Mɔgɔ degunnenw
ka damakasili kεnε sigiko 27nan n’a bε wele tubakan daɲε
surun na (EID), o kεra kunun Bamakɔ
lajεkεsoba Seyisebe la ; minisiriw tun bε kεnε kan ; kεrεnkεrεnnenya
la, jamana jɔli
kura minisiri ka ɲεsin
gɔfεrεnaman ni
fangabulonw cε koɲεnabɔ
ma Ibarahimu Ikasa Mayiga ani jamana cεfɔlaba
Madamu Sanɔgɔ
Aminata Male.
Furancεlafanga jamanakuntigi kɔrɔ Pr
Jɔnkunda
Tarawele tun bε maaba welelenw na. Nin sigili in na, EID sekeretariya ye
damakasilisεbεn 599 sɔrɔ.
O ɲɔgɔnna sεbεn caman tun ma deli ka sɔrɔ fɔlɔ EID kunkan. O sεbεnw na, 22
bɔra Malidenw na,
minnu sigilen don kɔkan.
Sεbεn 599 ninnu na, 38 sugandira, minnu kalanna kεnε kan jama k’u lamεn, 404 bilala,
k’u kunnafoni tɔw
ka dafa, 153 ma ta ba la. Hakililajigin na, sεbεn 4 kunkanko ɲεnabɔra
sanni EID kεnε sigili baaraw labεnw ka kuncε.
I n’a fɔ
EID tεmεnnenw, ɲinan
sεbεnw fana kɔnɔko
fanba ye dugukoloko fɔɲɔgɔnkɔw ;
hakεw saraliko, kiiriw tigεkanw waleyabaliya, bilali hakεw kɔnɔ baarako nasira
la. A dɔw bε dεmεn ɲininni,
hadamadenya hakεw terekeli, laadatigiw ka gεlεyaw ani waleya dɔw
kofɔliw kan.
LADILANNI- Jamana
cεfɔlaba ye
hakililajigin kε, ko hadamadenw ka hakεw lakananni, u kelenna ye, ani u
jamakulu ye, k’o ye wajibi ye gɔfεrεnaman
kan. O siratigε la, Madamu Sanɔgɔ
Aminata Male y’a jira, ko maraden fεn o fεn, ni degun y’i sɔrɔ
k’a sababu kε fili, kunbɔnkola,
sennasumayako jugum ako ɲεnabɔli
la, walima fanga bolicogo jugu yaada kan, i yamaruyalen don ka laɲinin
kε i ka bila i ka hakεw kɔnɔ,
tiɲεni min donna i kun o nɔ ka ladilan, ni
kiiri tigεra n’o kan ye. Nka m’a ma ɲε
k’o bε se ka k’i ye, fo i fana k’i mabεn ni sariya ye.
Jamana cεfɔlaba ye gɔfεrεnaman
fo a ka cεsiri la jamana jɔli
kura hukumu kɔnɔ,
k’a sababu kε yεlεma kuraw ye politikikow ni fangabulonw cogoyaw la ; kεrεnkεrεnnenya
la, sariya tali furancεlafanga jamanakuntigi fε zuluyekalo tile 22 san 2023, ka
sariyasunba waleyali yamaruya di. Madamu Sanɔgɔ
Aminata Male fε, o sariyasunba in bεna an ka jamana dεmεn ka se ka fangabulon
kologεlεnw sigi senkan dannaya bε minnu kan. A y’a ka nisɔndiya
jira fana, kalata jεkulu kεrεnkεrεnnen « Aige » sigili la
senkan ; o min jɔyɔrɔ
bεna bonya kosεbε kalataw labεnni n’u
waleyali la jεlenya ani basigi kɔnɔ.
Jamana cεfɔlaba ye foli
fana kε dugujukɔrɔfεnko
sariya ani sigida kɔnɔko
waleyali yamaruya dili la jamanakuntigi fε utikalo kɔnɔ. O
waleya in bε hεrε kunbɔli
kofɔ jamana ani
jamanadenw ye wariko la, k’a sababu kε dugujukɔrɔfεnw
ye.
Jamana cεfɔlaba
ye foli ni tanuni ɲεsin
lakananbaaw ma Kidali bɔɔsili
la kojugubakεlaw n’u dεmεnbaaw la. O ye ɲεtaako
ye fanga seginni na jamana fan bεε fε. A b’a ɲinin
u fε halibi, u ka dɔ
fara wulikajɔ
fanga kan jamana danbe seginni na a ma, ka Malidenw ka yεrεmahɔrɔnya
segin u ma.
Jamana cεfɔlaba
ye ŋaniya siri, k’a ɲinin
Ala fε, kandili ani laɲinin
minnu kεlen filε nin sigili in senfε, jaabi ɲuman
ka bɔ u la
damakasilaw ka wasa kama. I n’a fɔ
kεnε fila tεmεnnen in taw cogoya, jalatigεla bεε tun ye Malidenw dama ye. A ɲεmɔgɔya
tun bε minisiri kɔrɔ
Haruna Sise bolo.
Hakililajigin na, EID sigiko 26nan na,
damakasilisεbεn 334 sɔrɔla.
Olu la, 243 tara ba la k’u kɔnɔkow
woloma. O sεbεn 243 la, 28 kalanna kεnε kan jama k’u lamεn, 215 bilala k’u
kunnafoni tɔw
ka dafa.
Sεbεn 28 minnu sugandira kalanni kama, jaabi dira
a bεε la minisirisow fε, o b’a jira ko a 100% bεε ɲεnabɔra.
A sεbεn 215 la, 207 minnu tun bilala k’u kunnafoni tɔw
ka dafa, jaabi sɔrɔla
u la ; o y’olu 96,27 % fana ɲεnabɔlen
ye. A tɔw bε ɲεnabɔli
sira kan minisirisow fε.
Bεnbabilen DUNBIYA
Dɔkala Yusufu JARA
Dɔkala Yusufu Jara
Ciden minnu bε Malidenw yεrε dama cε sigikafɔba kεnε kan, u y’a ŋaniya kumaɲɔgɔnya sigikafɔ in da ka yεlε kojugubakεlaw ye, ka silamεdiinε dungew don an n’u cε kɔrɔfɔw la. U y’a ɲinin fana, ko ka kuranko gεlεya furakε joona walasa hakilisigi ka na mɔgɔw la.
Faso tɔgɔla sigikafɔba min daminεnen filε, o bεna kε sababu ye Malidenw ka kumaɲɔgɔnyaw kε u ni ɲɔgɔn cε ka furaw dajira gεlεya kofɔlenw na. A ka kan ka se ka hadamadenya juru caanin an cε, ka dɔ fara ku-ɲɔgɔn-kan fanga kan ani ka na ni bεn kutaala jan ye..
Furancεlafanga jamanakuntigi Kolonεli Asimi Goyita ye laseli kε tarata awirilikalo tile 30 san 2024, ko gɔfεrεnaman bε sεnε kεfεn minnu di, tεmεn bε kε n’o ye. O siratigε la, angεrε (ire) kg50 bɔrε ye sefawari dɔrɔmε ba fila ani kεmε seegin (d2 800) ye, farafinnɔgɔ kg50 .
San o san mεkalo tile 1lɔ ye baarakεlaw tɔgɔladon ye diɲε kɔnɔ. O hukumu kɔnɔ, Mali baarakεlaw lafasatɔn minnu bε UNTM jεkuluba kɔnɔ, olu ye yεrεjirataama kε jamana ka yεrεmahɔrɔnya kεnεba kan. A kεra kεnε ye, min kɔrɔfɔw bolila hadamadenya basigili ni ɲεtaa laɲini.
Mali sɔrɔdasiw ye kojugubakεla Hugo faga Indelimani kεlεdaga la Gawo mara la. Kabini Mali y’a ŋaniya k’a mεru don Irisijamana na sɔrɔdasiko nasira la, an ka lakananbaaw b’a la ka sebaayaw sɔrɔ dɔrɔn kojugubakεlaw kan..
UNTM biro kura mɔgɔ ye 53 ye. U ye lahidu ta, ko furakεcogo ani laɲinin minu kεra a ka sigikafɔw senfε, olu bεna kε sisinnan ye sarati kura in kɔnɔ.
