OMVS : San 2023 baaraw sɔrɔ n’u musakaw fεsεfεsεra

Ba Sεnεgali donni ba la o jεkulu n’a tubabukan daɲε surun ye (OMVS) ye, o ɲεmɔgɔjεkulu n’o ye Mali, Sεnεgali, Lajinε ani Moritani jiko ni yeelenko minisiriw ye, u y’u ka laadatɔnsigi 76nan kε Bamakɔ kunun zanwuyekalo tile 22 san 2023. Baaraw daminεni ɲεmɔgɔya tun bε Mali jiko ni yeelenko minisiri Madamu Bintu Kamara bolo. Ale de ye minisirijεkulu in kuntigiba ye. Sεnεgali, Lajinε ani Moritani jiko ni yeelenko minisiriw tun b’a kεrεfε. Mali nafoloko ni wariko minisiri Aluseni Sanu ani OMVS ɲεmɔgɔba Mohamεdi Abudεli Weta tun b’a kεnε kan.

Aluseni Sanu ka kɔrɔfɔ kɔnɔ, a y’a jira ko OMVS ka kan k’a ka baarabolodalen minnu waleyali bε sen na ani minnu bolodalen don, k’u walangata, kεrεnkεrεnnenya la, ka dɔ fara kuran dita hakε kan, min b’a to dɔ bε se ka bɔ kuran sɔrɔli musaka hakε la ni wari ɲininni ye k’a don barazi nafamabaw jɔli dafε ani ka jikantaama poroze waleyali sennateliya. Aluseni Sanu bolo, OMVS ka kan k’a disi da wari sɔrɔli waleyaw la a ɲεma ka jikantaama poroze waleya, ka Kukutanba ni Gurubasi baraziw jɔ, ka tεmεn ni Manantali-Bamakɔ furancε kuranko baaraw ye, ani ka sira sabanan Kayi-Yelimane-Tintane-Kifa baaraw musaka ɲinin an ka jamanaw nafa kama.

OMVS ɲεmɔgɔba ye hakililajigin kε, ko bεnkan minnu tara baaraw mabεnni jεkulu fε a ka nowanburukalo tile 13 san 2023 lajε senfε Dakaro, a jirala ko ka balontan dɔ labεn OMVS tɔgɔ la. O hakilila in bε sigidalamɔgɔw sendonni kofɔ baaraw la ; kεrεnkεrεnnenya la denmisεnw.

O laɲinin kelen kɔnɔ, jigi dalen b’a kan, ko OMVS tɔgɔla balontanw tako fɔlɔ bεna kε san 2024 in kɔnɔ, walasa ka se ka ko kuraw ɲεtaa sabati ani ka kεnyεrεye sendonko ɲuman ani sigida dɔnniya ɲεtaa sinsinni OMVS baaraw kɔnɔ. O balontan tako fɔlɔ in na, ladiyalifεnw bε di OMVS tɔgɔ la cakεda fitininw ni mankanw ma, minnu ye jaabi kuraw sigi senkan OMVS ka baaraw kεyɔrɔw la.

San 2024 kɔnɔ, OMVS ɲεmɔgɔba ka fɔ la, u bεna dɔ fara u ka cεsiri fanga kan ka sinsin hakililaw kan, minnu kofɔra ani ka baaraw waleya wari sɔrɔli siratigε la poroze nafamaw waleyaliko la ɲɔgɔndεmεn yiriwali kuntaala jan kama, mɔgɔlawoloma tε min na Sεnεgali Ba donni na ba la.

Jiko ni yeelenko minisiri ye OMVS ka san 2023 baaraw n’u musakaw ɲεfɔli kε gεlεya sɔrɔlenw kɔnɔ. Madamu Bintu Kamara y’a jira ko a siɲε fila ye nin ye OMVS tariku kɔnɔ, a jamanakuntigiw ni minisiriɲεmɔgɔw ka lajεko fila kε san kelen kɔnɔ ; a filanan yεrε kεra zuluyekalo tεmεnnen in tile 18 san 2023. O lajε in senfε OMVS ɲεmɔgɔya dira Moritani ma, k’a minisirilajε kuntigiya di Mali ma. O lajε kelen in senfε, ŋaniya sirila ko ka yiriwali banki dɔ sigi senkan u jamana naani cε, OMVS porozew waleyali musakako kama.

A lajε kelen in senfε tuguni, Lajinε tun dεmεn bε kεrεfε OMVS kow la, jamanakuntigiw bεnna a kan k’o sendon u la kokura. U ye fεn min fɔ ka gεlεya, o ye jikantaama bilali ye sira ɲuman kan ; o min dabali tigεra kabini san 1972 waati la. Hakilijakabɔw kεra o kan, min b’a to batonw ka kɔgɔji lasɔrɔ joona. Fεn min ye dunkafa fanfεla ye, Madamu Bintu Kamara y’a jira ko Jama ni Manantali baraziw sababu la, u sera ka foro taari 409.000 labεn jidonsεnε kama, nka hali o tilancε ma se ka labaara.

Ɲεtaako minnu sɔrɔla yeelenko nasira la san 2023 kɔnɔ, minisiri da sera olu ma, i n’a fɔ kuran sɔrɔli Kayi-Tanbakunda furancε la ani Manantali-Bamakɔ cε kuranko baaraw daminεni kokura. Nka kuranko gεlεya min bε Mali kɔnɔ, laɲinin ye OMVS jamanaw k’u fanga fara ɲɔgɔn kan ka ɲɔgɔn dεmεn nɔgɔya ka se ka don o la.

Sεnεgali Ba tε baji dalen gansan ye ; nafamaba b’a la ɲεnamaya kow la. N’o ye nεεma dili, jikɔnɔfεnw ani badalafεnw cogoya ɲuman ye. Ɲεci wεrε bε ba in na min ni nin si tε kelen ye. Nka ba nafaw n’u ta bεε, a ji b’a la ka tiɲε, kεrεnkεrεnnenya la Faleme ; Gurubasi barazi ka kan ka jɔ o min kan. O babolofara in n’a lamini sεbεkɔrɔ tiɲεnen don k’a sababu kε sanuɲinninaw ka dansagonwalew ye.

Amadu GEGERE

Dɔkala Yusufu JARA