Ka kɛɲɛ ni kuranko gɛlɛya min b’a ka jamana kan kabini kalo caman, minisiriɲɛmɔgɔ Zenerali de diwisɔn Abudulayi Mayiga y’a bɔko fɔlɔ ɲɛsin yeelenko ni jiko cakɛda (EDM-SA) ma. A kɛra kunun sɔgɔma. Yeelenko ni jiko minisiri Bubakari Janɛ tun bɛ minisiriɲɛmɔgɔ nɔfɛ taama in na.
Minisiriɲɛmɔgɔ da sera yeelenko ni jiko cakɛda gɛlɛya ɲɛ misɛnw ma baarakɛlaw ɲɛkɔrɔ u ka lajɛ senfɛ. Disidako minnu don, a y’a jira k’a ɲuman ye u ka furakɛ, min b’a to kuran ka se ka lasɔrɔ bɛɛ fɛ, ka dɔ fara kurandiminɛnw fanga kan, ka jɛn ni dabali tigɛlen kuntaala janw ye walasa ka se ka wasa kɛ kuranko la; ka da a kan kuranko mako bɛ ka bonya ka taa a fɛ.
Nin hakilila falenw senfɛ, fɛɛrɛ kuraw bɛ nɔgɔyada min di kuran sɔrɔli la, ɲɛfɔli kɛra olu kan. A bɛ dabɔ ka yɛlɛma ɲuman don kuranko cogoya la an ka jamana kɔnɔ. EDM-SA ɲɛmɔgɔba Abudulayi Jibirili Jalo ka fɔ la, gɛlɛya min filɛ cakɛda in kan, a kɛlen bɛ degunba ye. A y’a jira ko san mugan labanw na, yɛlɛmaba donnen bɛ kuranko cogoya la.
Abudulayi Jibirili Jalo ka fɔ la, baraziw tun jɔlen bɛ ni 83% ye Mali kuranko la; nka ko an bɛ don min na, 30% bɔlen b’o hakɛ la, k’an siri taji kurandi la ni 70% ye. O de bɛ ka kuran sɔrɔli gɛlɛya taji sɔngɔ yɛlɛnnen kabini san 2022. O la, a tɛ ɲɛ ni kuran sɔrɔcogo bolofara ma caya, min b’a to fura kuntaala jan ka se ka sɔrɔ kuranko gɛlɛya la. Abudulayi Jibirili Jalo ka fɔ la, o yɛlɛma kura in de bɛ ka kuranko gɛlɛya juguya, ka warikodɛsɛ lase yeelenko ni jiko cakɛda ma, k’a dɛsɛ ka kuran wasalen di jamanadenw ma. O kɔlɔlɔ yɛlɛnnen bɛ hadamadenya ni nafoloko la Mali kɔnɔ.
Yeelenko ni jiko cakɛda (EDM-SA) bɛ wulikajɔ la dɔ farali la mara kɛcogo ɲuman fanga kan, ka sinsin yuruguyurugu ni namara kɛlɛli kan. O siratigɛ la, EDM-SA ɲɛmɔgɔ y’a jira ko a ɲuman ye sɔrɔ ka ladon koɲuman, min b’a to laɲininw bɛ se ka sabati. O b’a jira ko poroze nafama minnu sinsinnen bɛ tile kuranko kan, o baaraw ka sennateliya, min b’a to tile kuran, baraziw kuran ani taji kuran, o fangaw ka fara ɲɔgɔn kan ka se ka caman bɔ kuran sɔrɔli musaka la jamana bolo.
O yɛlɛma kuraw don nataw la, o b’a to kuran ka se ka sɔrɔ waati kuntaala jan kɔnɔ, k’an sirilen bɔ kɛlɛkɛlɛ taji la kuranko la. A ɲuman ye gɔfɛrɛnaman ka yeelenko ni jiko cakɛda senkɔrɔmadon kosɛbɛ wasa sɔrɔli la kuranko la, fo k’a dɛmɛn a ka juru kɔrɔw sɔrɔli la. O tɛ taa juruw tɔpɔtɔli kɔ walima politiki dɔ sigili senkan kuran juru kɔrɔw saracogo la. Abudulayi Jibirili Jalo ko EDM-SA ni gɔfɛrɛnaman ka jɛkabaara de bɛ se k’a to ni olu bɛ se ka jamanadenw wasa kuranko la.
Bubakari Teme tun ye EDM-SA lafasalitɔn ka cilasela ye. Ale y’a jira ko kabini san 2004, yɛlɛma ma don kuran sɔngɔko la. Ko kuran sɔngɔ toli a nɔ na nin cogo la, k’o ye bin de ye cakɛda in bolo, k’a dɛsɛ ka wari caman sɔrɔ ka kuran caman kafo ka di jamanadenw ma. Ko ni kuran ma feere sɔngɔ bɛrɛmakɛɲɛnen na, yeelenko ni jiko cakɛda tɛna se ka wari sɔrɔ k’a sagolabaara nafamaw waleya. A ko kuranko gɛlɛya min filɛ sen na, k’o kɔlɔlɔ yɛlɛnnen bɛ kosɛbɛ baara kɛtaw kan, minnu tɛ ɲɛ kuran kɔ, ani ka nafolo fana sɔrɔli gɛlɛya an ka jamana bolo. Bubakari Teme ka fɔ la, kurantigɛba in ka jugu an ka jamana hadamadenya an’a sɔrɔko ma. O siratigɛ la, a b’a ɲinin gɔfɛrɛnaman fɛ, a k’a sendon baara in na ka taa a fɛ, walasa ka se ka jigisigi di jamanadenw ma, kuranko gɛlɛya degun b’olu minnu fɔlɔ kan.
JIRISIGI KUN BƆLEN DON- yeelenko ni jiko minisiri ye ɲɛfɔli kɛ minisiriɲɛmɔgɔ ka nin taama fɔlɔ in kan cakɛda la, min bɛ yeelenko ni jiko minisiriso lahɔrɔma kɔnɔ. O b’a jira ko taama in bɛ jate, ko jigisigi kun bɔlen don Malidenw ye, n’u bɛ waati jan bɔ kuranko gɛlɛya kɔnɔ, u tun ma deli ka min ɲɔgɔnna kɛ fɔlɔ. Wa taama in ye dalilu ye, min b’a jira ko furancɛlafanga sago ye fura kuntaala jan sɔrɔli ye kuranko gɛlɛya in na, n’a bɛ ka degun lase Malidenw ma u ka don o don baara kɛtaw la.
Bubakari Janɛ ka fɔ la, laɲininw ka ca ka fura kuntaala jan sɔrɔli makɔnɔ kuranko gɛlɛya la. Wa a b’a dɔn fana ko gɛlɛya in kɔlɔlɔ juguba bɛ baara kɛtaw kan mɔgɔw bolo, minnu bɛ baara kɛ kuran na. O de kosɔn a ka minisiriso in karankoba ye kuran nafama wasalen sɔrɔli ye kalo nataw la, walasa ka se ka Malidenw wasa kuranko la. Minisiri ka fɔ la, a sinsinna min kan, ko disidako fɔlɔ ye ka se ka kuran sɔrɔ kosɛbɛ ka di Malidenw ma kalo nataw la. Ani k’a ɲinin EDM-SA fana fɛ, dabali minnu tigɛra, k’olu waleya yanni funtenibabɔ waati cɛ.
Walasa ka se k’o kɛ, minisiri sinsinna poroze nafama minnu ɲɛsinnen bɛ tile kuranko kan, i n’a fɔ Sanankɔrɔba, Cakadugu-Jalakɔrɔ ani Safo taw, o baaraw sennateliyali kan. A ko n’o baaraw banna, o bɛ sɔn ka kɛ sababu ye ka caman fara baraziw nit aji kuranw fangaw kan, ka jamana wasa kuranko la. Minisiriɲɛmɔgɔ ye jateminɛnikɛlaba ye. A ye hakililajigin kɛ gɔfɛrɛnaman ka cɛsiri kɛlenw na EDM-SA dɛmɛnni siratigɛ la sisan kuranko gɛlɛya tɔpɔtɔli la.
Zenerali de diwisɔn Abudulayi Mayiga da sera gɔfɛrɛnaman ye dɛmɛnwari min di kurandigurupuw ni taji sanni kama. A k’o fɛn ninnu jɔyɔrɔ ka bon kosɛbɛ dɔ bɔli la kuranko gɛlɛya la. Minisiriɲɛmɔgɔ bolo, gɔfɛrɛnaman k’o hakilila ninnu laɲinin ye kuran basigilen sɔrɔli ye, ani ka dɔ fara kuran sɔrɔli baarakɛminɛnw kan gɛlɛya nataw kunbɛnni kama.
Ni kuran sɔrɔcogo bolofara cayara n’o dabaliw ye, gɔfɛrɛnaman jigi b’a kan ko basigi ka kan ka don kuranko la ani ka jigisigi kɛ Malidenw fanfɛ, ka tɛmɛn ni kuran sɔrɔli ye a ɲɛma. A y’a jira fana, ko furancɛlafanga jamanakuntigi ye ŋaniya ŋuman minnu kɛ sigida dɔw ye kuranko la, o bɛɛ dabɔra ka se ka yɛlɛma ɲuman don sigidalamɔgɔw ka ɲɛnamaya kɛcogo la. O cɛsiri ninnu bɛ furancɛlafanga gɔfɛrɛnaman ka kandili kofɔ fasodenw ka hɛrɛsɔrɔko la, ani ka dɔ bɔ damaɲɛbaliya la jamana marayɔrɔw cɛ.
Sanni minisiriɲɛmɔgɔ b’a kɔ don EDM-SA baarakɛlaw la lajɛ kuncɛlen, a y’a gɛlɛya yeelenko ni jiko minisiri ani EDM-SA ɲɛmɔgɔ ma, u ni cakɛda in baarakɛlaw ka hakilila falen kɛ gɛlɛya kɔlɔsilen ninnu furakɛcogo la. O hakilila fallen in, minisiriɲɛmɔgɔ ka fɔ la, a laɲinin ka kɛ mɔgɔ minnu bɛ cakɛda in an’a gɛlɛyaw dɔn kosɛbɛ, olu hakilila jɔnjɔnw kafoli ye. Minisiriɲɛmɔgɔ y’a kandi u ma, ko dɔgɔkun kelen nin lajɛ in kɔfɛ, a bɛ segin ka na magɛlɛyali in kɔmasegin nɔfɛ. O b’a jira ko baara kɛli jɛkabaara kɔnɔ fura sɔrɔli la kuranko gɛlɛya kuntaala jan in na an ka jamana kɔnɔ, o ye haminankoba ye.
Dɔkala Yusufu JARA
Amara Bɛni Yaya TARAWELE
Esɔri sɛbɛnnijɛkulu
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
