Sedeyawo ka lajεba 64nan : Taama kɔni wulila ka bɔ Mali faamaw kan

Baaraw kuncεtɔ, Sedeyawo ɲεmɔgɔw y’a ŋaniya ka taama kɔnni wuli ka bɔ Mali furancεlafanga jamanakuntigi an’a minisiriɲεmɔgɔ kan Sedeyawo kɔnɔ. Laselisεbεn laban y’a jira, ko ɲangili minnu bε Nizεri kan, olu bε to u cogo la ; wa a b’a ɲinin jamanakuntigi kɔrɔ Mohamεdi Bazumu ka bila.

Sedeyawo y’a jira, ko ɲangiliw wulili ka bɔ Nizεri kan, o bε bɔ furancεlafanga sigili la senkan joona. O siratigε la, lajε in senfε, Benεn jamanakuntigi Patiriki Talɔn, Togo jamanakuntigi Fɔri Esozimuna Eyadema ani Seraleyɔni jamanakuntigi Juliyusi Maada Biyo, olu sugandira ka kε fɔkabεnnaw ye Nizεri sɔrɔdasifanga (CNSP) ni Sedeyawo cε. Politikiko nasira la Sedeyawo kɔnɔ, lajεkεla ninnu y’a jira k’u tε jεn ni Mali, Burukina Faso ani Nizεri cε ɲɔgɔndεmεn lakanan jεkuluba Sahelikungo kɔnɔ « AES » o sigili ye senkan. 

Nizeriya jamanakuntigi Bola Tinubu min ye Sedeyawo ɲεmɔgɔba ye, o ka fɔ la, ko sɔrɔfasifanga yεrε de b’a la ka jamanadenw bila fili la, k’u bɔ u taasira ɲuman kan. A ko Sedeyawo b’u jigi kɔrɔ, ka furancεlafanga taasira « fεεrε ɲuman » don u kɔrɔ ani ka dεmεn don u la minεnko la demokarasi seginni na u ka jamanaw kɔnɔ.

Nizeriya jamanakuntigi ko « AES » sigili senkan Mali, Burukina Faso ani Nizεri fε Bamakɔ san 2023 sεtanburukalo la, k’o tε ko jεlen ye. Ko hakilila min don, o b’a ɲinin ka dan kari demokarasi ani mara kεcogo ɲuman na, k’u bɔ u sira ɲuman dantigεlen kan. 

Fεn min ye Seraleyɔni ani Bine Bisawo kunkanko ye, Sedeyawo ko mɔgɔ minnu bε fanga yεlεmani kɔkɔrɔ, ko Ala kana u ci ka demokarasifanga ninnu bin. Sedeyawo k’a ka dεmεn bε ka taa demokarasifangaw ye, a k’a bε kangari da jamana dɔw fana ye Sedeyawo kɔnɔ, minnu tε ka Sedeyawo ka ɲangiliw labato.

Abubakari TARAWELE

Dɔkala Yusufu JARA