Kalanko sigikafɔba : Ɲεtaa baju jɔnjɔn

Kalanko minisiri D^r Amadu Si Sawane ye sigikafɔba min kεra kalanko kan, o laselisεbεn (EGE) don furancεlafanga jamanakuntigi Kolonεli Asimi Goyita bolo kunun jamanakuntigiso la Kuluba. Minisiriɲεmɔgɔ D^r Sogεli Kokala Mayiga, gɔfεrεnaman minisiriw, ka fara maaba welelen wεrεw kan, nin bεε tun bε kεnε kan.

Laɲinin kεrεnkεrεnnen 221 kofɔlen don laselisεbεn in kɔnɔ ani 59 wεrε, minnu ka kan ka waleya. Sigikafɔba in kalanko la, a daminεna zanwuyekalo tεmεnnen in, jamana fan bεε fε ani lasigidensow la. A bε sinsinbɔlɔ 9 kofɔ jamanadenw haminankow la an ka jamana kalanko bilali la sira ɲuman kura kan. N’o ye kalan sinsinni ye an danbew an’an seko ni dɔnko kan jamana kɔnɔ, bεε sendonni kalanko la mɔgɔlawoloma kana kε, fasokanw forobayali an’u ɲεtaa sabatili ani jamana yεrε k’a jɔ n’an ka kalanko musaka doni tali ye.

Sigikafɔba in kolabεnkulu ɲεmɔgɔ Kuluɲan Ɛdimɔn Danbεlε ye ɲεfɔli kε, ko hakilila falenw de kεra fɔlɔ, mɔgɔw k’u haminankow dajira, ka Maliden ɲuman ka yecogo jεya, a hami ye min ka dilan o cogo la kalan cogoya fε. Ka da diɲεnatigε nɔgɔyaw n’a gεlεyaw cogoya kan, kalanko ka kan ka ɲεɲinin ji ɲεmajɔlen na, min b’a to a bε se ka bεn hakilila don mɔgɔw la, ka ku-ɲɔgɔn-kan sabati ani tilennenya hadamadenya kɔnɔ nafoloko la, o ka se ka sira ɲuman ta.

Kuluɲan Ɛdimɔn Danbεlε y’a jira, ko yecogo min dantigεra fasojama fε, o ye ka Maliden kura dilan yanni san 2030 cε, min ye fasokanubaa ani demokarasi fasojɔla ye, ani n’a faamuyalen don an ka seko ni dɔnko nasira la, n’a bε jamana kɔnɔ dɔnniyaw dɔnnakari, ka sendon dɔnniyaw ni fεεrε kuraw ɲεtaa la, ani k’a jɔyɔrɔ fa a ɲεma bεn ni ku-ɲɔgɔn-kan sabatili la. A ka laɲinin ye sigidalamɔgɔw kunnafonini an’u sendonni ye kalanko yεlεma kura baara kεta bεε la. Kuloɲan Ɛdimɔn Danbεl fε, jamana ɲεmɔgɔw bε ka politiki dεmεn jilajalen don laselisεbεn in laɲininw waleyali kɔlɔsili an’u kiimεni na.

Ka HAKILILAW KAFO- Kalanko minisiri ye hakililajigin kε sigikafɔba in kan, k’a jira ko a bε furancεlafanga jamanakuntigi kuntilennaw kɔnɔ, k’a ɲinin ka wulikajɔ kε min b’a to Mali kalanko bε se ka bɔ dingε kɔnɔ. D^r Amadu Si Sawane ye ɲεfɔli kε, ko sigikafɔ minnu kεra marayɔrɔw la ni kalanko ɲεmɔgɔw ye, o hakililaw tara ba la, ka taama ka se kalanko yεlεma kuraw yɔrɔw ma ka faamuyali sɔrɔ u ka ko kεtaw la, ka lajεw kε masalakunw ni gεlεyabaw kan kalanko la, ka fara kalanko minisiri kɔrɔw ka hakililajiraw kan. A y’a jira, k’o laɲininw bε tali kε an ka jamana sigira danbe minnu kan, k’olu don kalanko kɔnɔ. Minisiri ye jamana lakananbaaw fo faso dugukolo basigili baaraw la. O baaraw de sera k’a to ni lajεw sera ka kε marayɔrɔ 19 kɔnɔ, ka fara jamana faaba Bamakɔ kan.

Furancεlafanga jamanakuntigi bε sigikafɔba kofɔli min kε, a ko a tun y’a dɔn ko lajε nafama caman bεna kε. K’a tun b’a dɔn fana, k’o lajεw tεna caya u nafaw ma. A bε dabɔ fangabulonko nasira la, ka hakilila bεε kafo ɲɔgɔn kan kalanko la ani ka ɲεtaa baju jɔnjɔn sigi senkan an ka kalanko la. A labanna ka foli ni tanuni lase kolabεnkulu ma sigikafɔba baaraw labεnko ɲuman na.

Kolonεli Asimi Goyita ye jigisigi kuma fɔ. A y’a jira, ko jamana si tε se ka yiriwa, ni a ka kalanko bolodalen tε ka ɲε, min bε garijεgε di denmisεnw ma. A ko an b’a dɔn ko gεlεya ka ca ; nka gεlεyaw fana tε, minnu tε se ka latεmεn. A y’a ka nisɔndiya jira bεε da donni na sigikafɔba in labεnni na, ka kεɲε ni a laɲinin ye ; n’o ye ka kuma di fasojama ma, u k’u hakilijakabɔ Maliden cεman ni musoman suguya dilanta kan Mali kura kɔnɔ.

Jamanakuntigi ye jigisigi kuma fɔ. A y’a jira ko fasokan forobayaLenw bεna labaara kalan ani baaradegekalanw kɔnɔ. A y’a jira fana, ko nin laɲinin ninnu bεna kε kuntilennadilanw ye an bolo gɔfεrεnaman ka baara kεtaw la. Ka segin ka layidu ta, ko gɔfεrεnaman bεna a wasa don kuntilennasεbεn waleyali la joona ani koɲuman Mali ka nafa kama. A ko Mali fasojama y’a yεrε ma hɔrɔn ye. O jama in de y’a ŋaniya, ka ladamu ani kalancogo ɲuman min bε ɲε an ka nafoloko la ka sinsin o kan, ani k’an ka jamana yiriwali bajuw sigi senkan. O siratigε la, jamanakuntigi y’a jira ko mɔgɔ si tεna to kɔ o ci ɲuman in waleyliko la.
 

Hakililajigin na, kalanko sigikafɔba laseli kεra zuluyekalo tile 23 san 2023 Kayi, furancεlafanga jamanakuntigi fε. O taama kelen in senfε, a ye Kayi-Ndi foroba lise jɔli tufaden fɔlɔ da.

Mohamεdi JAWARA et