Minusima dagayɔrɔw latεmεnni Mali sɔrɔdasiw ma : Dεmεnbaaw jεlen tε a kεcogo la

Ka kεɲε ni diɲε tɔnba ka basigi sabalijεkulu ka sariya 2690 kɔnɔko ye, Mali sɔrɔdasiw bεna sigi Minusima dagayɔrɔ labilata bεε kɔnɔ sanni desanburukalo tile 31 ka tεmεn. Fosi tεna sɔrɔdasiw lasegin u kɔ o la. O y’u kalikan ye. An ka nsana dɔ b’a fɔ, ko wulu ka wooci tε sugudenw bali ka tεmεn.

Kojugubakεlaw b’a la ka dansagonwale suguya bεε dɔ ta, k’a ɲinin ka balanw da Minusima dagayɔrɔ labilataw lasɔrɔli ɲε. Bikanniw ni janfaw, a bεε kεlen b’u taabolo ye bi. A misali dɔ ye sɔrɔdasiw dagayɔrɔ maminεni ye marifatigikulu « CMA » fε Kidali.

Mali kɔkankow ani diɲε tɔnbaw cε koɲεnabɔ minisiri ye laseli min kε ntεnεndon ɔkutɔburukalo tile 16 san 2023, ka Minusima ka ɔkutɔburukalo tile 10 laseli jaabi, o bε dɔ ka jijukɔrɔsaya da kεnε kan nin ko in na. Minusima tun y’a jira ko a dagayɔrɔ min bε Kidali, a b’o ɲεfεjɔyɔrɔ labila ani ka lakananbaakulu lakurayalen (Batfar) mɔgɔ 111 bisimila a dagayɔrɔ la. O Batfar lakananni bε Minusima ka baaraw la fo dagayɔrɔ ka latεmεn Mali sɔrɔdasiw ma pewu tuma min na.

Minisiri ko gɔfεrεnaman dabali banna Minusima kεwale la o ko la ; sabula bεnkan min tεmεnna a ni gɔfεrεnaman cε a dagayɔrɔw latεmεncogo la Mali sɔrɔdasiw ma, o ni waleya min bε sen na, o tε kelen ye ; kεrεnkεrεnnenya la Kidali dagayɔrɔ latεmεnniko la. Kasɔrɔ gɔfεrεnaman ni Minusima sigira kuma in kunna ɔkutɔburukalo tile 10 san 2023. O senfε, gɔfεrεnaman tun y’a ɲinin lεrε 72 kuntaala kɔnɔ, u ka yεlεma ɲuman don Kidali dagayɔrɔ lasɔrɔcogo la Mali sɔrɔdasiw fε. Nka fεn min bilala o ko la, gɔfεrεnaman bilala o bannen kɔrɔ kunna.

Minisiri ka fɔ la, « Batfar » de janfara a mɔgɔ dɔw fε, minnu ye « CMA » tɔgɔlamɔgɔw ye. CMA dun y’a bolonɔ bila bεnkansεbεn na. O b’a jira k’ale de ye janfa kε, ka bin Batfar kan k’o ka minεn bεε ta. O de kosɔn minisiri y’a jira, ko nin waleya ninnu tugu-tuguli ɲɔgɔn na, ani Minusima ka siginboloma bε mɔgɔ bila k’i yεrε ɲininka balahu ninnu laɲinin kan. A b’i n’a fɔ a kεra ko labεnnen ye gɔfεrεnaman kɔkan.

Dansagonwalew cayali ka da-da ɲɔgɔn kan, o bε juguw n’u jεɲɔgɔnw ka bolofaraɲɔgɔnkan kofɔ. Nka nin bεε kun ye mun ye ? An bε se k’a fɔ k’a kun ye k’a ɲinin ka Minusima dagayɔrɔw latεmεnni bali Mali sɔrɔdasiw ma, CMA n’a jεɲɔgɔnw ka to yen.

CMA n’a jεɲɔgɔnw hami ye ka Mali sɔrɔdasiw dεsε ka jamana fan bεε lasɔrɔ. Hali ntεnεndon CMA ye muguw ci sɔrɔdasiw ka pankurun dɔ jigintɔ Tesaliti pankurunjiginkεnε na, o natɔ Minusima dagayɔrɔ maminεni kama yen. Nka a bɔra u ye minεn fεrεlen na ; sabula pankurun in ye o mugucilaw daji, ka jigin hεrε ni baaden na. Wa dabali bεε tigεlen don sɔrɔdasiw fε, Minusima dagayɔrɔ bεε lasɔrɔli la a kɔ.

Laɲinin ye ka se ka Minusima labɔ Mali kɔnɔ k’a daminε zuluyekalo tεmεnnen in tile 1^lɔ la, ka se desanburukalo tile 31 ma san 2023. A kɔni tε ka taa gεlεyaw kɔ. Hali « CMA » n’a jεɲɔgɔnw y’u kangali min kε sɔrɔdasiw ni Bεri ani Anefisi lasɔrɔli cε don min na, min dara u kan, o na mεεn u kɔmɔgɔw kɔnɔ. Kasɔrɔ Minusima dagayɔrɔ minnu tun bε Ogosagu, Gundamu ani Menaka, olu latεmεnna nɔgɔya kɔnɔ utikalo tile 1^lɔ n’a tile 31 cε san 2023.

Minusima bɔli Mali kɔɔ, o dakun filanan daminεna sεtanburukalo tile 1^lɔ. A bε kuncε desanburukalo tile 31 san 2023, ni a dagayɔrɔ minnu bε Tesaliti, Agelihɔku, Ansɔngo, Kidali ani Duwazan, olu latεmεnni ye Mali sɔrɔdasiw ma. Lafasa ani sɔrɔdasi kɔrɔw ka minisiri Kolonεli Sajo Kamara ka fɔ la, jamana fan bεε lasɔrɔli siratigε la Mali sɔrɔdasiw fε, n’i ko i b’i kanga o ɲε, a bε bɔ i ye minεn fεrεlen na. Hali n’i donna mεnεmεnεdingε kɔnɔ, u bε ta tugu i la.  

Masa SIDIBE