Mali-Turukiye ka jεɲɔgɔnya : Hakilila falenw kεra jamanakuntigi ni kɔkankow minisiri-dankan cε

Mali furancεlafanga jamanakuntigi Kolonεli Asimi Goyita ye Turukiye kɔkankow minisiri-dankan ka ɲεsin Afiriki ni Muwayεn -oriyan cε ma, Ahamεti Yilidizi bisimila jamanakuntigiso la Kuluba kunun zanwuyekalo tile 30 san 2024. O tun nanen bε u ka jamanakuntigi Eresεpu Ɛridogani ka teriya ni badenya bataki don Mali jamanakuntigi bolo.

Lajε in senfε, mɔgɔ fila ninnu da sera jεɲɔgɔnya sira caman ma u ni ɲɔgɔn cε. Minisiri-dankan in ka kuma na, a y’a jira, k’u ye dɔ fɔ Mali ka sebaaya sɔrɔlen kan basigiko la, ka fara yiriwaliko kan Afiriki kɔnɔ. A k’u ye kunnafoni sɔrɔ Mali, Burukina Faso ani Nizεri ka lakananjεkulu (AES » kan.

Ahamεti Yilidizi k’a ye jamanakuntigi ladɔnniya a nakunw kan ntεnεndon ; ko gɔfεrεnaman minisiriw tun b’o kεnε kan. A y’a jira ko bεnkan dɔw tεmεnna u cε, minnu bε bolonɔbila kεnyεrεye yiriwali siratigε la ; kεrεnkεrεnnenya la takisi fila sarali kunbεnni nasira la.

Fεn min ye bεnkan ye baarabaw kunkan, n’a bε fɔ o ma tubabukan na εnfεsitiseman, o lakananni bolonɔbilala kaban. A waleyali fana bε sira ɲuman kan. Minisiri-dankan in ka fɔ la, a ɲuman ye ka sira fεεrε tigε, min b’a to Mali nafamafεnw hεrε bε se a ma. O ye fεεrεlako ye, kumaɲɔgɔnyaw ka kan ka kε minnu kan u ɲεdɔnni minisirisow fε.

Ahamεti Yilidizi ko a ye hakilila falen kε ni minisiriw ye dɔnniya dɔw kan ; i n’a fɔ kεnεyako ani iziniko. Olu ye waleyaw ye, minnu bε se ka kε waati kuntaala surun kɔnɔ.

Hakilila falenw fana kεra tεmεnni ani dɔ farali kuran sɔrɔli fanga kan Turukiye jamana fε, dɔ farali u ka pankurunko cakεda ka taakasegin hakε kan, an’u ka kalanso min bε wele « fɔndasɔn Maarifu », kumaɲɔgɔnya kεra o bεε kan minisiriw ni Turukiye ciden in cε.

Gɔfεrεnaman minisiri min ɲεsinnen bε ko min ma, o ye dajirali kε o kan. Minisiri-dankan ye jaabili kε, k’u ni olu k’o minisiriw bεna baara kε ɲɔgɔn fε ; wa fan fila bεε bεna a fεla fɔ ka jεya Mali ni Turukiye ka lajεba senfε zuwεnkalo nata in na Ankara. Furancεlafanga jamanakuntigi ye foli ni tanuni lase Turukiye jamana ma an dεmεnni na jεɲɔgɔnya in kɔnɔ basigi sabatili nasira la. Kumaɲɔgɔn in ko ni Ala sɔnna, foli in bε se u ka jamanakuntigi Ɛridogani ma.

O y’a sɔrɔ Turukiye kɔkankow minisiri-dankan ka ɲεsin Afiriki ni Muwayεn-Oriyan ma, a bisimilala minisiriɲεmɔgɔ D^r Sogεli Kokala Mayiga fε. Ahamεti Yilidizi ni gɔfεrεaman minisiriw fana tun ye ɲɔgɔnye kε kɔkankow ni diɲε tɔnbaw cε koɲεnabɔ minisiriso la ntεnεndon.

Lajε in kεra sababu ye, fan fila bεε ka ɲεfɔli kε an cε jεɲɔgɔnya cogoya kan ; kεrεnkεrεnnenya la, basigiko, kεnεyako, kalanko, iziniko, jagoko, sira dilanw walima yɔrɔjɔw. Dɔ ka kan ka fara nin waleya bεε fanga kan u ka lajεba senfε zuwεnkalo nata in na Ankara, Turukiye faaba la.

Bεnbabilen DUNBIYA

Dɔkala Yusufu JARA