Tali foroba baara la ani kalansoba ENA na : jɔyɔrɔ 1.564 mɔgɔw bε ka ɲinin

Mɔgɔw tali ɲɔgɔndanw daminεna foroba baaraw ani ENA na, lakananbaaw ta kɔfε. A bεna kε fiɲεbɔda ye kalanden dipulɔmutigi caman ma baara sɔrɔliko la. Nin kunnafoni bɔra ka bin jumadon ɔkutɔburukalo tile 27 san 2023.

San 2023 in kɔnɔ, jamana ɲεmɔgɔw hami ye ka mɔgɔw ta jɔyɔrɔ 1.564 kama ; o la, jɔyɔrɔ 75 ɲεsinnen bε kalansoba ENA ma. Nafoloko, duwaɲεko, lεnpoko, kεnεyako, wariko, terezɔriko, wulakɔnɔbaaraw ani sigida n’a lamini yiriwali, iziniko ni dugujukɔrɔfεnko, yɔrɔw jɔli ni yɔrɔw dilanni ani mara kunkankow b’o jɔyɔrɔ ninnu na.  Kɔkankow, kunnafonikow, arajoko ni teleko, εnfɔrimatiki, denmisεnya ni farikoloɲεnajε, jatekow ani seko ni dɔnko, olu fana b’a la.

Nin mɔgɔta in na, jɔyɔrɔ 75 min tun tora kɔ san 2021 ta la, jamanakuntigi Kolonεli Asimi Goyita y’o fara ɲinan ta hakε kan. Gɔfεrεnaman baarako ani baarako ni hadamadenya fɔkabεn minisiri D^r Fasun Kulubali ye ɲεfɔli kε. A ko nin bεnkan in tara san 2021 ɲɔgɔndanw jaabi dilen kɔfε.

 D^r Fasun Kulubali ka fɔ la, mako bε mɔgɔ 1.288 na. Mɔgɔ 200 min ka kan ka fara duwaɲεso ta hakε kan o t’o la, 76 min tora kɔ o fana t’o la. O b’a jira ko mako bε jɔ mɔgɔ hakε min na san 2023 in tɔ kɔnɔ, o ye 1.564 ye..

Ɲɔgɔndan in bilalen bε hukumu min kɔnɔ, o ye bεrεmakεɲε, jεlenya ani tilennenya ye. O de la, a bε ɲinin ɲɔgɔndannaw fε, u k’u wasa don u yεrε ka dɔnniyaw la. Mɔgɔ minnu ka faamuya mana garijεgε min di u ma, olu bε ta ka sɔrɔdasiya kalanw k’u kun fɔlɔ, sanni k’u bolo don foroba baara la. Ni mɔgɔ ɲininta hakε ma dafa k’a sababu kε kuru hakεlama sɔrɔbaliya ye ɲɔgɔndan na, a tɔ dafali bε kε a damana ɲɔgɔndan wεrε ye ; n’o tε mɔgɔ si tε ta o cogo la bilen. Jamanakuntigi bε cεsiri min na denmisεnw ka baarako la, walasa ka se ka baarantanya kεlε, minisiri y’o foli ni waleɲumandɔn kε.

Dabali minnu tigεlen don walasa ka sira da namaratɔw ɲε ɲɔgɔndanw senfε si hakεko la ani dipulɔmu lankolonko la, o bε waleya nin sen in na fana. Mɔgɔ 807 de ye sebaaya sɔrɔ san 2021 ɲɔgɔndanw na, mɔgɔ ɲininta 883 la. Sεgεsεgεliw y’a jira ko mɔgɔ 22 yera yen, minnu tun ye dipulɔmu lankolon dilan ka kiimεniw kε n’o ye.

O tigilamɔgɔw minεn ka bila kiriso ka bolo kan. Fεn min ye sεbεnw bilali ye ɲɔgɔndan nata in kama, o bε daminε araba nata in yεrε la, k’a kuncε nowanburukalo tile 30 san 2023. Sεbεnw bε lase Faso ka ɲɔgɔndanko cakεda la ani marayɔrɔw gɔfεrεnεriw ka baarakεyɔrɔw la ; n’o ye gɔfεrεnoraw ye.

Mohamεdi JAWARA

Dɔkala Yusufu JARA