Nizɛri
minisiriɲɛmɔgɔ, Ali Mahamani Lamine Zeyini ye wele bila Burikina
Faso minisiriɲɛmɔgɔ, Apolinɛri Zohasimu Kiyelɛmu de Tanbele, ani Mali
minisiriɲɛmɔgɔ, Sogɛli Kokala MAYIGA ma. A y’u wele, u ka na ɲɔgɔn faamuya Sahelijamanaw ka jɛ kunkankow
kan, u k’u bolo di ɲɔgɔn ma,
ka don da kelen fɛ, ka bɔ da kelen fɛ. Mali ye wele in jaabi.
Minisiriɲɛmɔgɔ nɔfɛjama tun ye a yɛrɛ ka cakɛda baarakɛlaw
ye, gɔfɛrɛnaman minisiri dɔw, jamanakuntigi kɔrɔsigi dɔw ani furancɛlafanga bulonba mɔgɔ dɔw.
U bɛnna min kan, o ye terorisimu kɛlɛli ye ɲɔgɔn
fɛ, an’u ka yɛrɛsagotiya sɛmɛntiyali. U ni jamana o jamana, tɔn o tɔn ani jɛkulu
o jɛkulu mana bɛn fɔ la, u n’o bɛ se ka baara kɛ ɲɔgɔn fɛ, yɛrɛmahɔrɔnya
sabatili kɔnɔ ani ɲɔgɔn ka nafa lakanani.
Jamalajɛba
dɔ kɛra Ɲamɛ, minisriɲɛmɔgɔ saba ninnu taara u senjɔ o kɛnɛ kan, k’a jira ko Faransi ka jɔnyajuru tigɛra ka bɔ u la,
ka foli di Nizɛri furancɛlafanga ɲɛmɔgɔw ni Nizɛri jamanadenw ma, u ka wulikajɔw la.
U ka ɲɔgɔnyew kuncɛlen, u ye kunnafonidilajɛ dɔ labɛn. O kɛnɛ kan, minisiriɲɛmɔgɔ saba
ninnu kelen-kelen ye kuma ta, ka kunnafonidilaw ladɔnniya u ka
bɛnkanw na.
Mali ye
Nizɛri dɛmɛni min kɛ walasa a kana dafiri, walasa a kana bin SEDEYAWO ka janfa
kɔnɔ, Nizɛri minisiriɲɛmɔgɔ y’o
foli n’o waleɲumandɔn kɛ. A
y’a jira ko siran
yɛlɛmana fan dɔ in fɛ, k’a sababu kɛ sahelijamanaw ka marifa
daburu ye.
Mali
minisiriɲɛmɔgɔ ye furancɛlafanga nacogo ɲɛfɔ Mali kɔnɔ. Mali sɔrɔdasiw tun bɛ faga i ko sɛw, minɛn t’u bolo wa fanga mako
t’u la. Yuruguyurugu fanga bonyako jugu, forobanafolo burujali, kojugukɛlaw ɲangilibaliya, faantanw tɔɲɔni, olu
tun ɲɔ ɲɛna
Mali kɔnɔ fo k’a
damatɛmɛ. O kosɔn jamanadenw ye murutili fari da. Balawu
tun bɛna wuli jamana fan bɛɛ. O la, a kɛra diyagoya ye sɔrɔdasiw kan, u ka fara jamanaden tɔw kan, ka fanga dafiri, san 2020 utikalo tile 18.
Bi-bi
in na, Mali minisiriɲɛmɔgɔ ka fɔ la, dɔn
yɛlɛmana ɲama kɔrɔ, tɔɲɔni bɛ ka da tɔɲɔnikɛlaw kan ; o misali dɔw ye Jibo minɛni ye Burikina Faso, ani Kidali minɛni
Mali kɔnɔ. A y’a
jira ko SEDEYAWO ka ɲangiliw tɛ tɔn in ka
sariya si kɔnɔ, hɔrɔnbaara tɛ, tɔɲɔniw
don, hadamaden man kan ka min da a hadamadenɲɔgɔn kan.
Burikina minisiriɲɛmɔgɔ y’a jira ko n’i ko i bɛ kulusi tigɛ sama na, n’i y’a
kɛ, i ye koba kɛ, n’i m’a kɛ, i ye kuma lankolonba fɔ. Sahelijamanaw ka jɛ b’o cogo la. Fo jamana saba
ninnu ka ɲɔgɔn minɛ,
ka tilen ɲɔgɔn ye,
ka kɛ laadiriw ye, wa fo u faso kanu ka kɛ u la. N’o tɛ, laban t’a la.
Mohamɛdi JAWARA/Mahamadu KƆNTA
Dɔkala Yusufu Jara
Ciden minnu bε Malidenw yεrε dama cε sigikafɔba kεnε kan, u y’a ŋaniya kumaɲɔgɔnya sigikafɔ in da ka yεlε kojugubakεlaw ye, ka silamεdiinε dungew don an n’u cε kɔrɔfɔw la. U y’a ɲinin fana, ko ka kuranko gεlεya furakε joona walasa hakilisigi ka na mɔgɔw la.
Faso tɔgɔla sigikafɔba min daminεnen filε, o bεna kε sababu ye Malidenw ka kumaɲɔgɔnyaw kε u ni ɲɔgɔn cε ka furaw dajira gεlεya kofɔlenw na. A ka kan ka se ka hadamadenya juru caanin an cε, ka dɔ fara ku-ɲɔgɔn-kan fanga kan ani ka na ni bεn kutaala jan ye..
Furancεlafanga jamanakuntigi Kolonεli Asimi Goyita ye laseli kε tarata awirilikalo tile 30 san 2024, ko gɔfεrεnaman bε sεnε kεfεn minnu di, tεmεn bε kε n’o ye. O siratigε la, angεrε (ire) kg50 bɔrε ye sefawari dɔrɔmε ba fila ani kεmε seegin (d2 800) ye, farafinnɔgɔ kg50 .
San o san mεkalo tile 1lɔ ye baarakεlaw tɔgɔladon ye diɲε kɔnɔ. O hukumu kɔnɔ, Mali baarakεlaw lafasatɔn minnu bε UNTM jεkuluba kɔnɔ, olu ye yεrεjirataama kε jamana ka yεrεmahɔrɔnya kεnεba kan. A kεra kεnε ye, min kɔrɔfɔw bolila hadamadenya basigili ni ɲεtaa laɲini.
Mali sɔrɔdasiw ye kojugubakεla Hugo faga Indelimani kεlεdaga la Gawo mara la. Kabini Mali y’a ŋaniya k’a mεru don Irisijamana na sɔrɔdasiko nasira la, an ka lakananbaaw b’a la ka sebaayaw sɔrɔ dɔrɔn kojugubakεlaw kan..
UNTM biro kura mɔgɔ ye 53 ye. U ye lahidu ta, ko furakεcogo ani laɲinin minu kεra a ka sigikafɔw senfε, olu bεna kε sisinnan ye sarati kura in kɔnɔ.
