Mali : Kidali tun maralen bε ni taɲinin ni maloyawalew ye marifatigikuluw fε

Mali sɔrɔdasiw donnen Kidali dugu kɔnɔ tarata nowanburukalo tile 14 san 2023, jama sεbεkɔrɔ bɔra k’u kunbεn ni nisɔndiya ye bɔlɔnw kɔnɔ, Mali darapo b’u bolo k’a kɔrɔta fan bεε fε. O nisɔndiya kun tun tε dɔwεrε ye Kidali dugu seginni jamana ka mara kɔnɔ, o nisɔndiya de tun don, ani kannabila ni lafiya sɔrɔlen k’u bɔ marifatigikuluw ka san tan ni kɔ gεrεntε kɔnɔ, olu minnu tun kεlen bε taɲininnaw ye.

Dɔnnibaaw ka fɔ la, taɲinin ani kojugubakε, danfara b’u cε ka da u labεncogo  an’u fanga cogoya kan sigidaw la. Nafoloba sɔrɔcogo bε taɲininnaw bolo. U bε foroba baara kεtaw kɔlɔsi, k’u malasa politikikow ni fangabulonkow la sigidaw la ani jamana kɔnɔ, k’u jigi da u yεrε ka sɔrɔdasiya sigilen kan, ani k’a ɲinin ka bεnkan don u ni sigidaw cε. Marifatigikulu minnu y’u bolonɔ bila Alize bεnkansεbεn na lafiya ni fɔkabεn sɔrɔli la Mali kɔnɔ, o dɔw tun kεlen bε o jεkulu suguyaw ye ; kasɔrɔ u tun b’o waleya in nkalontigiya diɲεmaa ɲεna, k’a jira k’olu ka laɲinin ye sigida jama nafaw lafasali ye. U ka baara tun tε dɔwεrε si ye, u yεrε dama ka taɲinin kɔ.

 U ka baara tun ye jumεn ye ?  Mali sɔrɔdasiw donnen Kidali, u ye ko caman sidɔn. U y’a kɔlɔsi, ko marifatigikuluw an’u ɲεmɔgɔ minnu y’u bolonɔ bila Alize bεnkansεbεn na lafiya ni fɔkabεn sɔrɔli la, u tun bε ka kuran ta tacogo juguw la, ka ji fana ta o tacogo jugu la. U tun tε kuran sara sango jisɔngɔ. U tun bε kuran ni ji sɔrɔ fu la faso tɔgɔlafεnw kan ten Kidali dugu kɔnɔ ; fo a dɔw tun bε ka nakɔninw da u ka dubaw kɔnɔ, ani ka mankalanninw mara u ka du dɔw kɔnɔ.

Mɔgɔ minnu bε nakɔw sɔn ka ji walangata ka don u kɔrɔ, ka sungosogow mara ka ji di u ma ka dugumɔgɔ tɔw to minɔgɔ ni sεgεn jugu la, o ye mɔgɔ suguya jumεn ye ? Ala de ye kiiri tigε u kan. U ka daanεjuguya bɔnε jiginna u yεrεw kan bi. Faantannin kule minnu bε sigidaw la, olu de tun bε kuransɔngɔ ni jisɔngɔ sara u ye. U b’o wariw minε ka jigin u kun hεrε bε si, hεrε bε tilen. Gɔfεrεnaman ani dεmεnbaaw tun bε kurandimansin minnu di dugu kama, u ka ɲεmɔgɔw tun b’o bεε kunmaniya dugumɔgɔw ma, ka taa u sigi u yεrεw ka so. U ye waati min kε ka dugu mara, u ma hami don si la ni jama ka hεrε ye.

Ŋaniya kelen min tun b’u la, o de ye yεrε nafaɲinin ye, ka nafolobaw kafo ka bila u kun. Marifatigikulu minnu y’u bolonɔ bila Alize bεnkansεbεn na lafiya ni fɔkabεn sɔrɔli la, olu n’u ka ɲεmɔgɔ dɔw ye foraziw senni u ka duw kɔnɔ ka satobaw sigi u la. Kasɔrɔ u tun dabɔra dugu kama.

KUNMANIYANI YE KOJUGUBAKƐ YE- Walasa u ka se k’u ka dansagonwalew kε a ɲεma, u ye jεkuluw sigi senkan dugu n’a fεnw marali kama. U tun bε wari minε mɔgɔw la faso tɔgɔlafεnw kan, i n’a fɔ wari min ɲεsinna koronawirisibana kεlεli ma ani min ɲεsinna lafiya ni fɔkabεn sabatili waleyaw ma. U ye nin bεε kunmaniya dugu ma k’u bugu a bεε kan. Faso tɔgɔlasow i n’a fɔ marayɔrɔ tɔgɔla baganmara ɲεmɔgɔsoba, o tun labεnna k’a kε jagokεyɔrɔw, baarakεbirow walima k’a tila-tila k’u feere u ka jεkulu sigilenw fε.

 Marifatigikuluw n’u jεɲɔgɔnw tun ye cakεda suguya bεε dɔ sigi senkan, ani dεmεndonjεkuluw (ONG) ni tɔnw, u yεrε nafa ɲininni kama. U tun dabɔra, walasa ka se ka sigida nafa bɔ a ɲεma. Soba ɲuman fεn o fεn bε Kidali dugu kɔnɔ n’u jɔra san labanw na, a bεε ye taɲininna ninnu taw ye. U y’u yεrε kε baana ye sigidalamɔgɔw kɔ kan ; wa u ka wulikajɔ kun tun tε dɔwεrε si ye, yεlεma kana se ka don kow cogoya la. U ka laɲinin tun ye ka to nin n-bε-n-diya in kɔnɔ.

Mɔgɔ o mɔgɔ ani cakεda fεn o fεn tun bε sanubɔ la Kidali mara kɔnɔ, marifatigikuluw tun bε salen minε a bεε la u yεrε ye. Kabini nowanburukalo tile 14 san 2023 Kidali seginna a cogo kɔrɔ la ; nka taɲininnaw ye gεrεntε min da sigidalamɔgɔw kan, o joliw na mεεn k’a sɔrɔ u ma suman. Dansagonwale ka kan ka furan ka bɔ Kidali mara mumε kɔnɔ ; sabula ni ɲani tε fila ye, u ye dɔ ye marifatigikuluw ni kojugubakεlaw bolo.