Mali sɔrɔdasiw ɲɛmɔgɔso ka kunnafoniko cakkɛda « Dirpa » ye laseli kɛ kunun, k’a jira ko sɔrɔdasiw ni kojugubakɛkulu dɔ karila ɲɔgɔn na ntɛnɛn su zanwuyekalo tile 06 san 2025 Ɲɔrɔn dugu kɔnɔ. U sera ka mɔgɔ bi saba sɔrɔ ka daji u la, k’u ka kɛlɛminɛn caman tiɲɛ, ka dɔw fana ɲuman sɔrɔ u kɔ. O siratigɛ la, Mali sɔrɔdasiw ɲɛmɔgɔso bɛ fasodenw ladɔnniya, ko Mali sɔrɔdasiw ni kojugubakɛkulu dɔ karila ɲɔgɔn na ntɛnɛn su zanwuyekalo tile 06 san 2025 Ɲɔrɔn dugu kɔnɔ nɛgɛ kanɲɛ 22 waati la. A dɔnna ko dugumɔgɔ dɔw tun ye kojugubakɛla ninnu dɛmɛn ka don dugu kɔnɔ ka yɔrɔ nafama caman bon k’u tiɲɛ. Nka Mali sɔrɔdasiw ka galabu kɛnɛya sera k’a to u ka se ka dan sigi u ka waleya juguw la a tuma na. Kojugubakɛla 30 tora sisi la ka kɛlɛminɛn caman sɔrɔ u kɔ. N’o ye pisitole mitarayɛri 19, AK 47, mitarayɛri PKM, mugu jugu fililan sarikɔnba kan (LRAC) o 1 ani kisɛ caman sɔrɔla u kɔ. O kɛlen dugu sumannna, kow tigiya tora Mali sɔrɔdasiw bolo, ka tɛmɛn ni yɔrɔw wolomani ye a tɔ ɲininni na. Mali sɔrɔdasiw ɲɛmɔgɔso bɛ taasibila kɛ ka ɲɛsin sɔrɔdasi kelen min ni tora kɛlɛ in na, o ka denbaya ma, ka sɔrɔ ka sɔrɔdasiw fo k’u tanu u ka baara ɲɛdɔn na. Tarata fana « Dirpa » ka laseli min kɛra, a jirala ko Mali sɔrɔdasiw ni AES kɔnfederasɔn jamanaw ka jɛkabaara kɔnɔ, u b’a la ka kojugubakɛlaw ka bolifɛn caman bɔ baara la. O siratigɛ la, zanwuyekalo tile 06 san 2025, kunnafoniw sera k’a to AES kɛlɛbolo k’u ka tajitamɔbili dɔ yɔrɔdɔn Duna fanfɛlanw na Bulukesi masurunna na, Moti mara la. Pankurun y’o bɔ baara la. Mali sɔrɔdasiw ɲɛmɔgɔso bɛ AES fasojama jigi sigi, k’u bɛ wulikajɔ min na n’o ye an ka dugukolow lakananni ye, o bɛ to sen na fo ka wasa kɛ basigiko la. Dɔkala Yusufu JARA Abubakari TARAWELE
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
