Baara kɛko ɲuman ye foliko ye. Kɛrɛnkɛrɛnnenya la n’a kɛra faso ye an’o ka ɲɛnamaya waati gɛlɛn kɔnɔ, dan tɛ se ka ye a bonya an’a wasa la. Awɔ, o wasa in kannabɔlen ni kandili ani tigɛnkan ye ka nɔrɔnkola fara o kan Mali kura jɔli la, o tun bɛ faso kɛkun bɔ ka ɲuman lakodɔn jamana in maaba caman ye. A kɛra juma tɛmɛnnen in, Kuluba jamanakuntigiso la ; min ɲɛmɔgɔya tun bɛ furancɛlafanga jamanakuntigi Zenerali darimɛ Asimi Goyita bolo, faso ka lakodɔnnikɛlaba.
Kɛnɛ wasalen in sigira k’a kɛ dakun caman ye medayidiw la ; i n’a fɔ : Faso tɔgɔla baarakɛlaba bonya medayi, n’o bɛ wele tubabukan na diɲite de garan ofisiye de lɔrɔduru nasiyonali, faso tɔgɔla yamaruyadibaa jala, n’o ye garan komandɛri de lɔrɔduru nasiyonali ye, faso tɔgɔla baarakɛla jala, le garadi dofisiye de lɔrɔduru nasiyonali ani sewaliye de lɔrɔduru nasiyonali. Mɔgɔ 153 ka bɔ foroba ni kɛnyɛrɛye cakɛda caman na, seko ni dɔnko ani bato sira fɛ.
Medayi min ye diɲite de garan ofisiye de lɔrɔduru nasiyonali ye, o dira mɔgɔ 14 ma, minisiriɲɛmɔgɔ Dr Sogɛli Kokala Mayiga, Zenerali de kɔri darimɛ Maliki Jawu bulonba kuntigi, Zenerali de kɔri darimɛ Sajo Kamara lafasa ni sɔrɔdasi kɔrɔw minisiri, Zenerali de kɔri darimɛ Isimayɛli wage fɔkabɛn, bɛn ni hadamadenya donɲɔgɔnna minisiri, Zenerali de kɔri darimɛ Modibo Konɔ, faso basigili kunnafoniko cakɛda (ANSE) ɲɛmɔgɔba, Sanba Alihamudu Babi jamana sɛgɛsɛgɛlikɛlaba, Madamu Sanɔgɔ Aminata Male, jamana cɛfɔlikɛlaba.
Madayidi kɛnɛ sigili dakun filanan kɛra garan komandɛri de lɔrɔduru nasiyonali jalaw dili ye. O dira fangabulonw ɲɛmɔgɔw, faso tɔgɔla cakɛda dɔw maabaw, lakananbaa jalatigiba dɔw, diinɛ ɲɛmɔgɔ dɔw, seko ni dɔnko tigilamɔgɔ dɔw i n’a fɔ Nahawa Dunbiya, Nayinin Jabatɛ, Fisa Mayiga…
Medayi minnu ye le garadi dofisiye de lɔrɔduru nasiyonali ani sewaliye de lɔrɔduru nasiyonali ye, olu dira gɔfɛrɛnaman tɔgɔla baarakɛla kɛmɛ ni kɔ ma ; minisiriw ni jamanakuntigiso mɔgɔ dɔw b’o la. Dr Alifuseyini Jawara ye jamanakuntigiso sekeretɛri zenerali ye, minisiri fana don o jɔyɔrɔ in kama. Kominiw kɔnseye dɔw diinɛ ɲɛmɔgɔ dɔw, marayɔrɔw gɔfɛrɛnɛri dɔw ani hadamadenya yiriwali cakɛda caman wɛrɛw mɔgɔ dɔw b’o la.
Medayiw dibaaba faso tɔgɔ la n’o ye Zenerali de birigadi Amadu Sagafuru Geyi ye, a ka kɔrɔfɔ kɔnɔ, a fɔlɔla ka foli ni tanuni lase furancɛlafanga jamanakuntigi ma a sugandili la ka kɛ Zenerali darimɛ ye kɔsa in na. A k’o b’a ka kandili an’a ka tigɛnkan lakodɔnni kofɔ a ye Mali ka yɛrɛmahɔrɔnya sɔrɔliko la. O kɔfɛ a ye cɛw ni muso lakodɔnnen ninnu tanu u ka cɛsiri la farinya, nɔrɔnkola, ɲɔgɔndɛmɛn, bonya, jamaɲɛmɔgɔya kɔnɔ, ka yɛrɛdi fara o kan Mali ye.
Zenerali de birigadi Amadu Sagafuru Geye ka fɔ la medayi kuratigiw ma, bi, aw bilala dakun kura kɔnɔ Mali ani hɛrɛ ye. N’o ye Mali kura jɔli doni dali ye aw kun. Ani fana, ka ɲɛda kura di Mali fasojama kelen in ma bɛn ni kelenya kɔnɔ, aw tun y’o min kɛ aw ci ye waatiw ani tariku kɔnɔ. Medayi kuratigiw ka kumalasela Madamu Sanɔgɔ Aminata Male jamana cɛfɔlikɛlaba ye foli ni tanuni kɛ jamanakuntigi ye a ka ɲumanya la ka ɲɛsin u ma.
A y’a jira ko nin waleya in ye lakodɔnni ye baara ɲumankɛ sira fɛ, wa ko lasuli fana don olu ka dusu ta halibi ka taa a fɛ ka dɛmɛn don Mali yiriwali la. A k’u bɛ jamanakuntigi fo k’a waleɲumandɔn medayiw sɔrɔli la u ka cɛsiri an’u ka kandili lakodɔnni na u ye faso baara la. A ko n’u ma min fara u ka cɛsiri fanga kan, fɛn tɛna bɔ o a fasojama bɛɛ ka nafa kama. Wa k’u seko mana kɛ min ye bilasirali la ka bila don nataw mɔgɔw ɲɛ, o tɛna kɔtigɛ.
Medayigikɛnɛ in kuncɛra ni furancɛlafanga jamanakuntigi ni medayitigiw ka jamafotota ye jamanakuntigiqo bɔda la Kuluba.
Dɔkala Yusufu JARA
Abubakari TARAWELE
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
