugubakεlaw kεlen ka jamana kɔrɔnyanfan k’u sago ye, u ye Mali sɔrɔdasi minnu minε, u y’u faga fagacogo jugu la san 2012, k’u to k’u dagayɔrɔ lafasa. O waleya jugu in bε Malidenw hakili la halibi.

Mali sɔrɔdasiw y’a jira desanburukalo tile 18 san 2023, k’u bε wulikajɔw la, jamana basigili siratigε la. O dɔ ye Agelɔku ta in ye. Agelihɔku ni Kidali cε ye km150 ye.

Agelihɔku komini koorilamini ye km²22.000 ye. A jama hakε ye mɔgɔ 11.000 ye ; o ye san 2009 jatew ye. Komini in bε Tesali sεrεkili kɔnɔ, Kidali kεɲεkayanfan fε ; a ni Alizeri dancε fana ye km150 ye.

YƆRƆ LASƆRƆ GOMAN- Agelihɔku bε cεncεnfugaba kɔnɔ. A ni Tilεmusi cε ye km80 ye kεɲεkayanfan fε Adarari Ifigasi kɔnɔ, hahara cεcisiraba da la. A ni Gawo cε ye km430 ye kεɲεkayanfan fε. Kulu janw bε Agelihɔku komini kɔnɔ, kεrεnkεrεnnenya la Tigarigari kulu ; yɔrɔ lasɔrɔ goman don, jamana farabaw n’u dεmεnbaa kojugubakεlaw dogoyɔrɔ tun don. A mɔgɔw ka baara fanba ye baganmara ye.

 Hakililajigin na, ka kεɲε ni diɲε tɔnba ka sariya 2690 ye, Mali sɔrɔdasiw tun ka kan ka Minusima dagayɔrɔ bεε minε sanni san 2023 desanbutukalo tile 31 ka tεmεn. Minusima taali baaraw dakun fɔlɔ kɔnɔ, o min y‘a ta utikalo tile 1^lɔ ka sea tile 31 ma, Ogosagu, Gundamu ani Menaka dagayɔrɔw latεmεnna Mali sɔrɔdasiw ma nɔgɔya la.

Minusima bɔli dakun filanan kɔnɔ, o min y’a ta sεtanburukalo tile 1^lɔ la, ka se desanburukalo tile 31 ma san 2023, Minusima dagayɔrɔ Tesali, Agelihɔku, Ansɔngo, Kidali ani Duwazan, olu latεmεnna Mali sɔrɔdasiw ma. Nka gεlεya donna olu ta la ; sabula kojugubakεlaw tun y’a ɲinin k’u kanga o cε. U wulila k’u jɔ sɔrɔdasiw ɲε, ka bɔmuw don siraw kan, ka telefɔnisow tiɲε ka janfaw kε.

Ɔkutɔburukalo kɔnɔ, kojugubakεlaw tun y’u kali, k’u na ko bεε kε ka sira tigε Mali sɔrɔdasiw ni Anefisi lasɔrɔli cε ; o ni Kidali cε ye km112 ye. Nka nin na don tariku kɔnɔ ; nowanburukalo tile 14 san 2023, Mali sɔrɔdasiw y’u dankelentaama ka don Kidali, u kεlen kɔ k’u ka karangakogo daga kolon ci. O ni bi cε, jamana b’a la ka dɔ fara a fanga kan ni polisiw, zandaramaw, garidiw ani tasumafagalaw sigili ye fan caman fε, ka laban ka Kidali mara kɔnɔ ni gɔfεrεnεri kura zenerali Ɛlihaji Gamu sigili ye. Mɔgɔ minnu tun y’u sigiyɔrɔw bila kεlεw ɲε, olu b’a la ka kɔsegin sisan.

Abubakari TARAWELE

Dɔkala Yusufu JARA