Mali : Bulonba ye ɲεfɔli kε Mali, Burukina Faso ani Nizεri ka foroba laseli kan

-Ka hakilito kε, Mali, Burukina Faso ani Nizεri jamanakuntigi saba ninnu ka foroba laseli la zanwuyekalo tile 28 san 2024 ;

- Ka hakilito kε, ko (CEDEAO) laɲininw tun ye ninnu ye, ka tɔndenjamanaw dεmεn ka donɲɔgɔnna kεnεba sigi senkan, min bε se ka bange nafoloko donɲɔgɔnna na ;

- Ka hakilito kε, ko Afiriki tilebinyanfan nafoloko tɔnba (CEDEAO) sigikun a sigibaaw fε mεkalo tile 28 san 1975 Lagɔsi, Nizeriya faaba la, o dara kεrεfε ka ɲεsin kɔkan jamana fangamabaw nafaw makaranni ma ;

- Ka hakilito kε, ko (CEDEAO) yεlεmana sanw kɔnɔ, ka kε fεn jugu ye a jamanadenw ma ni ɲangili juguw tali ye k’u sεgεrε. Ɲangili minnu tε sariya kɔnɔ, u tε hadamadenya hakεw labato, mɔgɔ sεbε fana t’u ɲεsin a mɔgɔɲɔgɔn ma ;

- Ka hakilito kε (CEDEA0) jamanakuntigiw ka laseliw la kɔsa in na, k’u bε kεlε wuli ka Nizεri sεgεrε, jamana kεlen kɔ ka nɔbɔ kojugubakε kεlεli la ;

- Ka hakilito kε, ko san 49 kɔfε, (CEDEAO) ma se ka nɔbɔ donɲɔgɔnna sabatili waleyaw la jamanadenw cε, a ma se ka yεlεma ɲuman don jamanadenw dabolo la ;

- Jamanadenw haminankow lakodɔnnen u ye ani Mali, Burukina Faso ni Nizεri sɔrɔdasiw ka yεrεdi kojugubakε ani dansagonwale suguya bεε kεlεli ma, hadamaden ka hakεw labatoli kama ani diɲε hadamadenya hakεw labatoli kama ;

- Ka hakilito kε, ko lakananjεkulu Sahelikungo kɔnɔ (AES), o sigira senkan sεtanburukalo tile16 san 2023, a laɲinin ye ka fangaw fara ɲɔgɔn kan an disidali kama an ka foroba gεlεyaw la ;

- Ka hakilito kε, ko bulonba hakililaw nafa o (AES) sinsinni na Mali, Burukina faso ni Nizεri kunkan, o tε bin ;

- Ka hakilito kε (CEDEA0) jamanaw ka dεmεnbaliya la ka ɲεsin (AES) ma a ka don o don wulikajɔ la kojugubakε kεlεli la Sahelikungo kɔnɔ ;

Furancεlafanga bulonba kɔnseyejεkulu,

- Bε (AES) jamanaw ɲεmɔgɔw fo u ka yεrεmahɔrɔnya yεrε-yεrε sɔrɔli waleyaw la ani k’o hɔrɔnya walangata ka taa a fε ;

- B’a ɲinin jεɲɔgɔn bεε fε, a kεra jamana fila cε jεɲɔgɔn ye walima jamana caman cε jεɲɔgɔnw ye, u k’an ka jamanaw senkɔrɔmadon ani k’u dεmεn kojugubakε kεlεli la furancεlafanga ninnu ka se ka tiimε (AES) kɔnɔ ;

- B’a ɲinin jamanadenw fε kɔnɔna na ani kɔkan, ka fara jama fangama bεε kan jamana saba ninnu kɔnɔ, u ka fara ɲɔgɔn kan ka kε kelen ye, ka jε ɲɔgɔn ye, k’u ɲεnakala, ka wuli k’u fanga kε kelen ye fasoko la, ka to u ka furancεlafangaw ɲεmɔgɔw kɔ nin waati gεlεn in na an ka tariku kɔnɔ ;

- Bε lakananbaa bεε fo u ka sebaaya sɔrɔlenw na ɲɔgɔn fε, k’u fo u hakililaw la, minnu waleyali bε sen na, ani k’a ɲinin u fε, u k’u ɲεnakala, ka tεmεn n’u fangaw farali ye ɲɔgɔn kan kojugubakε ni dansagonwale suguya bεε kεlεli la ;

- Jεnna ni (AES) jamana saba ninnu ka ŋaniya talen ye, k’u foosi ka bɔ Afiriki tilebinyanfan nafoloko tɔnba (CEDEAO) la ;

- B’a ka dεmεn lakuraya ka ɲεsin (AES) jamanakuntigi ninnu ma : Kapitεni Ibarahimu Tarawele, Kolonεli Asimi Goyita ani Zenerali de birigadi Abudurahamani Tiyani, ani ka dusu don u kɔnɔ ka taa a fε u ka tεmεn n’u hakililaw ye furancεlafangaw tiimεniko la an’u ka jamanaw ka yεrεmahɔrɔnya yεrε-yεrε sɔrɔli la.  

Dɔkala Yusufu JARA