Mali-Irisi : Jεkabaara bolofara caman layiduw

Mali ni Irisila cε jεɲɔgɔnya cogoya ka ɲi kosεbε. U fila b’a fε ka dɔ fara u cε jεɲɔgɔnya fanga kan halibi, k’a yiriwa ani k’a bolofara caya ka taa a fε. Irisila lasigiden Igɔri Goromiko da sera o kumaw ma tarata desanburukalo tile 19 san 2023, a ni Mali furancεlafanga jamanakuntigi Kolonεli Asimi Goyita ka ɲɔgɔnye kuncεlen Kuluba.

O ɲɔgɔnye in senfε, Irisila lasigiden in ye ladiyalifεn di Mali jamanakuntigi ma. Hakililajiginnan don Irisila sanfεtaala dɔ ye nani min kε a ɲεda Mali kan, o bε waati jan bɔ sa. Ladiyalifεn in ye ja fila ye, Mali darapo ni Bamakɔ jaw b’a kan sanfε kabanɔgɔ la.

Igɔri Goromiko ka fɔ la, ladiyalifεn nafamaw don, sabula Mali darapo yεlεnna fo sanfε sanfεkow ɲεɲininbaaw bolo.

Mali furancεlafanga jamanakuntigi Kolonεli Asimi Goyita k’a ka nisɔndiya jira lafiyalifεn in sɔrɔli la. Irisila lasigiden k’u ye kumaɲɔgɔnyaw kε jamana fila ninnu cε nafakow kan Irisijamana jamanakuntigiso Kεrεmulεn ani Mali ta Kuluba kan.

O siratigε la, Irisila lasigiden ye hakililajigin kε, ko jεkabaara min bε jamana fila ninnu cε, a bolofara ka ca. Sɔrɔdasiko ni fεεrεko, ani hadamadenyako ni kalanko b’a la, ka fara yeelenko ni taamako kan. O de kosɔn, ɔkutɔburukalo ni nowanburukalo tεmεnnen in na, Mali minisiriw ye taakaseginw kε Musuku.

O taamadenw ɲεmɔgɔya tun bε Mali wariko n’a nafoloko minisiri Aluseni Sanu bolo. O kɔfε, Irisila jamanakuntigi Wiladimiri Putini fana ye cidenkuluba bila ka na Mali la, minnu ɲεmɔgɔya tun b’u ka minisiri-dankan fila bolo. O fila la, kelen ye lafasa minisiri-dankan ye, kelen dɔ ye nafoloko minisiri-dankan ye. O cidenkulu ni Mali gɔfεrεnaman minisiri caman ye baaraw kε, sanni k’u bisimila furancεlafanga jamanakuntigi Kolonεli Asimi Goyita fε.

O ɲɔgɔnyew kuncεlen, Mali ni Irisila bεnna a kan, ka cidenkuluba bila ka na Mali kɔnɔ, ka na jateminε kε Mali mako kan yeelenko nasira la. U da sera ko wεrεw ma, i n’a pankurunko, tεrεnko ani dugujukɔrɔfεnw ɲininni, ani kεrεnkεrεnnenya la, sateliti dɔ sigili sanfε Mali ye.

Irisiw k’o cidenkulu nana dɔgɔkun fila ɲɔgɔnna, Mali ka cidenw bɔlen kɔ u bara, n’u ɲεmɔgɔya tun bε furancεlafanga jamanakuntigi bolo, Irisila ni Afiriki ka lajεba 2nan senfε zuluyekalo tile 27 ka se a tile 28 ma san 2023, Sεn-Petεrisiburugu, Irisila yen.

Irisila-Afiriki lajε senfε, Irisila jamanakuntigi Wiladimiri Putini ni Mali furancεlafanga jamanakutigi Asimi Goyita ye ɲɔgɔnye kε. U ye hakililajigin kε jamana ninnu cε jεɲɔgɔnyakow la. Bεnkan minnu tara u ni ɲɔgɔn cε, o bεnna Mali furancεlafanga jamanakuntigi ma kosεbε.    

Abubakari TARAWELE

Dɔkala Yusufu JARA