Marifatigikulu « CMA » n’a jεɲɔgɔn juguw ka dalaɲininniw n’u ta bεε, Minusima dagayɔrɔ fεn o fεn jamana kɔrɔnyafan fε, a bεε bεna latεmεn Mali sɔrɔdasiw ma a diya la, walima a goya la. O ye sɔrɔdasiw kalikan ye. Gawo, Menaka, Bεri dagayɔrɔw lasɔrɔlen kɔfε, sɔrɔdasiw sigira Minusima dagayɔrɔ la Tesaliti sibiri tεmεnnen in na. O kεra ni kεlε farin ye u ni kojugubakεlaw cε. K’a daminε tarata la ka se alamisa ma, u ye juguw dagayɔrɔ caman bon ni pankurunw ye, walasa u ka se ka fεrε jiginni ma Tesaliti pankurunjiginkεnε na. An bε don min na, Mali sɔrɔdasiw sigira a ɲεma Minusima dagayɔrɔ la Tesaliti kabini sibiri ɔkutɔburukalo tile 21 san 2023 ka bεn ni nεgε kanɲε 9 ye. Mali sɔrɔdasiw ka kunnafoniko cakεda « Dirpa » ka fɔ la, o dagayɔrɔ in ni Mali sɔrɔdasiw dagayɔrɔ min bε Amasarati, olu cε man jan. Mali sɔrɔdasiw bε Amasarati kabini san 2015. O ni Tesaliti cε ye km7 ye kεɲεkayanfan fε. Minusima dagayɔrɔ latεmεnni na Mali sɔrɔdasiw ma Tesaliti, o kεra lajεnin ye, ka Minusima ni Cadi sɔrɔdasiw ka darapow jigin, ka Mali darapo yεlεn u nɔ na. O b’a jira ko Minusima ka baara banna pewu Tesaliti n’a lamini na. Yɔrɔ latεmεnna bonya ni karaama kɔnɔ sɔrɔdasiw yεrε dama cε. Mali sɔrɔdasiw ɲεmɔgɔ min tun bε kεnε kan nin don in na, a ye wele bila sigidalamɔgɔw ma, n’o ye Tesaliti n’a lamini ye, ko sɔrɔdasiw nanen b’u ka lafiya de kama, k’u labɔ kojugubakεlaw ka gεrεntεw kɔrɔ. Minusima fana ye laseli kε, k’a tun kεra wajibi ye ale bolo, k’a dagayɔrɔ in labila Mali sɔrɔdasiw ye ka kɔn a labilali sarati dafali ɲε, ka da basigibaliya fanga bonyako jugu kan yɔrɔw la ; o min bε se ka kε baasi ye a ka mɔgɔw ma. Minusima dagayɔrɔ labilali Tesaliti, o bε a labɔli daminεni jira Kidali mara kɔrɔ. A kεra Minusima dagayɔrɔ 6nan latεmεnni ye Mali sɔrɔdasiw ma, kabini Minusima ye bɔli daminε Mali kɔnɔ ka kεɲε ni sariya 2690 kɔnɔko ye. O min tara zuwεnkalo tile 30 san 2023 diɲε tɔnba ka basigi sabatilijεkulu fε, ka Minusima ka baara ban Mali kɔnɔ. Minusima kεli ka Tesaliti bila, o kεra gεlεyaba kɔnɔ. A ka mɔgɔw y’a jira, k’u tun bε wajibiya ka boli ka don yɔrɔ lakanannenbaw kɔnɔ k’u dogo mugu juguw filili ɲε, tuma o tuma ni mankanw bɔra, o mantɔɔrɔ kana u sɔrɔ. Cadi ye pankurunw bila ka na a ka sɔrɔdasiw cε ka taa n’u ye. Nka Nepali jamanaden minnu tun ka baara ye dugujukɔrɔminiw tiɲεni ye, Kanbɔji εnzeniyεriw ni Bεngiladεsi jamanaden minnu ka baara tun ye pankurunjiginyɔrɔ kɔlɔsili ye, Minusima ka pankurun taara n’olu ye. Mɔgɔ tɔ min tun tora kɔfε taabali ye, olu sεnsεnna mɔbiliw la ka Gawo sεgεrε ɔkutɔburukalo tile 21 san 2023 ; u kunbεnbaaw b’u sɔrɔ yen. Minusima mɔgɔ si kɔni tε Tesali mara kɔnɔ tuguni Minusima y’a jira, ko a bɔli sennateliya, y’a wajibiya k’a bolofεn nafama dɔw tiɲε, ka dɔw fana bɔ u cogoya ɲuman na, u kana se ka labaara mɔgɔ wεrε fε u kɔfε. O bolofεn dɔw ye u ka mɔbiliw, u ka kisεw, an’u ka kuranbaraw ; sabula ko jamana minnu y’o kε dεmεn ye Minusima ma a ka baaraw hukumu kɔnɔ, ko ale tεna se k’olu lasegin u ma tuguni. Minusima ko a y’o bolofεntiɲε min kε, ONU ka sariya b’o kofɔ. Sabula mɔbiliba 200 minnu tun ka kan ka na o fεn ninnu nɔfε, u ma sira sɔrɔ ka bɔ Gawo ka se Kidali mara kɔnɔ. O mɔbilibaw balannen bε yen kabini sεtanburukalo tile 24 san 2023. Jamana ɲεmɔgɔw ma yamaruya di u ma, u ka tεmεn. An b’aw ladɔnniya, ko Minusima dagayɔrɔ min tun bε Duwazan, o latεmεnna siwiliw ma basigi kɔnɔ sibiridon kelen in na ɔkutɔburukalo tile 21 san 2023. Kasɔrɔ jamana kɔrɔnyanfan fε Minusima y’a dagayɔrɔ minnu labila, olu latεmεnna Mali sɔrɔdasiw ma. Madiba KEYITA Dɔkala Yusufu JARA
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
