Sirabakan kasaara : A hakε bε ka dɔgɔya Bamakɔ faaba kɔnɔ

Kunnafonidiw ni lafaamuyali minnu bε kε sirabakan kasaaraw kunkan, nafa yera u la. Sabula jate minnu fɔra Bamakɔ faaba kunkan, o b’a jira ko dɔ bɔra a hakε la san 2022 kɔnɔ. Siraba sariya labatoli cakεda min bε wele tubabukan daɲε surun na (DRCTU) n’a bε Meriba ka bolo kan, o ka laselisεbεn ye dantigεli kε.

Laselisεbεn in kɔnɔ, Bamakɔ faaba Mεri Adama Sangare y’a ka nisɔndiya jira dɔ bɔli la sirabakan kasaara hakε la san 2022 kɔnɔ ka tεmεn san 2021 kan. O b’a jira ko mɔgɔ hakε min ni tora san 2021 kasaaraw la, o cayra ni san 2022 ta ye ni mɔgɔ 27 ye.

San 2022, mɔgɔ 2.830 ye sirabakan kasaara sɔrɔ Bamakɔ faaba kɔnɔ, 158 ni tora a la, o ye 14,59 ye mɔgɔ kasaaralen mumε na ; kasɔrɔ san 2021 taw la, mɔgɔ 185 de ni tora sirabakan kasaara la, ka 3.614 jogin. San 2022 kɔnɔ, bolifεnw ye ɲɔgɔn tu siɲε 5.183. A kasaara fanba kεra motow la. Olu ta bεnna kasaara 2.596 ma, n’o ye 50,10% ye.

 Kasaara minnu sɔrɔla motow dama fε, o de cayara kosεbε, wa u juguyara. Mototakisiw niyɔrɔ kεra 194 ye motokasaaraw la. O motobolila caman yεrε ni tora a la. Sennamɔgɔw ni mototigi dama min talonna ka bin fo ka saya kε, o ye 87,97% ye a kasaaraw la. Denmisεn minnu si hakε b’a ta san 18 na ka se 25 ma, ani k’a ta san 26 la ka se 35 ma, olu de kasaarala kosεbε ka da u bolicogo kan siraw la.

« DRCTU » ka laseli la, si hakε minnu kofɔra, o bε hali mɔbilitigiw la, minnu ye kasaaraw kε. O siratigε la, mɔgɔ 148 k’a daminε san 60 la ani ka tεmεn o kan, olu de kasaarala kosεbε san 2022 kɔnɔ ; ka da u si hakε kan, koba tε ku u farikolo la tuguni. Wa mɔgɔ minnu ye kasaara sɔrɔ a 79,20% ye cεw ye ; muso y’a la 20,80% ye.

A b’o cogo kelen na kasaaraw kεli la. Torokɔrɔbugu ni Bakɔ-Jikɔrɔnin cε de kasaara ka jugu ni Bamakɔ sira bεε ta ye (kasara 147). Kεrεnkεrεnnenya la, kasaara ninnu fanba ye wulayanfan ye ; baara jiginwaati. O b’a sɔrɔ bεε kɔrɔtɔlen don k’a taayɔrɔ magεn. A sababu dɔ fana ye dɔlɔmin, jan-bɔ-n-yεrε-kɔ ani ɲεnajεdonw, kasaara jugu caman bε kε o waatiw la.

« DRCTU » ka jateminε na, dɔgɔkun o dɔgɔkun sirabakan kasaara hakε min bε kε, a ka surun 404 na. Darawela-Bolibana ni ACI 2000 komisariyaw de ye san 2022 kasaarakow jateminεw kε siraw kan Bamakɔ faaba kɔnɔ. Sababu minnu fɔra a kasaaraw la, o ye dɔlɔmin, dɔrɔguta, boli dantεmεn, siraba sariyaw labatobaliya, cεεnεni siraw kan, yɔrɔ cogoya ni yeli tε kε ka wasa, siraw ni pɔnw cogoyaw. A dɔw fana sɔrɔla bolilikεlaw yεrε sεgεko jugu fε, walima sunɔgɔ, ɲε da goyali, tulo da goyali, dusukasiba walima hakiliwuli fε.

Walasa ka se ka dɔ bɔ sirabakan kasaara la, laɲinin ye ka siraw labεn, ka siraw bolicogo ladamuniw kε, ka kɔlɔsiliw kε ani ka siraba sariya labato, siraw bolibaaw ni siraw kɔlɔsibaw ka jε ka baara kε. A bε ɲinin mototigw fε u ka kasiki donni matarafa, mɔbilitigiw ka cεsirilan don, dɔlɔ kana min walima ka dɔrɔgu ta ka siraw minε ni bolifεnw ye. Bolicogow ka kɔlɔsili, mɔgɔw ka taa hakε la, ani k’u janto u yεrε la, o ka fisa a ko la kosεbε.

Cεjε DUNBIYA

Dɔkala Yusufu JARA