Mali : Minusima taali kɔlɔlɔ nɔ ladilanni ka ca ni sefawari miliyari 809 ye

Faso k’o fεεrεgafe bε bolo kɔrɔ, min dabɔlen bε Minusima taali kɔlɔlɔ nɔ ladilanni kama an’a baara bolodacogo san 2024-2026 kuntaala kɔnɔ. Gafe in ye furaɲε 52 ye, sinsinbɔlɔ naani de bε fεεrεgafe in kɔnɔ, ka kεɲε ni dabali gonin tigεtaw ye ani jamana ka sɔrɔ ni hadamadenya hakilila yiriwali, ka sinsin politikiw ni baarabolodalenw waleyali kan. Fεεrεgafe in baara bolodacogo bεna waleya san saba kuntaala kɔnɔ, k’a daminε zanwuyekalo tile 1^lɔ la san 2024, ka se desanburukalo tile 31 ma san 2026. A musaka ka ca ni sefawari miliyari 809 ye ; gɔfεrεnaman ka dita bε kε 70% ye o musaka in na.

Faso ka cakεdako, baarako ani baaradege minisiri Madamu Bagayɔkɔ Aminata Tarawele ye poroze in dantigεli lajε ɲεmɔgɔya kε kunun tarata desanburukalo tile 12 san 2023, Mali makobatigiw ɲεmɔgɔso (CNPM) la. A ɲεfɔli kεra minisirisow ye.

Gafe in dilanna jεkabaara kɔnɔ ; faso ka baarakεminεn nafama don. A bε dabɔ Maliden minnu tun bε baara la Minusima bolo, o taali kɔlɔlɔ nɔ ladinanni kama an ka jamana fε. A sinsinnen don dabali gonin tigεtaw, sekow, baarasɔrɔ ani cakεdako hakilila ɲεtaa yiriwali kan, cakεdaw dεmεnni ani hadamadenya sabatili baara kεtaw kan.

Jaabiko nasira la, o sinsinbɔlɔ ninnu bεna se k’a to dɔ ka se ka wuli ka bɔ Minusima baara bilali kɔlɔlɔw la, k’o baarakεla kɔrɔ ninnu jigi sigi, ka dɔ fara denmisεnw sekow kan ani ka baara kura di u ma. Cakεda minnu fana jɔlen don, a bε kε sababu ye olu ka wuli, lakɔlidenw ka segin ka taa lakɔliw la yɔrɔw la, kalanko tun ye gεlεya ye yɔrɔ minnu na, ani ka yεlεma ɲuman don o yɔrɔw kεnεyako la.  Fεεrεgafe in b’a ɲinin fana ka poroze waleyalenw, minnu bε weleyali sira kan ani minnu waleyali ma daminε fɔlɔ, k’u cogoyaw dɔn. I n’a fɔ minnu bε baarako ni baaradegeko, kεnεyako, kalanko, jiko ani saniyako kan.

Minusima ka jate la, ale ka taali kɔlɔlɔ bε se a ka baarakεla kɔrɔ hakε min ma, o ye mɔgɔ 6.361 ye ; o hakε in na, mɔgɔ 3.390 ta tun ye baara kudayi ye. Baarakεla yεrε-yεrε hakε tun ye mɔgɔ 1.116 ye, nɔnabilala hakε tun ye mɔgɔ 2.274 ye ani waatila baarakεla 2.971 Minusima bolo. A dɔw tun bε baara kε cakεda dɔw fana tɔgɔ la, bεnkan bε minnu ni Minusima cε. Faso ka cakεdako, baarako ani baaradege minisiri fε, nin gafe kura in ye an balimaw ka jɔrε nɔgɔyali jigidalan ye.

Madamu Bagayɔkɔ Aminata Tarawele y’a jira, ko nin lajε kεnε in ye hakilila falen yɔrɔ ye gafe nafama in kan, a kɔnɔko ka se ka faamuya, ani k’a kunnafoni jεnsεn yɔrɔw la, min b’a to a waleyali bε se ka nɔgɔya. O siratigε la, a ye foli ni tanuni lase dεmεnbaaw ma, minnu ye gafe in dilan ni fasodenɲumanya hakilila ye.

Hakililajigin na, Mali gɔfεrεnaman y’a ɲinin diɲε tɔnba ONU fε zuwεnkalo tile 16 san 2023, ko Minusima ka taa ka bɔ Mali kɔnɔ ; wa ko, o taali in « kana bila ka balan kɔnɔ ». O de kɔsɔn diɲε tɔnba ka basigi sabatilijεkulu y’a ka lajεba sigiko 9.365nan min kε zuwεnkalo tile 30 san 2023, a ye sariya 2690 ta, ka Minusima ka baara ban Mali kɔnɔ, k’a daminε zuluyekalo tile 1^lɔ la k’a foori ka bεn ni desanburukalo tile 31 ye san 2023.

Wa Mali tun sigira n’a ye, ko kɔlɔlɔ bε Minusima taali la Malidenw kan. O de kosɔn jamana ɲεmɔgɔw ye dabalitigεw daminε. Faso ka fεεrεgafe in b’o la, walasa ka se ka dɔ bɔ Minusima taali kɔlɔlɔ la Malidenw kan. O fεεrεgafe in dilanni tun donna faso ka cakεdako, baarako ani baaradege minisriso bolo. Baarakεkulu 3nan min sigira senkan Minusima bɔli kunkanko dabalitigε kama, gafe in dilanni o hukumu kɔnɔ.

Fadi SISE

Dɔkala Yusufu JARA