Kariti girizi fɛn o fɛn mana se bolifɛnkow ni taamako ɲɛmɔgɔsoba la, bolonɔ bɛ bila o la lɛrɛ 24 kuntaala kɔnɔ
Kasɔrɔ wele dara ka arɛte 5150 kofɔ, min tara desanburukalo tile 29 san 2023 bolifɛnkow ni taamako minisiri fɛ, ka sarati da nimɔrɔ kura sigili kuncɛli la mɔbiliw kan. O minisirisariya in bɛ nimɔrɔ kuraw sigili kofɔ mɔbiliw dɔrɔn kan.
O n’a ta bɛɛ, mɔgɔ minnu kun tɛ ko la, olu b’a la k’u yɛrɛbɔcogo ɲɛfɔ. U caman b’a fɔ ko gɛlɛya bɛ baara in kɛcogo la ; kasɔrɔ kunbɔnkola y’a caman ta ye. U dun b’a dɔn ko ni waati koronna ka dantɛmɛn, jama caya kosɔn, mansin bɛ ban tuma dɔw la fo ka waati jan sɔrɔ. A ɲuman ye k’i teliya ka taa i ta kɛ ; sabula mɔgɔw sigilen bɛ yen a kama.
Jateminɛ na, nimɔrɔ kura ninnu bɛ ye mɔbiliw kan Bamakɔ kɔnɔ. Mɔgɔ min ɲɛsinnen nimɔrɔko in ma bolifɛnkow ni taamako ɲɛmɔgɔsoba la, o ye Daramani Kulubali ye. Ale ka ɲɛfɔli la, nimɔrɔ kura sigili mɔbiliw kan, o bɛ ka kɛ jamana fan bɛɛ fɛ kabini sɛtanburukalo tile 22 tɛmɛnnen in.
A y’a jira ko mɔgɔw b’a la ka na a kɛ. Kariti girizi sarati kuntaala ye san 5 ye ; n’o dafara a ka kan ka lakuraya. O lakurayali in de bɛ ka kɛ ni nimɔrɔ kura sigili ye.
A y’a jira ko ni Ala y’a kɛ ko i ka kariti girizi tununna, n’i y’o ɲɛfɔ u bɛ sin ka kura labɔ ka di i ma yɔrɔnin kelen. O ka fisa ka waatilatɛmɛnnan dɔ dilan i ye. Hali n’i y’i ka bolifɛn feere walima k’a di mɔgɔ wɛrɛ ma, kariti girizi yɛlɛmani o tigi tɔgɔ la, o bɛɛ ɲɛsigilen don nimɔrɔ kurako in kɔnɔ.
Daramani kulubali ka fɔ la, walasa i ka se ka nimɔrɔ kura in sɔrɔ, wajibi la i n’i ka mɔbili an’a kariti girizi bɛ na (DGT) b’a sɛgɛsɛgɛ. O b’a to a ka dɔn ni nimɔrɔ min bɛ mɔbili « sasi » kan n’o de fana bɛ kariti girizi kan. Yɔrɔnin kelen o bɛ ɲɛnabɔ i bɛ taa i mako la, mɛɛnniko tɛ.
A kɔni tɛ ɲɛ ni sɛbɛn dɔ ma na i bolo ; i n’a fɔ karadantɛ, kariti NINA, pasipɔri walima mɔbili bolili yamaruyasɛbɛn. Nimɔrɔ falen in b’a la ka kɛ bolifɛnkow ni tamako ɲɛmɔgɔso la Bamakɔ, ani marayɔrɔw taamako ɲɛmɔgɔsow la. Kariti girizi fɛn o fɛn mana se (DGT) la, bolonɔ bɛ bila o la lɛrɛ 24 kuntaala kɔnɔ ka sɔrɔ k’u kasegin u tigiw ma.
Kunnafoni jɔnjɔn na, nimɔrɔ kura bɛ sigi sefawari dɔrɔmɛ ba wɔɔrɔ ani kɛmɛ duuru (d6 500). Nka ni kariti girizi bɛ laban ka yɛlɛma mɔgɔ wɛrɛ tɔgɔ la, Daramani Kulubali ka fɔ la, o musaka ka ca ni fɔlen in ye.
Dɔkala Yusufu JARA
Nfamoro KEYITA
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
